Ebvu Aphụ 3 - BAYỊBURU Izii

Iphe-ẹhuka ndu Ízurẹlu erwu Jieremaya l'ẹhu

¹ Ọo mbẹdua bụ onye gudekpọo ẹnya mu hụma iphe-ẹhuka ono, Chileke gude oke ẹhu-eghu iya echi g'eechi mgbọro ono.

² Ọ chịfuru mu; mee mu haa eje l'ìphóró jeahaa ije l'ọchii.

³ Ire-lanụ bụ l'o gudewaa ẹka iya awagọ mu mbọku-mbọku.

⁴ Anụehu mu; mẹ akpọ ẹhu mu bẹ o mewaru ọ nọdu ese ẹli. Ọkpu, nọ mu l'ẹhu bẹ ọ kụ-jishiwaru akụ-jishi.

⁵ O gude iphe, atsọ ilu waa iphe-ẹhuka kephee mu; mbụ gude iya gbaphee mu mgburugburu.

⁶ O mewaru gẹ mu nọdu l'ọchii; gẹ ndu nwụhuhawaru nụ teke dụ ẹnya.

⁷ Ọ kpụ-phetaru mu mgburugburu; k'ọphu bụ l'o to nwedu ẹka mu e-shi lụfu alụfu. Ọ nyabẹwaru mu ẹgbirigba, anyi-tsuta mu anyi-tsuta.

⁸ Teke mu chiru mkpu nta chia imo; raa nta raa imo g'ọ gbaaru mu mkpu; Ọ tọ ngabẹdu nchị l'epfupfu, mu epfu anụ iya.

⁹ O gudewaa mkpuma, a gbakpọshiru agbakpọshi dochishia mu ụzo; bya emewaa g'ụzo mu dụkota nggọdogonggodogo.

¹⁰ Ọo g'agụ akwagebeje-a bụ g'ọ zẹ kwabẹru mu; Mbụ kwabẹ g'oduma, domiru onwiya edomi.

¹¹ O nwufuru mu l'ụzo, mu eshije; woru mu labushia nanụ nanụ; Bya agbado mu; mu dabyiru nkịnyi mu.

¹² O setawaru apfụ iya; ọ bụru mbẹdua bẹ ọ tụberu g'ọ gbaa ya.

¹³ O wotaru apfụ, shi l'ẹkpa apfụ iya; woru iya sụbaa mu obu.

¹⁴ Mu bụwaa onye ndibe mu anọduje atụ ụzu ọchi; Mbụ onye aanọduje agụru ebvu eswe l'ẹnyashi gude aja mu ewenu.

¹⁵ Ọo iphe, atsọ ilu bẹ o gude nụ-jia mu ẹpho. Ọ bụru age bẹ o cheru mu jasụ ọ tsụahaa mu atsụtsu.

¹⁶ O gudewaa ẹjirija kujishia mu eze; bya azọwaa mu tọlitoli lẹ ntụ.

¹⁷ Ị nafụwaru mu nchị-adụ-doo; Mbụ lẹ mu zọhawaru iphe, bụ iya bụ ẹhu-guu.

¹⁸ Ọo ya meru g'o gude mu nọdu epfu sụ: “Ike bvụakwaru mu; Ọphu iphe, mu ele ẹnya iya l'ẹka Chipfu erwuẹkwaru mu phọ ẹka.”

¹⁹ Mu nyatarụ iphe-ẹhuka mu; waa phururugbadaa, mu aghaphe; mbụ iphe ono, atsọ ilu; waa age ono.

²⁰ Ọobujeru teke mu nyatarụ iya g'ọ ha; meji atọfu mu.

²¹ Ọobujeru mu -nyata iphe lanụ-a; obu eguzeta mu.

²² L'ọo n-yemobu Chipfu ono meru g'o gude ọphu anyi atụkodu lakọta l'iswi. Noo kẹle obu-imemini iya te nwedu eberu.

²³ L'ụtsu g'ụtsu bẹ n-yemobu waa obu-imemini Chipfu ono adụje ọ̀phúú ọ̀phúú. Apfụshi ike ngu bẹ parụ ẹka apaa.

²⁴ Iphe, mu epfuje l'obu mu bụ l'ọo Chipfu bụ okiphe, mu ketarụ. Ọo ya meru g'o gude mu je l'anọdu kwabẹru iya.

²⁵ Chipfu bẹ dụkwaru ndu ono, nọ kwabẹru iya nụ lẹ ree; mbụ onye ono, anọduje ele ẹnya iya.

²⁶ Iphe, dụ ree bụ gẹ nemadzụ nọdu nggujingguji kwabẹ; nọdu kwabẹru Chipfu g'ọ dzọo ya.

²⁷ Ẹgube ivu-ẹrwa ono bẹ ọ dụje ree gẹ nemadzụ vua ya lẹ teke ọ bụ okorọbya.

²⁸ G'onye ọbu nọdu nggujingguji vuru iya nkịnyi iya; Noo kẹle ọo Chipfu boru iya ya.

²⁹ G'onye ọbu phozekwa kpube iphu l'alị; kẹle o nweru g'ọo-dụ; l'e meeru iya iphe, oole ẹnya iya.

³⁰ G'o dobe upfuru-nchị iya g'onye echi iya ẹka chita ike iya; Ọ haa g'e gude iphe-iphere nụ-jia ya ẹpho.

³¹ Kẹle Nnajịuphu taa -jịkadu nemadzụ jasụ l'ojejoje.

³² Ọ bụ eviya l'oomeje g'aphụ tsọru nemadzụ; ọle ọophujekwapho obu-imemini. Kẹle n-yemobu iya bẹ nyịberu anyịbe.

