Ebvu Aphụ 5 - BAYỊBURU Izii

Epfu anụ Chileke g'ọ phụa obu-imemini

¹ Jiko Chipfu; nyatanụ ẹjo-iphe, dapfutaru anyi-a. Lenaa ẹnya hụma iphe-iphere, eeme anyi.

² Okiphe anyi bẹ lakọtawaru ndu lwarụ alwalwa l'ẹka. Ibe anyi lakọtawa ndu ọhozo l'ẹka.

³ Anyi bụwaa ndu a tọgboru nwa maa; ọphu anyi enweẹdu nna. Ne anyi phẹ bẹ bụwaa ụnwanyi, ji phẹ anọedu.

⁴ Mini-angụngu bẹ bụ azụta bẹ anyi azụtaje iya. Nkụ, eeshije ite bụru ụgwo bẹ anyi apfụje kpata iya.

⁵ A nyabẹwaru anyi mkpamẹhu l'olu. Ike bvụ-gbuwaru anyi; ọphu ẹphe ekwedu g'anyi tụta unme.

⁶ Anyi wowaru onwanyi ye l'ẹka ndu Ijiputu; waa ndu Asiriya g'ee-shi g'anyi hụmaje nri, a-sụru anyi eriri.

⁷ Nna anyi phẹ bẹ meru iphe-ẹji; nwụshihu. Ọ bụru anyịbedua byaru evuta aphụ, dụ iya nụ.

⁸ Nta bụ ndu bụ ohu bụ phẹ bụ ishi anyi. Ọphu ọ dụdu onye a-nafụta anyi l'ẹka phẹ; g'anyi nweru onwanyi.

⁹ Anyi alọje ishi anyi alọlo tẹmanu anyi ahụma nri, anyi e-ri; kẹle ogu-echi bẹ nọ l'echiẹgu.

¹⁰ Akpọ-ẹhu anyi bẹ ahụ ọku g'ovokọku. Iphe, kparụ iya nụ bụru l'ẹjo ẹgu eme anyi.

¹¹ Ụnwanyi bẹ e gudechaaru jepfu k'ọkpehu lẹ Zayọnu; gudekwaphọ ụnwumgboko jepfu l'ime mkpụkpu, dụgbaa lẹ Jiuda.

¹² Ẹphe gude ẹka phẹ swị-gbushia ndu-ishi. Ọphu aakwabẹjeedu ndu bụ ọgerenya ùbvù.

¹³ Unwokoro bẹ ẹphe gudechaaru g'ẹphe gweje iphe egwegwe lẹ mkpuma, eegweje iphe. Ụnwegirima unwoke nọdu ada tsụutsuu lẹ nkụ, e boru phẹ.

¹⁴ Ndu bụ ọgerenya ta anọjeedu l'ọnu-abata mkpụkpu. Ọphu ụnwokorobya agụjeedu ebvu, ẹphe shi agụje.

¹⁵ Ẹhu-ụtso ta adụedu anyi l'obu. Ebvu, anyi eteje bẹ byawaru bya abụru nggụmaphu.

¹⁶ Okpu-eze ono bẹ shiwaa anyi l'ishi dafụ. Nshịo anyi; kẹle anyi mewaru iphe-ẹji!

¹⁷ Ọo iphe ono meru g'o gude meji tọfu anyi. Ọ bụru iya kpatarụ; ẹnya dụchawaa anyị ragaraga.

¹⁸ Kẹle úbvú Zayọnu bẹ bụwaa ochobu; Ọ bụru nkụta-ọswa bẹ etsojeru ejephe l'eli iya.

¹⁹ Ọo gụbe Chipfu bẹ a-bụru Onye eze anyi jasụ l'ojejoje. Mbụ l'aba-eze ngu anọje; e -shi l'ọgbo sweru ọgbo.

²⁰ ?Bụ gụnu meru g'o gude ị zọhaa anyi jasụru asụru? ?Bụ gụnu meru g'o gude ị parụ anyi haa nọo ọdu?

²¹ Duphutanụ anyi azụ l'ẹka ị nọ; jiko Chipfu; k'ọphu anyi a-lwapfuta ngu ọzo. Mephunu ọnodu anyị azụ g'ọ dụ g'o shihawaa dụ lẹ teke k'ichee.

²² ?Tọo ị jịkawaru anyi l'ophu l'ophu? Mbụ ?ịvuwaru ọvuma parụ anyi haa phuruphuru gberegedege tọo?