Ditoronomi 32 - BAYỊBURU Izii

¹ Gụbe igwe; ngabẹru mu nchị gẹ mu pfua opfu! Gụbe alị; nụmakwa opfu, shi mu l'ọnu!

² G'iphe, mu ezi dzekwaa gẹ mini. G'opfu, shi mu l'ọnu kwakwaa g'iji. G'o dzekwaa gẹ mini, alwa yẹgeyege l'irwu ẹswa; mbụ g'o dzekwaa g'oke mini, alwa wọowoowoo l'eli irwu oshi.

³ Mu a-rakwa ẹpha Chipfu arara. Unu janaa ẹpha Chileke anyi ono ajaja; kẹle ọ parụ ẹka!

⁴ Ọ bụ iya bụ oke mkpuma ono! Iphemiphe, oome nọdu adụebeje ree; tẹme ụzo iya pfụkotaru nhamụnha. Ọ bụ Chileke, apfụshije ike l'iphe, o pfuru; ọphu ọ dụdu iphe, apfụduru-ọto, oomeje. Ọ pfụberekoto; tẹme obu gụa ya ìphóró.

⁵ Ẹphe watawarụ eme ẹjo umere, rehuru erehu l'ẹka ọ nọ. Mbụ lẹ ntụcha, dụ phẹ l'ẹhu meakwaru; ọphu ẹphe abụedu ụnwu iya. Ẹphe bụru ọgbo, menụkaru ẹjo-iphe; mbụ ọgbo, ụzo phẹ gberu nggọ.

⁶ ?Bụ ẹgube iphe-a bẹ unu gude apfụ Chipfu ụgwo; unubẹ ndu-a, bụ ndu eswe; bya abụru ndu amadụ iphe-a? ?Tọbudu iya bụ nna unu; bya abụru onye meru unu? Mbụ-a; ?tọ bụdu iya meru unu g'unu a-dụ; bya emee; unu ngụru angụru?

⁷ Unu nyatakwa teke k'ichee! Unu arịa ọriri nyata ọgbo, ghatawaru nụ! Unu jịa nna unu g'ẹphe kọoru iya unu! Unu ajịkwaa ya phọ ndu bụ ọgerenya unu; g'ẹphe kọkwaaru iya phọ unu!

⁸ Teke Ọkalibe-kakọta-shii hẹru ọhamoha okiphe phẹ; mbụ teke o kekashịru ụnwu-eliphe; bẹ ọ tụ-bugbaaru ụnwu-eliphe oke ẹka ẹphe e-jeberu l'ẹhu l'ẹhu; g'ụnwu Ízurẹlu habe l'ọtu;

⁹ kẹle okiphe Chipfu bụ ndibe iya; mbụ l'ọo ndu Jiékọpu bụ okiphe ọphu ọ họtaru.

¹⁰ Ọo l'echiẹgu bẹ ọ chọru phẹ chọta; mbụ l'ọo l'alị, dabyiru mgbegere ẹka aanụgbaa njọ ọ́rà; bẹ ọ nọ-pheru phẹ mgburugburu; eleta phẹ ẹnya. Ọ nwụberu phẹ ẹnya g'aanwụbejeru akpụru ẹnya ojii-a.

¹¹ Ọo ẹgube ono, ugo anọduje ephephe ẹpfune iya; erwuphe l'eli ụnwu iya-a; mbụ ẹgube ono, ọosashije ǹkù iya pakọo ụnwu iya; mbụ parụ phẹ l'igburọnu ǹkù iya;

¹² bụ gẹ Chipfu nwẹkinyi iya duru phẹ; ọphu ọ dụdu agwa ndu ọhozo, yeru iya ẹka.

¹³ O doberu phẹ l'ẹka ha l'eli lẹ mgboko; g'ẹphe bụru ishi. Ọ bụru akpụru-iphe, mịru l'ẹgu bẹ ẹphe riru. O mekwaaphọ; ẹphe ria manụ-ẹnwu, shi lẹ mkpuma; yẹe manụ, shi l'alị, dụ epfu epfu.