³³ Ọ tọo nọdujedu atsọ iya ụtso g'o mee g'iphe-ẹhuka waa aphụ dapfuta ụnwu-eliphe.

³⁴ G'e gude ọkpa zọpyashia ndu ono, a tụru mkpọro lẹ mgboko;

³⁵ mbụ g'a nafụ nemadzụ iphe, rwuberu iya nụ l'atatiphu Ọkalibe-kangokọtaru-nụ;

³⁶ mbụ l'a -nafụ nemadzụ iswi-ọdu-mma, rwuberu iya nụ; bẹ iphemiphe ono g'ọ ha taa dụkwa Nnajịuphu ree.

³⁷ ?Bụ onye a-dụ ike pfua opfu; mee ya g'o ree; m'ọ -bụru lẹ Nnajịuphu ta atụduru ekemu g'o ree?

³⁸ ?Tọbudu Ọkalibe-kangokọtaru-nụ bẹ asụje g'iphe-ẹhuka waa iphe, dụ ree byapfuta nemadzụ?

³⁹ ?Bụ gụnu meru g'o gude nemadzụ, nọ ndzụ je anọduje atsụshi aphụ; lẹ teke aahụ̀ iya ahụ̀hù k'iphe-ẹji, o meru?

⁴⁰ G'anyi nyochana ụzo anyi; gbua ya igo; Lwaphuta azụ lwapfuta Chipfu.

⁴¹ G'anyi palinaa obu anyi imeli; Chị-liaru Chileke, nọ l'imigwe ẹka imeli sụ:

⁴² Anyi meswewaru; bya ekwefu ike; ọphu ị tị gụeduru anyi nvụ.

⁴³ I kpuchiteru onwongu ẹhu-eghu gude chịa anyi ọso. I gbuwaru anyi; ọphu ị tị phụduru anyi obu-imemini.

⁴⁴ I gudewaa urwukpu kpuchia onwongu; k'ọphu ọ tọ dụdu epfupfu, anyi pfuru nụ ngu e-rwuje ngu nchị.

⁴⁵ I mewaru anyi bụru ndu dụ ẹkpa-oyi; bụru ikpọzu l'echilabọ ndiphe.

⁴⁶ Ndu ọhogu anyi l'ophu bẹ sawaru ọnu galaba epfubyishi anyi.

⁴⁷ Ndzụ-agụgu bẹ rwutawaru anyi; a gbabẹwaru anyi ọ́nyà. Mkpurupyata yẹe ọla-l'iswi dapfutawaa anyi.

⁴⁸ Ẹnya-mini, asọe mu phọ gborogboro l'ẹnya gẹ mini nggele; Kẹle ndibe mu bẹ e meru umerekete.

⁴⁹ Ẹnya-mini ta abyadụ asọshi-buhu mu l'ẹnya; mbụ l'ọonodujeepho asọ mu mkpụrumkpuru;

⁵⁰ jasụ teke Chipfu a-gbẹ l'imigwe lee ẹnya l'alị hụma mu.

⁵¹ Iphe, ẹnya mu ahụma meru aphụ ji mu obu. Ọ bụru k'ụnwada mkpụkpu mu ono bẹ kparụ iya nụ.

⁵² Ndu ọhogu mu anọduje achị nta mu g'onye achị nta ẹnu l'ẹbe abụ l'o nweru iphe, mu meru phẹ.

⁵³ Ẹphe nwuru mu ye l'ime nsụ g'ee-shi g'ẹphe wota ndzụ mu. Ẹphe nọdu atụ mu mkpuma.

⁵⁴ Mini rikputeru mu ishi; mu rịa lẹ mu chịhuwaru.

⁵⁵ Ọ bụru l'ime wukirima nsụ ono bẹ mu nọ raku gụbe Chipfu.

⁵⁶ Ị nụmawaru arwọrwo, mu rwọru ngu sụ: Ba gbakwa mu nkụchi l'araku ono, mu rakuru ngu g'ị gbaaru mu mkpu ono.

⁵⁷ Ị kpịritaru mu ntse teke mu rakuru ngu ono. Ị sụ gẹ mu ba tsụshi ebvu.

⁵⁸ Gụbe Nnajịuphu; ọ kwa ngu leru ẹnya l'opfu ẹhu mu; bya agbafụta ndzụ mu.

⁵⁹ Gụbe Chipfu; ị hụmawaru-a ẹjo-iphe, e meru mu; hanaaru mu enge!

⁶⁰ Ị hụmawaru g'ẹphe gwataberu mu ụgwo iphe, mu meru; mẹkwapho ẹjo-idzu, ẹphe achịkotaru mu.

⁶¹ Gụbe Chipfu; ị nụmawaru-a g'ẹphe epfubyishi mu; mẹkwapho ẹjo-idzu, ẹphe achịkotaru mu.

⁶² Mbọku-mbọku bẹ ndu ono, etso mu opfu ono; anọdujeepho agba mu mgbamu; bya achịru mu ẹjo-idzu.

⁶³ Lewa phẹ rọ ẹnya! Ẹphe -nọdu anọo; ọzoo l'ẹphe pfụru apfụru; bẹ ẹphe egudejeẹ mu phọ agụ l'ebvu;

⁶⁴ “Gụbe Chipfu; pfụkwaa phẹ ụgwo, gbaru phẹ nụ; mbụ ẹgube ono iphe, ẹphe meru dụ.

⁶⁵ Kpọ-chikwaa phẹ obu akpọ-chi; G'ẹphe bụkwaru ndu ị tụru ọnu.

⁶⁶ Gudekwa ẹhu-eghu chịpyabe phẹ; woru phẹ mebyishia lẹ mkpula igwe kẹ Chipfu.”