Azáya 52 - BAYỊBURU Izii

¹ Tehu etehu! Tehu etehu; gụbe Zayọnu! Yenaa onwongu ọkpehu g'uwe! Yenaa uwe ngu ono, emeje ngu g'ị dụ biribiri l'ẹnya onoya; gụbe Jierúsalẹmu, bụ mkpụkpu ono, dụ nsọ ono. Ndu ebuduru úbvù; ẹphe lẹ ndu ono, aasọ nsọ ono taa bahụbaekwa l'ime ngu ọzo baa.

² Gbalihu agbalihu! Jịshia urwuku, dụ ngu l'ẹhu! Nọdu anọo; gụbe Jierúsalẹmu! Tụkufu onwongu ẹgbirigba, a tụru ngu l'olu; gụbe ada Zayọnu ono, a kpụru lẹ ndzụ ono!

³ Wakwa iphe, Chipfu epfu baa: “E shi ree unu erere; ọphu a natadụru aswa unu. Nta-a bẹ e tee gudekwanụ okpoga agbata unu.”

⁴ Kẹle-a; wakwa iphe, Nnajịuphu, bụ Chipfu epfu: “Lẹ mbụ bẹ ndibe mu shi laa alị Ijiputu je eburu. Tẹme ndu Asiriya bụ-wokwadụa bẹ ẹphe shi emekpa phẹ ẹhu.”

⁵ Wakwa iphe, Chipfu ajị baa: “A -bya lẹ kẹ nta-a; ?ọwa-a bụhunu ole? Kẹle ndibe mu bẹ a kpụtaru kẹ mmanụ. Tẹme ndu-ishi phẹ gude phẹ eme iphe-ọchi.” Nokwa olu Chipfu. “Tẹme mkpụrumkpuru bẹ eepfubyishiẹpho ẹpha mu shi l'ụtsu jasụ nchi ejihu.

⁶ Ọo ya bụ lẹ ndibe mu a-maru ẹpha mu. Mbụ l'o -be mbọku ono bẹ ẹphe a-maru l'ọo mbẹdua pfuhawaru iya tẹme ọ nwụje. Ee! Ọo mbẹdua!”

⁷ Lenu g'ọoma l'eli úbvú ono; mbụ ọkpa ndu eje abya ezi ozi-ọma; ndu ezi ozi nchị-adụ-doo; ndu nzi, ẹphe gude abya dụ ree; ndu byaru ezi ozi kẹ ndzọta; ndu asụje Zayọnu-a: “Ọ kwa Chileke ngu bụ eze!”

⁸ Ngabẹkpodapho nchị! Ndu nche ngu wolikwaru olu phẹ ewoli. Ẹphe tụkoru erwu okwe; kẹle ẹphe e-gude ẹnya hụma Chipfu teke ọo-nọdu alwa Zayọnu.

⁹ Unu tụko wata ebvu ẹhu-ụtso mgbo lanụ; unubẹ mkpọkpo iphe, tụkoru lẹ Jierúsalẹmu; kẹle Chipfu dụwaru ndibe iya obu. Ọ gbatawaru Jierúsalẹmu.

¹⁰ Chipfu a-gbabẹ onwiya ẹka ọto l'iphu ọhamoha l'ophu; mbụ ẹka iya ono, dụ nsọ ono; k'ọphu aa-hụmachaa gẹ Chileke anyi e-gude dzọta ndibe iya jasụ l'ẹka igwe beru alị beru.

¹¹ Unu tụgbua! Unu tụgbua! Unu lụfu l'ẹka ono! Unu te edenyikwa ẹka l'iphe, aasọ nsọ! Unu shikwa l'ẹka ẹphe nọ fụta! Unu bụkwaru ndu dụebe ree; unubẹ ndu ono, apajẹru iphe kẹ Chipfu, bụgbaa iphe, dụgbaa iche iche!

¹² Ọle unu ta alakwa gburugburu; ọphu unu agbakwa phuphuphu ala; kẹle Chipfu e-vuru unu ụzo eje. Mbụ l'ọo Chileke kẹ ndu Ízurẹlu l'a-bụru onye e-kperu unu azụ.

Eje iphe-ẹhuka yẹle ọdu-biribiri k'onye-ozi Chipfu ono

¹³ “Lekwa; onye-ozi mu e-mekwa umere onye maru iphe. Aa-pali iya eli; wolia ya ephekerephe; shi nno kutsee ya.

¹⁴ G'o gude gbaa ụgbugba meru; ẹkpa-oyi nwụa ndu dụ igwerigwe l'ẹhu g'ẹphe hụmaru iya. Ọ gbachihucharu nchi ẹgube adụdu onye gbachihujewaru iya nụ; ọphu ọ dụkpodaa gẹ nemadzụ ililekpọo.

¹⁵ Nokwaphọ g'ọo-dụ-dzuru ọha, dụ igwerigwe biribiri. Mbụ lẹ ndu eze bẹ ọo-kpọ ọnu opfu; kẹle ẹphe a-hụma iphe, e pfuduru phẹ; tẹme iphe, ẹphe anụmajeduru edoo phẹ ẹnya.”