¹⁴ Manụ ẹra-eswi; yẹe mini-ẹra atụru; waa nwatụru, tsụru ẹba; yẹe ebili; waa iphe-edobe, shi l'alị Beshanu; yẹe eghu; waa ọkpobe witi bẹ o gudekwaphọ zụ-jia phẹ ẹpho. Tẹme ẹphe ngụkwaapho mẹe uswe-uswe, shi l'akpụru vayịnu.

¹⁵ Ọle Jieshurunu datachaẹrupho okporokpo; o kwefu ike. Ọ daru okporokpo; bya adụwa bọgili-bọgili. Ọ tsụwaru onwiya ẹba; tẹme ọ gbẹ teke ono bya ajịka Chileke, meru iya nụ. Ọ bụru oke mkpuma ono, dzọtaru iya nụ ono bẹ o gude weaha gbẹgele-gbẹgele.

¹⁶ Ẹphe shi nno kpata; o koaharụ phẹ okophoo k'agwa ndu ọhozo ẹphe jetaru dobegba. Ọ bụru ahụma ahụma ono, ẹphe eme ono bẹ ẹphe gude mee; ẹhu ghuahaa ya eghu.

¹⁷ Ẹphe watarụ egwe ngwẹja nụ ọbvu, abụdu Chileke; mbụ agwa, ẹphe amajẹduru; agwa ọ̀phúú, bụa mgboru nta-a bẹ ọ fụtaru; agwa, nna unu oche phẹ atsụjeduru ebvu.

¹⁸ Ọ kwa oke mkpuma ono, zụfutaru unu ono bẹ unu gbakụtaru azụ; mbụ l'ọo Chileke ono, bụ onye nwụru unu ono bẹ unu zọharu.

¹⁹ Tọbudu iya bụ; Chipfu bya ahụma iphe ono, ẹphe eme ono; bya asọaha phẹ oyi; noo kẹle ụnwu iya nwoke; mẹ kẹ nwanyị bẹ kpatsuru iya ẹhu-eghu.

²⁰ Ọ sụ: “Mu e-wofu phẹ ẹnya; gẹ mu hụmaeshikwa iphe, ẹphe e-mechaa bụru. Noo kẹle ẹphe bụ ọgbo, ụzo phẹ gberu nggọ; mbụ ụnwegirima, ta apfụshijedu ike l'iphe, ẹphe pfuru.

²¹ Ẹphe gude iphe, abụdu Chileke eme gẹ mu wata eko okophoo; gude ụnwu agwa, bụchaa iphe-mmanụ akpatsu mu ẹhu-eghu. Mu e-gudekwanụ ọha, abụdu ọkpobe ọha meru okophoo ye phẹ l'ẹhu; gude ọha, eme eswe kpatsu phẹ ẹhu-eghu;

²² kẹle oke ẹhu-eghu mu bẹ gbanwuhuwaru ọku; ọku ọbu jee eke gbiriri jasụ l'o kerwua ime ime alị-maa. Ọo-kekọta mgboko; yẹe iphe, a kpatarụ dobe iya; l'o woru ọku tụa l'ẹka úbvú futaru.

²³ Mu a-tụpyabe phẹ iphe-ẹhuka. Ọ bụru phẹ bẹ mu a-nọdu awụ apfụ mu l'ẹhu.

²⁴ Mu e-me g'ẹjo ọkpa-nri byapfuta phẹ; l'o mee g'ẹphe korofu ẹnya. Mu emee; okpomọku erebushi phẹ anụ; ẹjo iphe-ememe, atụko phẹ gbushia. Mu e-me g'ẹjo anụ-ẹgbudu gude ẹpyii-eze bya atajashịa phẹ; ẹjo agwọ, awụ l'alị, atagbushia phẹ l'ẹru.

²⁵ Ogu-echi bẹ ee-gude egbu phẹ pyaapyaa l'etezi. Ndzụ-agụgu anma phẹ ẹhu godagoda l'ime ụlo. Ụnwokorobya; mẹ ụnwumgboko; mẹ ụnwegirima nshịi; mẹ ndu ẹwó befuru l'ishi atụko bụru mkpurupyata.

