Ditoronomi 33 - BAYỊBURU Izii

Mósisu agọ ọnu-ọma anụ ọkpa-ipfu Ízurẹlu

¹ Ọwaa bụ ọnu-ọma, onye kẹ Chileke, bụ Mósisu gọru nụ ụnwu Ízurẹlu tẹme ọ nwụhu.

² Ọ sụru: “Chipfu shi l'úbvú úbvú Sayịnayi bya. Mbụ-a; ọ gbẹ l'ụzo alị Siye nwuaru phẹ kẹ phoo gẹ nchi-abọhu. Ọ gbẹ l'úbvú Paranu echiru phẹ kẹ swachaswacha; chịru ụnubuku ndu dụ nsọ abya; bya aparu ọku, enwu enwunwu l'ẹkutara.

³ Sụ-a; ndiphe bẹ o yeru obu; mbụ l'iphe, bụ ndu dụ nsọ nọkota iya l'ẹka. Ẹphe nọdu adajẹ kpurumu lẹ mgboru ọkpa iya; phozeta baarụ iya ẹja. Ọ bụru iphe, o pfuru bẹ ẹphe emeje.

⁴ Mósisu tụru ekemu doberu anyi; ọ bụru okiphe k'oshilọkpa Jiékọpu l'ophu.

⁵ Chipfu bụru eze ndu Jieshurunu teke ono, ndu-ishi lẹ Ízurẹlu; ẹphe l'ọkpa-ipfu ndu Ízurẹlu l'ẹhu l'ẹhu dzukoru ono.

⁶ Gẹ ndzụ bụkwaru k'ọkpa-ipfu Rúbẹnu! G'ọ tọ chịhukwa; ọphu awa iya epehukwa!”

⁷ Ọwaa bụ iphe, o pfuru l'ẹhu ọkpa-ipfu Jiuda: “Jiko Chipfu; nụmajekwa olu ndu Jiuda! Dutakwa phẹ dupfuta ndu nkephẹ; l'i mee g'ẹka shihuje phẹ ike l'ọgu! Jiko yejenuru phẹ ẹka g'ẹphe lwụ-kpee ndu ọhogu phẹ!”

⁸ Ọkpa-ipfu Lívayi bẹ o pfuru nkephẹ; sụ: “Gụbe Chipfu; menaa g'ọkpa-ipfu Lívayi tụjeru ngu ido, bụ iya bụ tumimu yẹe urimu ngu; gudeje maru iphe, bụ obu ngu; mbụ ndu ị hụru ama lẹ Masa; tẹme gụ l'ẹphe see opfu l'agụga mini Meriba.

⁹ Ọo phẹ pfuru kẹ nna phẹ; yẹe kẹ ne phẹ; sụ l'ẹphe ta akpadu phẹ ishi. Ẹphe mịa ụnwu, ẹphe nwụru anwụnwu ẹnya; mịkwaapho unwune phẹ ẹnya. Obenu l'ẹphe letaru ẹnya mee opfu ngu; bya eletakwaphọ ọgbandzu ngu ẹnya.

¹⁰ Ọ bụ phẹ e-zije ndibe Jiékọpu iphe, ị sụru g'e meje. Ẹphe ezia ndu Ízurẹlu iphe, ị tụru l'ekemu. Ọ bụru phẹ e-dobejeru ngu ụ̀nwù-isẹnsu; bụru phẹ e-dobeje ngwẹja-akpọ-ọku l'ọru-ngwẹja ngu.

¹¹ Jiko Chipfu; gọru ọnu-ọma ye l'akanya, oose! Jiko g'ozi, o gude ẹka iya jee dụjekwa ngu ree! Ndu ono, wụ-lihuru etso iya opfu ono; mẹ ndu ono, kpọru iya ashị ono; nyakashinaa phẹ ọkpu-nka; k'ọphu ẹphe ta adụbaedu ike egbeli ishi ọzo!”

¹² Ọkpa-ipfu Benjiaminu bẹ o pfuru nkiya; sụ: “Onye Chipfu yeru obu l'a-nọdu nọ-kube iya; tụsaru ẹhu. Ọ bụru Chipfu anọduje egbobuta iya eswe l'ẹnyashi. Ọ bụru l'echi ọkpoma Chipfu bẹ ọo-nmakojeru.”

¹³ Ọkpa-ipfu Jiósẹfu bẹ o pfuru nkiya; sụ: “G'alị iya bụkwaru alị, Chipfu gọru ọnu-ọma nụ. G'ọ kwajẹru phẹ ẹguru iji, shi l'imigwe; l'ọ nwụru phẹ mini ime alị shọkoshoko.

¹⁴ G'ẹnyanwu mekwaa g'ẹguru akpụru-iphe, ọ kọberu l'alị mehuru iya! G'iphe, e meberu l'alị byaru iya gbụkugbuku l'ọnwa l'ọnwa!

¹⁵ G'a nụkwa iya iphe, kachakpọo ree, shi l'úbvú úbvú ndiche ono; yẹe ẹguru iphe, shigbaa lẹ nwa-obvù ojejoje onoya!

