Ebvu Aphụ 2 - BAYỊBURU Izii

Ikpe Chipfu

¹ Lenu gẹ Nnajịuphu gude urwukpu, shi l'ẹhu-eghu iya sọ-kpute nwada Zayọnu. Ọdu-biribiri ndu Ízurẹlu ono, e shiwaa wolia o jerwuwa l'imigwe ono bẹ ọ kwadawarụ l'alị. Mbọku ono, ẹhu eghu iya eghu ono bẹ ọ tọ nyatadụru ẹka ọotu-kobeje ọkpa ono.

² Nnajịuphu bẹ taswịberu obu tụko ẹka Jiékọpu bu mee umerekete; ọphu ọ tọ phụduru iya obu-imemini. Ọo oke ẹhu-eghu iya bẹ o gude tsukpọshichaa ẹka nwada Jiuda kpụshichaaru ike. Ọ kwatsuwaru alị-eze iya; mẹ ndu nọ l'aba-eze iya; shi nno meru ujikputeru tụ phẹ.

³ O gude g'ẹhu-eghu iya enwu phuruphuru nashịchaa Ízurẹlu ike, o nweru enweru g'ọ ha. O sephuru ẹkutara iya azụ lẹ teke ono, ndu ọhogu phẹ abyarwutawa. O tsupyashịru Jiékọpu g'ọku, enwu enwunwu; mbụ g'ọku, atụkoje iphe, nọ iya mgburugburu tsukọta.

⁴ O setawaru apfụ iya g'onye ọhogu. O gudewaa ẹkutara iya seta iya kẹ jịjiji g'onye ọhogu. Iphe, bụ ndu ono, dụ ùbvù l'ẹnya bẹ ọ tụkowa gbushia. Ọ bụru l'ụlo-ẹkwa nwada Zayọnu bẹ ọ vọtaru oke ẹhu-eghu iya kpukposhi g'ọku.

⁵ Nnajịuphu bẹ dụwaa g'ọhogu. O mewaru Ízurẹlu umerekete. O mebyishikọtawaru ụlo ibe-eze iya g'ọ ha; bya emebyishikọtawa ẹka a kpụkotaru o shihuchaa ike. Nggụmaphu; waa ẹkwa-aphụ bẹ o mewaru ọ kabaa shii l'ẹhu nwada Jiuda.

⁶ O gudewaa ẹhuka phọkashia ẹka o bu g'onye phọkashiru mgbabu; bya emebyishiwa ẹka ono, ẹphe edzukọbeje ono. Chipfu bẹ mewaru gẹ Zayọnu zọhachaa ọbo-iphe, nwegbaarụ teke abọje iya; mẹkwapho eswe-atụta-unme iya. O gudewaa g'ẹhu-eghu iya, enwube phuruphuru ọphu ọ tọ gụbeeduru onye eze; waa onye uke iphe.

⁷ Nnajịuphu bẹ jịkawaru ọru-ngwẹja iya. Ọ pawaru ụlo iya, dụ nsọ haa. O wowaru ibe eze, dụkota lẹ Jiuda ye ndu ọhogu l'ẹka. Ẹphe nọdu l'ime ụlo Chipfu tụa rwụrwurwu g'ọ bụ mbọku, ọbo-iphe.

⁸ Chipfu bẹ pfuwaru iya hoo haa sụ l'oo-tsukpọshikota igbulọ, e gude kpụ-pheta nwada Zayọnu mgburugburu. Ọ kpabuwaru iya oke. Ọphu o sephuduru ẹka azụ; haa ya emebyishi. O mewaru g'ẹka a kpụshiru ike; waa igbulọ raa ẹkwa aphụ. Ẹphe tụko g'ẹphe ha yifukọta.

⁹ Ọnu-ọguzo iya bẹ mibachawaru emiba l'ime alị. Mgbo-ígwè iya bẹ ọ nyakwoshichawaru anyakwoshi bya eworu iya mebyishia. Onye eze iya; mẹ ndu-ishi iya bẹ lakọtawaru ọhozo je eburu. Ọphu ọ dụedu ekemu, nọ swiru phẹ nụ. Ọphu ndu mpfuchiru iya l'ophu aphụjeedu ọphulenya, shi Chipfu l'ẹka.

¹⁰ Iphe, bụ ndu bụ ọgerenya nwada Zayọnu bẹ gwọdoshihuchawaru l'alị; tụko nọdugbaa kpọyoo. Ẹphe chịtawaru uwe-aphụ yegbaa; bya ekpota urwuku kpube onwophẹ l'ishi; Ụnwumgboko Jierúsalẹmu bẹ kpubewaru iphu l'alị.

¹¹ Mu kwawaru ẹkwa; ẹnya dụchawaa mu ragaraga. Mu nọkwa l'oke iphe-ẹhuka; meji nọdu akụfu mu akụfu. Iphe, kparụ iya nụ bụ lẹ ndibe mu bẹ e meru ẹphe bụru mkpurupyata. Ụnwegirima nshịi; mẹ ndu e he l'ẹka bẹ mba tụshiru l'ọma gbororo mkpụkpu.