²⁶ Mu shi sụ lẹ mu achịkashi phẹ; ẹphe edzuru ẹkameka; bya emee g'a ta nyatabahẹ phẹ l'eliphe.

²⁷ Obenu l'ọo ẹjo opfu ndu ọhogu phẹ bẹ mu ezeru; mbụ; a -nọnyakwa; ndu ọhogu phẹ pfua iphe, abụdu ire-lanụ. G'ẹphe ta anọnya wata epfu sụ: ‘L'ọ kwa ẹphebedua gude ẹka phẹ lwụ-kpe phẹ; l'ọ tọ bụebekwa Chipfu meẹberu iphemiphe ono!’ ”

²⁸ Sụ-a; ndu Ízurẹlu bụkwa ọha, egomunggo swehuru. Ọ tọ dụkpodaa iphe, edoje phẹ ẹnya mẹ nanụ.

²⁹ Ọme l'ọ dụru mmamiphe, dụ phẹ l'ẹhu; mẹ iphe-a edokwa phẹ ẹnya. Mbụ m'ẹphe amakwaru-a g'o mechaa nwụaru phẹ teke ikpazụ.

³⁰ ?Dẹnu g'onye lanụ e-shi chịa ụnu ụmadzu labọ l'ụmadzu ụkporo iri ọso? Mbụ-a; ?dẹnu g'ụmadzu labọ e-shi chịa ụnu ụmadzu ise ọso g'ẹphe gbala; gbahaa l'onye ono, bụ Agbara-mkpuma phẹ ono bẹ gbahawaru phẹ ẹka; mbụ lẹ Chipfu mịwaru phẹ ẹnya?

³¹ Kẹle mkpuma nkephẹ ta adụdu gẹ Agbara-mkpuma k'anyi. Ndu ọhogu anyi makwarụ-a l'ọo g'ọ dụ bụ ono.

³² Vayịnu nkephẹ shi lẹ vayịnu kẹ ndu Sọdomu. Ọ bụru l'ẹgu ndu Gọmóra bẹ akpụru vayịnu phẹ shi. Akpụru vayịnu phẹ nọdu egbu egbugbu. Itoto iya nọdu atsọkota ilu.

³³ Mẹe phẹ bụkwa obire ẹjo agwọ; tẹme ọ bụru ẹjo ọnu-mini, shi óghù l'ọnu.

³⁴ “Mu woru iphemiphe ono kwakọbe ree; mbụ lẹ mu kwachiwaru iya l'ẹka mu doberu ẹku, mu nweru enweru.

³⁵ Ọ kwa mbẹdua nwe emelata. Ọo mbẹdua a-pfụ phẹ ụgwo phẹ. O -beẹpho teke ono bẹ ọkpa e-chifu phẹ. Mbụ lẹ mbọku, ẹphe a-bụru mkpurupyata nọakwa ntse. Ọla-l'iswi gudeakwa ọso achị phẹ kpabẹ kpabẹ.”

³⁶ Ọ kwa Chipfu a-harụ ndibe iya enge. Ọ bụru iya a-phụru ndu-ozi iya obu-imemini; mẹ ọ -hụmaepho l'ike ta adụedu phẹ mẹ nanụ; mbụ l'ọ tọ dụedu onye ghuduru nụ: ohu mẹ amadụ.

³⁷ Ọo-sụ phẹ: “?Dẹnu agwa phẹ ọbu; mbụ mkpuma phẹ ono, ẹphe agbabajẹ je anọdu eze ndzụ?

³⁸ Mbụ agwa, atajẹ ẹ̀bà anụ ngwẹja phẹ; bya angụa mẹe ngwẹja phẹ ono. G'ọ gbẹshinu bya eyeru unu ẹka! G'ọ gbobutanu unu!

³⁹ Unu hụmakwa; ọ kwa mbẹdua kpoloko bụ Chileke! Ọ tọ dụekwa Chileke ọzo, dụ nụ; gbahaa mbẹdua. Ọ kwa mbẹdua emeje g'a nwụhu; tẹme mu nọdu emeje g'a nọdu ndzụ. Ọo mbẹdua emekajẹ iphe; ọ bụru mu emeje g'e wekọrohu; ọphu ọ dụdu onye adụ ike anafụ mu onye mu guderu.

