Ebvu Aphụ 4 - BAYỊBURU Izii

Ọnodu Jierúsalẹmu, teke ọ daru

¹ Lewarọ gẹ mkpọla-ododo ono, shi egbu nwịinwii ono byaru agbachihuwa agbachihu. Lewarọ g'ọkpobe mkpọla-ododo ono, byaru agbanwee. Mkpuma ụlo, dụ nsọ bẹ a tụkashichaaru nanụ nanụ lẹ mgbakata-ụzo, nọnu.

² Ụnwu Zayọnu, vugbaa oke aswa ono; mbụ ndu ono, shi aba urwu g'ọkpobe mkpọla-ododo ono; bẹ byawaru adụ rịvo rịvo gẹ ite, e gude ụrwa kpụa; mbụ g'iphe, ọ-kpụ-ite gude ẹka kpụa.

³ Mbụ-a; nkụta-ọswa bẹ echebejekwa ụnwu iya ẹra; obenu lẹ ndibe mu bẹ ẹjo obu, dụ phẹ nụ bẹ dụ gẹ k'oke-ẹnu, bu l'echiẹgu.

⁴ Ire bẹ nyakụchawaru ụnwegirima, angụ ẹra l'akpo l'ẹka ẹgu ẹra agụ phẹ. Ụnwegirima nshịi nọdu arwọ arwọ nri; ọphu ọ dụdu onye anụje phẹ iya nụ.

⁵ Ndu ono, shi anọduje eri gwọogwoo ono; bẹ dakachaawaru l'etsuzọ. Ndu ono, e gude nkụushi hefuta ono bẹ azẹjewaa l'ikpọzu.

⁶ Aphụ, a nụru ndibe mu k'ẹjo-iphe, ẹphe meru bẹ ka shii eme lẹ kẹ ndu mkpụkpu Sọdomu; mbụ Sọdomu ono, e gude ntabu ẹnya lanụ mebyishia; ọphu ọ tọ dụdu onye gbaru phẹ mkpu ono.

⁷ Ndu-ishi phẹ bẹ shi ka aka-mini-sunoo acha pemu pemu. Ẹphe shi ka ẹra-eswi acha ụcha. Ogwẹhu phẹ bẹ shi akajẹ mkpuma-egbe acha kẹ zịriri. Ẹphe shi anọduje ama gẹ mkpuma sáfàyà.

⁸ Ọle nta-a bẹ ẹphe ka unyi eji uji. Ọ tọ dụdu onye ahụbejekwadu phẹ ama l'ụzo. Akpọ-ẹhu phẹ bẹ nyakụchawaru nwa anyakụru l'ọkpu phẹ. Ẹphe kpọhuwaru nkụ dụ gẹ mkpụshi nkụ.

⁹ Ndu e gburu lẹ mma; kakwa mma eme lẹ ndu ẹgu gburu. Ẹgu gwarụ phẹ maa; jasụ ẹphe nwụshihu; kẹle ọ tọ dụdu nri, shi l'ẹgu rwuru phẹ ọnu.

¹⁰ Ụnwanyi, nweru obu-imemini bẹ gudechawa ẹka phẹ shia ụnwegirima phẹ l'ite taa; ọ bụru nri phẹ lẹ teke ono, ndibe mu larụ l'iswi ono.

¹¹ Chipfu bẹ gbahawaru oke ẹhu-eghu iya ẹka. O kpukposhiwaru ẹhu-eghu iya ono, enwu phuruphuru ono. Ọo ya bẹ dụ-nwuru ọku, tsuru Zayọnu tsupyashịchaa ẹka a tụru ọkpa iya.

¹² Ndu eze ndu mgboko-a; mẹ ndu bu lẹ mgboko l'ophu bẹ te ekwetaduru lẹ ndu iwashị; mẹ ndu ọhogu bẹ a-dụ ike ye ọkpa l'ọnu-abata Jierúsalẹmu.

¹³ Obenu l'o meru nno. Ọ bụru iphe, kpatarụ iya nụ bẹ bụ iphe-ẹji, ndu mpfuchiru iya emegbaa; Mẹkwapho ẹjo-iphe, ndu-uke iya eme; mbụ ndu ono, nọ l'echilabọ mkpụkpu gbushia ndu pfụberekoto ono.

¹⁴ Ẹphe tsoru ụzo aghaphe phururugbada gẹ ndu atsụ ishii. Ẹphe gudewaa mee ndu ẹphe gbushiru merwushia onwophẹ; k'ọphu bụ l'ọ tọ dụdu onye a-dụ ike edenyi ẹka l'uwe phẹ.

¹⁵ Iphe ụnwu-eliphe anọduje araru phẹ bụ: “Unu tụgbua! Ntụrwu dụ unu l'ẹhu! Unu tụgbua! Unu tụgbua! G'ọ tọ dụkwa onye unu e-denyi ẹka!” Ọo ya bụ; ẹphe gbafụ je aghapheaha phururugbada. Ndu shi l'ọhamoha, nọnu nọdu asụje: “Ẹphe ta abyakwa ebubaaru l'ẹka-a ọzobaa.”

¹⁶ Ọo Chipfu l'onwiya bẹ bụ onye chịkashiru phẹ nụ. Ọphu ọo-gụbeedu phẹ iphe ọzobaa. Ẹphe ta akwabẹduru ndu-uke ùbvù; Ọphu ẹphe te emeduru ndu bụ ọgerenya ree.

¹⁷ Ọphu kachakpọo nụ bụ l'anyi lewaru ẹnya ndu a-gbaru anyi mkpu; ike bvụ anyi; ọ bụru kẹ mmanụ. Anyi nọ l'ụlo-nche anyi ele ẹnya ọha ono, taa dụkpodanu ike adzọta anyi.

¹⁸ Ẹphe anọduje eedo ọkpa anyi; k'ọphu bụ l'anyi te eshijeẹdu ụzo anyi. Mbọku ikpazụ anyi dụkwaa ntse; a gụwaru mbọku, anyi a-nọ-beru ọgu; noo kẹle mbọku ikpazụ anyi rwuwaru erwurwu.

¹⁹ Ndu achị anyi ọso bẹ kakwa ugo, ephe l'akpaminigwe eme barabara. Ẹphe chịru anyi ọso l'eli úbvú úbvú; ẹphe je egepagbaaru l'echiẹgu kwabẹru anyi.

²⁰ Onye ono, Chipfu wụru manụ l'ishi; mbụ onye ono, bụ iya bụ unme, anyi atụ ono bẹ nwulahụru lẹ nsụ, ẹphe tụru; mbụ onye ono, anyi rịru sụ l'anyi a-nọdu lẹ mkpula iya dzụru ndzụ l'echilabọ ọhamoha ono.

²¹ G'ẹhu tsọo ngu ụtso; tee ẹswa gụbe nwada Edọmu; mbụ gụbe onye ono, bu l'alị Uzu. Ọle okoro iphe-ẹhuka ono bẹ a-nụkwa ngu-a. L'ịi-ngụa ya; l'ọotsua ngu atsụtsu; l'ịigbabe onwongu ọto.

²² Gụbe nwada Zayọnu; aphụ, anụ ngu k'ẹjo-iphe ono, i meru ono bẹ bvụakwaru nụ. Ọ tọo haẹdu ngu g'ị bụwaruro onye a kpụru lẹ ndzụ. Ọle ọo-nụkwanu ngu aphụ ẹjo-iphe, i meru gụbe nwada Edọmu. Iphe-ẹji ngu ono, bẹ ọo-tụ jalaa.