¹² Ọ bụru gẹ mba atụshiwa phẹ gẹ ndu e merwuru ẹhu l'ọma gbororo mkpụkpu ono; mbụ teke ndzụ phẹ eyifuwa eyifu l'ụtapfu ne phẹ; bẹ ẹphe tụko arakugbaa ne phẹ asụje: “?Dẹnu nri, anyi e-ri? ?Dẹnu mẹe, anyi a-ngu?”

¹³ ?Bụ gụnu bẹ mu e-pfuru ngu? ?Bụ gụnu bẹ mu a-tụru ngu yeru gụbe nwada, yẹe nwoke teke akwaswee ono, bụ Jierúsalẹmu? ?Bụ gụnu bẹ mu a-sụ l'ị dụ g'ọo ya; k'ọphu mu a-dụ ngu obu? Ọ́nyá, tụkoru ngu ẹhu bẹ aba kẹ yoyoyo g'eze-ẹnyimu; ?Bụ onye bẹ e-me g'i wekọrohu?

¹⁴ Ọphulenya, ndu mpfuchiru ngu phụru ngu bẹ bụ ụka bẹ ẹphe dzụru ngu bya abụkotaru iphe éswè. Ẹphe te kpuhaduru ẹjo-iphe, i meshiru goshi ngu; k'ọphu e gege aha ngu akpụ lẹ ndzụ. Iphe, ẹphe phụru ngu l'ọphulenya bẹ bụ ụka; Tẹme ọ bụru iphe, dusweru ngu ụzo.

¹⁵ Iphe, bụ ndu aghata aghata bẹ akụje ẹka kpua ngu. Ẹphe aphụje okpurọswa; pheeru nwada Jierúsalẹmu ishi kpakakpaka sụ: “?Bụ mkpụkpu-a, e shi ekuje ‘nwọma-mma-a’ baa; mbụ ‘ẹhu-ụtso ụnwu-eliphe l'ophu ono?’ ”

¹⁶ Ndu ọhogu ngu l'ophu bẹ sawaru ọnu galaba kwabẹru ngu. Ẹphe aphụgbaa okpurọswa; bya ata ikireze asụje: “Anyi lwewaru iya! Ọo ntanụ-a bẹ anyi shi ele ẹnya iya ono. Nta-a bẹ anyi nọwa ndzụ; hụma iya l'ẹnya.”

¹⁷ Chipfu bẹ mewaru iphe, ọ tụberu ememe. O mewaru iphe ono, o pfuru ono, bụ iphe ono, ọ tụ-buhawaru teke dụ ẹnya ono. Ọ kwatsuwaru ngu; ọphu ọ tọ phụduru ngu obu-imemini. O mewaru g'ọhogu ngu tụru okoo kpua ngu; bya emewaa g'ọkpehu kabaa adụ ndu ị dụ ashị.

¹⁸ Obu phẹ bẹ arakugbawa Nnajịuphu; Gụbe igbulọ, nọ-pheru nwada Zayọnu; g'ẹnya-mini shi ngu l'ẹnya sọnaa gborogboro g'ẹnyimu; eswe l'ẹnyashi! Ta adụkwa teke ịi-tụta unme; ọphu ọ dụkwa teke ẹnya a-nwụ-buhu ngu gbụgbugbu.

¹⁹ Gbalihu chia mkpu ẹkwa l'ẹnyashi; mbụ lẹ ẹgube teke ono, nche abalị awatajẹ ono! Gụha obu ngu wụshiaru Nnajịuphu g'onye wụshiru mini. Chilia ẹka ngu imeli raku iya l'opfu ẹhu ụnwegirima ngu, bụ ndu mba l'atụgbaa l'ishi mkpụkpu; kẹle ẹgu, eeme phẹ.

²⁰ Gụbe Chipfu; lenaa ẹnya hụmadupho. ?Bụ onye bẹ i mejewaru ẹgube-a? ?Bụ g'ụnwanyi taahaa anụ ụnwegirima phẹ; mbụ ụnwegirima, angụkwadu phẹ ẹra? ?Bụ g'e gbushiaha ndu-uke; mẹ ndu mpfuchiru l'ụlo-nsọ kẹ Nnajịuphu?

²¹ Ẹgirima mẹ ọgerenya bẹ tụkoru dabyigbaaru l'alị l'ọma etsuzọ. Unwokoro me ụnwumgboko mu phẹ bẹ e gudewaa ogu-echi gbukọta. Ọo mbọku, ẹhu eghu ngu eghu bẹ i gbushiru phẹ. I gbushiru phẹ; ọphu ị tị phụduru phẹ obu-imemini.

²² Ọo g'eekukọbeje k'ọbo-iphe-a; bụ g'i kukọberu ndzụ-agụgu g'ẹphe swiphe mu mgburugburu. Lẹ mbọku ono, ẹhu eghu Chipfu eghu ono bẹ ọ tọ dụdu onye nahụru nụ; ọphu ọ dụdu onye phọduru nụ. Iphe, bụ ndu mu heru hefuta bẹ ndu ọhogu mu sarụ ọsampfu.