Ebvu Sólomọnu 2 - BAYỊBURU Izii

¹ Mu dụkwa g'okoko lẹ nsụda Sharọnu; mu dụkwapho g'ojimbvu, jashịru lẹ nsụda-úbvú.

² Ọ bụ ẹgube ono abụjeru; ojimbvu yẹle óbvú -nọgbabe; l'ọ kakọta phẹ ama mma-a; bụ g'onye ono, dụ mu l'obu ono kakọta ụnwumgboko ọzo ama mma g'ẹphe ha.

Iphe nwanyị ono epfu

³ Ọ kwa ẹgube ono, ụdara akakọtaje ama mma l'iphe, bụ oshi, nọ l'ọswa bụ g'onye ono, mu yeru obu ono esengoje l'echilabọ ụnwokorobya ọzo. Ọobujeru mu -nọdu iya lẹ mkpula l'ọotso mu ntụmatu; tẹme akpụru iya nọdu atsọjekwa mu phọ ụtso.

⁴ O dutaru mu je l'ụlo ẹka a nọ eri nri ọbo-iphe. Iphe, o gude mee g'obu shihu mu ike bụ obu, o yeru mu.

⁵ Gudenụ akpụru vayịnu, e gheru egheghe mee g'ike dụ mu. Tẹme l'i gude ụdara mee g'obu shihu mu ike; kẹle mu avẹhuakwa avẹhu l'obu, mu yeru ngu.

⁶ Ẹkicha iya bẹ o yeru mu l'ishi; bya rịkua mu ẹkutara iya.

⁷ Unubẹ ụnwada Jierúsalẹmu; unu kwee mu ukwe l'unu ta akpatsudu n-yemobu jasụ l'ọ bya l'onwiya; kẹle n-yemobu bẹ bụkwa g'eedoje ọkpa anịgo-a; mẹ ọkpa ele-a bụ g'eedoje iya.

⁸ Ngabẹkpodapho! Ọ kwa olu onye mu yeru obu bẹ mu anụ nno! Lenu g'o gude apfụ shọoshoo apfụghagbaa úbvú úbvú; awụ wugelengu wugelengu awụghagbaa obvu obvu agba abyapfuta mu.

⁹ Onye mu yeru obu dụkwa g'anịgo; ọzoo gẹ nwele. Lenu; ọ nọakwa l'azụ igbulọ anyi; pyofu ẹnya lẹ windo enyo swịrii.

¹⁰ Onye mu yeru obu sụkwaru mu: “Gbẹshi gụbe onye dụ mu l'obu; mbụ gụbe onye ono bụ nwọma-mma mu; tsonụru mu!

¹¹ Hụmanu! Udzumini ghaakwarụ; igwe buwa mini; udzu-mini laa.

¹² Okoko atụshiakwa ige lẹ mgboko. Teke aagụje ebvu rwuakwaru. A nọdu anụwaa ọ́rà kerekete l'alị anyi.

¹³ Oshi figu watakwaru amị mebyi. Mkpọ ige, vayịnu tụshiru emee ẹkameka; ọ tụko eshikọta kwẹekweekwee. Gbalihu; gụbe onye mu yeru obu! Bya! Ọ-ma-mma mu; gbẹshi g'anyi je!”

Nwoke ono sụ:

¹⁴ Jiko gẹ gụbe nwando-nwẹnu mu, nọ lẹ mgbaka ikelepfumu mkpuma; mbụ gụbe onye domiru onwongu lẹ mgbawara, nọ l'eli úbvú; jiko menaa gẹ mu hụma iphu ngu! Jiko pfunuru opfu yeru mu; kẹle opfu ngu atsọje mu ụtso. Atatiphu ngu nọdu ama ntụmatu.

¹⁵ Gudekọtaru anyi uphẹga ono nta; mbụ ụnwu uphẹga ono, anọduje emebyishi vayịnu ono; kẹle vayịnu anyi wataakwaru amị mebyi.

Iphe nwanyị ono epfu

¹⁶ Onye mu yeru obu bụ nkemu; mu bụru nkiya; mbụ onye ono, eche atụru iya l'ẹka ojimbvu kụru;

¹⁷ gbiriri jasụ l'ụzenyashi; mbụ teke onyonyo-anwụ ta adụhedu. Jiko gụbe onye mu yeru obu; ghakọbe pfụkwaa kẹ shọoshoo ẹgube ono, anịgo mẹ ele nshịi apfụje l'ẹka úbvú dụ kpọkoro kpọkoro kpọkoro ono; lwapfuta mu.