¹⁶ G'e gudekwa iphe, kachaa ree, jiru eliphe kebe iya l'ọma! Gẹ Jiósẹfu tụbakwa onye ono l'ẹnya; mbụ onye ono, nọ l'irwu nwoshi ono, enwu ọku ono! G'iphemiphe-a bụkotakwaru kẹ Jiósẹfu; onye bụ onye-ishi l'echilabọ unwune iya.

¹⁷ Ọ dụ akpabiri g'oke-eswi, vu ụzo l'ẹpho ne iya. Mpu iya dụ gẹ k'atsụ. Ọ bụru mpu iya ono bẹ oo-gude adụ-tsushi ọhamoha l'ophu; mbụ je akpaa lẹ ndu bu l'ẹka igwe beru alị beru. Nokwaphọ g'ụnubuku oshilọkpa Ifuremu dụ; bya abụkwarupho nno bụ g'agụta agụta oshilọkpa Manásẹ dụ.”

¹⁸ Ọkpa-ipfu Zebulọnu bẹ o pfuru nkiya; sụ: “G'ẹhu tsọje ngu ụtso; Zebulọnu; teke ịilufu alụfu. G'ẹhu tsọkwa ngu phọ; Isaka; mẹ ị nọdu l'ibe ngu.

¹⁹ Ẹphe e-ku ndiphe g'ẹphe dzukọo l'úbvú. Ẹphe anọdu l'úbvú ono gwee ngwẹja l'ụzo, pfụru ọto. Ọ bụru iphe-ọma, kụru l'eze-ẹnyimu; waa ẹku, domigbaaru onwiya l'alị-evevee bẹ ẹphe e-gude buru.”

²⁰ Ọkpa-ipfu Gadu bẹ o pfuru nkiya; sụ: “G'ajaja bụru k'onye meru g'alị Gadu jaa àjàjà. Ipfu Gadu tọkpoepho nwẹhu zẹ; kụpyabe ishi g'oduma. Iphemiphe, ọ hụmaru bẹ oozijashịje ẹka; zijashịa ya ishi.

²¹ Ọ họtaru alị, kakọta ree doberu onwiya; kẹle ọ bụ ẹka oke alị kẹ ndu-ishi ndu ojọgu nọ bẹ ndu-ishi ndu Ízurẹlu edzukobeje; mee iphe, pfụru ọto l'ẹnya Chipfu; bya edobe iphe, ọ sụru g'e meje.”

²² Ọkpa-ipfu Danu bẹ o pfuru nkiya; sụ: “Danu bụkwa nwa oduma, shi lẹ Beshanu apfụ shọoshoo eje abya.”

²³ Ọkpa-ipfu Nafụtali bẹ o pfuru nkiya; sụ: “Nafụtali bẹ tụbaakwaru Chipfu l'ẹnya. Tẹme ọnu-ọma Chipfu bụkwarupho nkiya. Oke alị iya bẹ shi l'ụzo eze-ẹnyimu Gálili; je akpaa l'ụzo ndọhali.”

²⁴ Ọkpa-ipfu Asha bẹ o pfuru nkiya; sụ: “G'ọnu-ọma ụnwu kẹ Asha kakọta k'ụnwegirima ọzo shii. G'ọ tụbakwa unwune iya l'ẹnya. G'ọkpa iya dekwaru ederu lẹ manụ.

²⁵ G'iphe, ii-gudeje gụ-chia ọguzo ngu bụkwaru ígwè; yẹe onyirubvu. Ike ngu; yẹe ujiku ole, ịi-nọ a-haẹrupho ẹnya nhamụnha.

²⁶ Ọ tọ dụkwa onye dụ gẹ Chileke kẹ Jieshurunu; onye aghajajẹ akpaminigwe ẹbo bya eyeru unu ẹka; tẹme ọ nọdu adụje akpabiri l'ẹka ọogha l'urwukpu.

²⁷ Ọ kwa Chiojejoje bụ onye ịi-nọduje l'ime iya eze ndzụ. Ọ bụru oshi-ẹka ojejoje iya ono bẹ ọodeje ngu lẹ mkpula; kuta; heru eheru. Ọ nọdu achịfuje ndu ọhogu ngu l'atatiphu ngu; sụ ngu: ‘Ngwa; tụko phẹ gbushia!’

²⁸ Ọo ya bụ lẹ ndu Ízurẹlu e-buru; tụsaru ẹhu; ọ tọ dụdu iphe, byaru eme phẹ nụ. Mbụ l'eri Jiékọpu e-buru mbvulẹhu phẹ l'alị, ereshi yẹe mẹe dụ. Tẹme igwe akwaaru phẹ iya iji.

²⁹ Ẹhutso bẹ a gọru nụ unubẹ ndu Ízurẹlu. ?Bụ onye dụ g'unu; unubẹ ndu Chipfu dzọtaru? Ọo yẹbedua bụ onye egbobutaje unu; bya abụru onye eyejeru unu ẹka. Ọ bụkwarupho yẹbedua bụ ogu-echi, unu gude eku onwunu. Ndu ọhogu unu e-gude ndzụ-agụgu byapfuta unu; unu azọpyashia ẹka ẹphe agwajẹ iphe azọpyashi.”