Ebvu Sólomọnu 1 - BAYỊBURU Izii

¹ Ebvu, kakọta ree l'iphe, bụ ebvu, a gụru agụgu, bụ iya bụ ebvu ọphu Sólomọnu gụru.

Iphe eepfu l'ọkpoku ibe eze

² Ọ dụ mu g'a sụ l'ii-tsutsu mu ọnu; kẹle n-yemobu ngu kakwa mẹe eme ẹhu-ụtso.

³ Manụ, ị nyịru eshikwa mkpọ shii. Ẹpha ngu tụko ẹkameka ngaa g'ẹka manụ, eshi mkpọ wụshihuru. Ọ bụru iphe ono kparụ iphe, ụnwumgboko yeru ngu obu.

⁴ Duta mu; g'anyi tụgbu-kebe! Eze bẹ dubatawaru mu l'ụlo iya; mbụ l'ẹka anyi a-nọdu; ẹhu atsọo anyi ụtso; anyi etee ẹswa ngu; bya abụru ẹka anyi a-tụko nọdu jaa n-yemobu ngu ajaja jaghata g'aajajẹ mẹe. Ọ gbarụpho g'ụnwumgboko yeje ngu obu!

⁵ Unubẹ ụnwada Jierúsalẹmu; a makwarụ-a lẹ mu eji uji; ọle mu dụkwanu ùbvù l'ẹnya. Mbụ lẹ mu jitabekwaru uji g'ụlo-ẹkwa ndu Keda; obenu lẹ mu dụkwanu ùbvù l'ẹnya g'ẹkwa, Sólomọnu gebegbaaru l'ụlo iya.

⁶ Unu ta anọdukwa ele mu phọriphori opfu l'anwụ chiru mu; jasụ mu nọdu eji uji; Ọ kwa l'ẹhu, eghu unwune mu eghu meru g'o gude ẹphe nwuru mu yee gẹ mu nọduje l'ozi opfu-vayịnu mkpụrumkpuru; ọphu ọ dụdu teke ụzo dụjeru mu k'eleta onwomu ẹnya.

⁷ Gụbe onye mu yeru obu; kanụru mu ẹka iicheje atụru ngu! Yẹle ẹka ịidobeje atụru ngu ọbu l'echi-eswe g'ẹphe tụta unme! Gẹ mu te ejeshi anọdu aghaphe gẹ nwanyị ovuọba l'ọdu atụru ndu ọzo.

Iphe nwoke ono epfu

⁸ Gụbe nwanyị ọphu bụ ngu kakọta ama mma l'iphe, bụ ụnwanyi g'ẹphe ha; ọ -bụru l'ị tị madụ ụzo; tsopyabẹepho owere atụru ono; l'i je echee ụnwu-eghu ngu lẹ mgboru ụlo-ẹkwa ndu eche atụru ono.

Eze egoshi n-yemobu iya

⁹ Iphe, mu a-tụru gụbe onye ono, dụ mu l'obu yeru; bụ ada-ịnya, nọ l'ụgbo-ịnya Fero.

¹⁰ Asha ngu bẹ iphe-nchị, i yeru meru; ọ nọdu ama ntụmatu. Ịyagba, i doru l'olu bẹ kwekwaru ngu ntụmatu.

¹¹ Anyi e-gude mkpọla-ododo, a tụgbaru mkpọla-ọchaa paapaa metaru ngu ịyagba.

Nwanyị ono arị k'onye o yeru obu

¹² Eze nọro l'agụga teburu iya; mkpọ manụ-nadụ, mu nyịru bya avọo ẹkameka pfurupfuru.

¹³ Onye mu yeru obu dụ mu g'ụ̀nwù mẹru, eshi kwẹekweekwee, mu tụ-koberu l'obu.

¹⁴ Onye mu yeru obu dụe mu phọ gẹ jipfujipfu okoko hena, ama ntụmatu, shi l'opfu-vayịnu ndu Enu-Gedi.

Iphe nwoke ono epfu

¹⁵ Gụbe onye ono, mu yeru obu ono; ị dụkwa ùbvù! Ire-lanụ opfu; ị dụkpoo ùbvù ọkpobe adụdu! Ẹnya ngu dụepho g'ẹnya ndo-nwẹnu.

Iphe nwanyị ono epfu

¹⁶ Gụbe onye mu yeru obu; iphe, ịimakwanu l'ọo mma! Ị dụ k'eye obu eviya eviya! Ẹka anyi azẹje azẹe dụ kẹ kpuchikala.

Iphe nwoke ono epfu

¹⁷ Oswebe, anyi gude gbaa uko anyi bụ oshi sida. Oshi, anyi swebushiru iya bụ oshi payịnu.