Azáya 54 - BAYỊBURU Izii

Obu, Chipfu yeru Jierúsalẹmu

¹ “Gụa ebvu; gụbe nwanyị, ta atsụdu ime! Mbụ gụbe onye teke ezedaswee nwa. Chikpọta ebvu! Rwua gerwugerwu; mbụ gụbe onye ono, ime teke emeswee ono; kẹle ụnwu gụbe nwanyị, dabyiru mgbegere a-kakwa shii eme l'ụnwu nwanyị alụ ji.” Nokwa iphe, Chipfu eepfu.

² Phọribekwaru ụlo-ẹkwa, i bu ebubu g'ọ ka ọsa! Mee g'ẹkwa, e gude mee ụlo ngu ọbu ha phalaphala; ba lọ-phukwa iya azụ! Mekwaa g'eri iya kabaa ogologo! Mekwaa g'abara iya kabaa angụru angụru!

³ Noo kẹle ii-mechaa jaa àjàjà buru laa l'ẹkutara buru laa l'ẹkicha. Awa ngu phẹ l'a-naphuchaa ọhamoha ono azụ; je ebuchishichaa mkpụkpu phẹ ono, bụgbaa ochobu ono.

⁴ Gẹ ndzụ ba agụkwa ngu! E tee mekwa ngu iphe-iphere. Gẹ ndzụ ba agụkwa ngu k'a nọnyaa e kpua ngu iphu lẹ ntụ! Kẹle a ta abyadụ eme ngu iphe-iphere. Ii-mecha zọhachaa iphere ono, meru ngu teke ị bụ ọgbolanu ono; ọphu ị byadu anyatabaa mkpatsu aphụ, dụ l'abụ onye ji iya nwụhuru;

⁵ kẹle ọo onye ono meru ngu nụ ono bụ ji, alụ ngu nụ. Chipfu, bụ Ọkalibe-Kakọta-Ike bụ ẹpha iya. Ọ kwa Onye nsọ kẹ ndu Ízurẹlu ono bụ onye gbatarụ ngu nụ. Iphe, eekuje iya bụ Chileke kẹ mgboko l'ophu.

⁶ “Kẹle Chipfu ono e-kuphu ngu azụ; g'ị bụ nwanyị, aalụ alụlu, a tọgboru mgbegere; ọphu obu adụdu iya ree; mbụ nwanyị, a lụru teke ọ bụ nwata; ji iya parụ iya haa.” Nokwa iphe, Chileke ngu epfu.

⁷ “Mu harụ ngu kpọo nwụpfu nwanshịi; ọle mu a-phụkwanuru ngu eze obu-imemini gude duphuta ngu azụ.

⁸ Ẹhu ghuru mu eghu nwanshịi. Mu woru iphu mu domiaru ngu kpọo nwụpfu nwanshịi. Obenu lẹ mu e-ye ngu obu ojejoje gude phụaru ngu obu-imemini.” Nokwa iphe, oopfu; mbụ Chipfu, bụkwapho onye agbafụtaje ngu.

⁹ “L'ẹhu nkemu bẹ ọwa-a dụkwaa gẹ teke kẹ Nuwa, bụ teke mu riru nte sụ l'utso, dụ teke ono taa dụbaedu lẹ mgboko ọzobaa. Nta-a bẹ mu riwaru nte sụ l'ẹhu tee ghubaẹdu mu eghu l'opfu ẹhu ngu; ọphu mu ababaẹduru ngu mba ọzo.

¹⁰ O -betakpọ úbvú l'ophu nmakọta jiijiijii; a pashịa obvu obvu, l'ẹka ẹphe nọgbaa; bẹ n-yemobu ojejoje ono, mu yeru ngu ono ta aphọngakwa aphọnga; ọphu ọgbandzu ẹhu-guu nkemu ono egbukahụkwa egbukahụ.” Nokwa iphe, oopfu; mbụ Chipfu ono, aphụru ngu obu-imemini ono.

¹¹ Gụbe mkpụkpu ono, eje iphe-ẹhuka ono, oke phẹrephere enwunga; ọphu ọ dụdu onye agbaru ngu mkpu; mu e-gude mkpuma, amashị mma ike kpụ-phu ngu azụ. Mu egude mkpuma sáfàyà tụ-phu ọkpa-ụlo igbulọ ngu azụ.

¹² Mu e-me g'eli igbulọ ngu ono g'ọ ha bụkotaru mkpuma rubi. Mu egude mkpuma, aphụ ngerengere, gude kpụa ọnu-abata ngu; gude mkpuma, vu oke aswa kpụkota igbulọ ngu l'ophu.

¹³ Ụnwegirima ngu g'ẹphe ha bụ mụbe Chipfu e-zi phẹ iphe l'onwomu. Tẹme ụnwu ngu bẹ ẹhu a-dụkpoo guu mebyi adụdu.

¹⁴ Ee-me g'ị ngụru angụru l'ụzo, pfụru ọto. Ọ tọ dụdu onye byaru eme ngu mmegbu; ọphu ọ dụdu iphe, byaru eme ngu g'ị tsụa ebvu. Ndzụ-agụgu bẹ ee-wofu l'ẹka ị nọ je edobe ụzenya; ọphu ọobyadu ngu ntse ililekpọo.

¹⁵ O -nweru onye tsoru ngu opfu; ọ tọ bụduru mu bẹ o shi l'ẹka. Onye etso ngu opfu bụ: o -mechaa l'o yeru ngu ẹka l'alị.

¹⁶ “Tii ledu; ọ kwa mbẹdua meru onye-ụ́zú ono, anmajẹ eko l'icheku jasụ l'o nwuhu ọku ono; gude iya kpụa ngwa ọgu l'ọ dụ k'egude alwụ ọgu. Tẹme ọ bụkwarupho mbẹdua meru onye mmebyi g'o mebyishia iphe.

¹⁷ Ọ tọ dụkwa iphe, a kpụru g'e gude meka ngu iphe, byaru evujeru ire. Tẹme iphe, bụkpoo onye ebo ngu ibo bẹ ire a-gwọje ẹji. Nokwa iphe, ndu-ozi kẹ mụbe Chipfu eketa l'ẹka mu. Tẹme ọ bụkwarupho ono bụ ọdzori; mu nọdu agbaru phẹ iya.” Nokwa iphe, Chipfu eepfu.