⁴⁰ Mu paliru ẹka mu mabẹ l'imigwe ria angụ sụ: Ọo gẹ mu bụ onye a-nọ ndzụ jasụ l'ojejoje-a bụ gẹ mu epfu sụ:

⁴¹ Mu -baẹpho ogu-echi mu ono, egbu nwịinwii ono ababa; bya aparu iya l'ẹka; gude kpeahaa ikpe; bẹ mu e-melata ndu ọhogu mu; mbụ pfụa ndu kpọru mu ashị ụgwo.

⁴² Mu e-me gẹ mee nemadzụ ngụguchaa apfụ mu angụgu; mbụ mee ndu e gburu egbugbu; waa ndu a kpụru lẹ ndzụ. Tẹme ogu-echi mu asụa nemadzụ pyaapyaa; gbushia ishi ndu bụ ndu-ishi ndu ọhogu mu ono.”

⁴³ Unu tee ẹswa; unubẹ ọhamoha! G'unu lẹ ndibe Chileke tee ẹswa! Noo kẹle ọo-gwata ụgwo ishi ọchi ụnwu iya. Ndu ọhogu iya bẹ oo-melata ụgwo iphe, ẹphe eme iya. L'ọ pfụa ụgwo iphe-ẹji, ndu nkiya meru l'alị iya.

⁴⁴ Mósisu ẹphe lẹ Jioshuwa nwa Nunu swịru bata; bya agụkota ebvu ono; ndu Ízurẹlu l'ophu nụmakota.

⁴⁵ Tọbudu iya bụ; Mósisu pfuchaẹrupho ndu Ízurẹlu iphemiphe ono;

⁴⁶ bya asụkwa phẹ phọ: “Unu vukwaru opfu-a, mu rarụ unu arara ntanụ-a l'obu. Ọo ya bụ; g'unu ezia ụnwu unu g'ẹphe kwabẹ ẹnya mekọtaje iphemiphe, e deru l'ekemu-a.

⁴⁷ G'opfu-a ta abụkwaru unu opfu, enwedu ishi; kẹle ọ kwa ẹka ono bẹ ndzụ unu nọ. Ọ bụru iphemiphe ono e-me g'unu karịberu nka l'alị ono, unu adagha ẹnyimu Jiọ́danu eje alwụta nworu ono.”

Eepfu lẹ Mósisu a-nwụhu l'eli úbvú Nebo

⁴⁸ Noo ya bụ; Chipfu bya epfuru yeru Mósisu l'eswe mbọku ono gẹdegede sụ:

⁴⁹ “Nyihu úbvú-a, bụ úbvú úbvú Abarimu-a; mbụ úbvú Nebo, nọ l'alị Mówabu; bya anọdukwapho l'okotazụ mkpụkpu Jieriko; je ahụma alị Kénanu, bụ alị, mu abya anụ ndu Ízurẹlu g'ẹphe nworu.

⁵⁰ Ọo l'eli úbvú ono, ii-nyihu ono bẹ ịi-nọdu nwụhu lapfu ndiche ngu phẹ; ẹgube ono, nwune ngu, bụ Erọnu nwụhuru l'úbvú Họru; lapfu ndiche iya phẹ ono.

⁵¹ Iphe, a-kpa iya nụ bụru l'unu nọ l'echilabọ ndu Ízurẹlu lẹ mini Meriba kẹ Kadẹshi, nọ l'echiẹgu Zinu kwefuru mu ike; mbụ l'ọo l'unu te emeduru g'a maru gẹ mu dụ-be nsọ l'echilabọ ndu Ízurẹlu.

⁵² Ọo ya meru iphe, bụ ụzenya bẹ ịi-gbẹ hụma alị ono; ọle ị tịi bahụdu l'alị ọbu, mu a-nụ ndibe mu, bụ ndu Ízurẹlu ono.”