Azáya 2 - BAYỊBURU Izii

Ẹhu-guu ojejoje

¹ Ọwaa bụ ọphulenya, Azáya nwa Emọzu phụru l'ẹhu ndu Jiuda yẹe ndu Jierúsalẹmu.

² Sụ-a; o -rwua teke ikpazụ bẹ ee-me g'eli úbvú ono, a kpụru eze-ụlo Chipfu ono ngụru angụru; mee ya g'ọ bụru eze l'ẹka iphe, bụkpoo úbvú ọzo nọgbaa. Mbụ l'ee-me iya g'ọ kakọta úbvú ọzo l'eli. Noo teke ọhamoha a-nọdu awụ awụ-pfu iya.

³ Ikpoto nemadzụ a-bya bya asụ: “Unu bya g'anyi je l'eli úbvú kẹ Chipfu! Unu g'anyi je l'ụlo Chileke kẹ Jiékọpu! Ọo ya e-zi anyi ụzo iya; k'ọphu anyi a-wata etso ụzo, ọ tọru.” Noo kẹle ekemu e-shi l'úbvú Zayọnu fụta; mbụ l'opfu Chipfu e-shi lẹ mkpụkpu Jierúsalẹmu bya.

⁴ Ọo ya e-doshi opfu, dụgbaaru ọha yẹe ọha ibe iya. L'ọ bya edoshiaru ikpoto nemadzụ opfu, dụru phẹ nụ. Ẹphe e-woru ogu-echi phẹ kpụkwaa l'ọ bụru ọgu; woru arwa phẹ kpụa l'ọ bụru nwa mma, e gude akọcha iphe. Ọ tọ dụedu ọha, a-patakwadu ogu-echi ejepfu ọhozo ọgu; ọphu ẹphe anwụedu alwụ ọgu ọzobaa.

⁵ Unubẹ ọnu-ụlo Jiékọpu; unu byanụ g'anyi tsoru ìphóró ọphu Chipfu nwụberu anyi.

Eswe kẹ Chipfu

⁶ Ị jịkawaru ndibe ngu ono; mbụ ọnu-ụlo Jiékọpu onoya; kẹle ọmamanshi ndu shi ụzo ẹnyanwu-awawa jiru iya ejiji. Tẹme ẹphe nọdu agba ẹja gẹ ndu Filisitayinu. Ẹphe lẹ ndu ọhozo je akụa ọkpa.

⁷ Alị phẹ bụ iphe, jiru iya nụ bụ mkpọla-ọchaa mẹ mkpọla-ododo. Ọphu ẹku phẹ abvụdu abvụbvu. Alị phẹ bụ iphe, jiru iya nụ bụ ịnya; ọphu ụgbo-ịnya phẹ abvụdu abvụbvu.

⁸ Alị phẹ bụ iphe, jiru iya nụ bụ nshi nshi; ọ bụru iphe, ẹphe abarụ ẹja bụ iphe, ẹphe gude ẹka phẹ gẹdegede mee.

⁹ Noo g'o gude e jee ewoze nemadzụ alị. Mbụ l'amadụ bẹ ee-me g'o rwua alị. B'a gụkwaru phẹ nvụ!

¹⁰ Gbanụru laa l'agbara-mkpuma! Je je edomia onwongu l'ime alị; kẹle ịitsu Chipfu ebvu; tẹme akpabiri iya nọdu eye ngu ebvu!

¹¹ Onye etu onwiya ẹpha bẹ ee-mechaa mee g'ẹnya lwa. L'e mee gẹ ndu etse etsetse phuru yoo. Ọ bụru Chipfu kpoloko bụ onye ee-kutse m'o -rwua mbọku ono.

¹² O nwekpọerupho ujiku lanụ, Chipfu, bụ Ọkalibe-Kakọta-Ike doberu iphe, bụkpoo ndu eku onwophẹ yẹe ndu akpa nggangga; bya edobekwaru iya phọ ndu ekutse onwophẹ. Ọo mbọku ono bẹ ee-kuze phẹ alị.

¹³ Mbọku ono bẹ e doberu iphe, bụ oshi sida, nọ l'úbvú úbvú Lébanọnu, bụ oshi, tsekọtaru agbaragba bya ajaa àjàjà; bya edobekwaru iya phọ iphe, bụkotakpoo achị, nọ l'alị Beshanu;

¹⁴ bya edoberu iya úbvú úbvú, hagbaa ephekerephe ephekerephe; mẹ obvu, ha l'eli l'eli.

¹⁵ O doberu iya iphe, bụkpoo ọje, hagbaa ephekerephe; mẹkpoo igbulọ, a kpụshiru ike;

¹⁶ mẹkpoo ụgbo-mini ndu Tashishi g'ọ hakọta; mẹkpoo iphemiphe, e meru; ọ nọdu ama mma.

¹⁷ Onye etu onwiya ẹpha bẹ ee-me g'ẹnya lwa. L'e mee gẹ ndu etse etsetse phuru yoo. Ọ bụerupho Chipfu kpoloko bẹ ee-kutse mbọku ono.

¹⁸ Nshi ta adụedu adụdu ophu kpọ.

¹⁹ Mbọku ono bẹ nemadzụ a-gbaru laa l'ọgba, nọ l'agbara-mkpuma; gbaru laa l'ẹnu, a tụru l'alị; kẹle ẹphe atsụ Chipfu ebvu; tẹme akpabiri iya nọdu eye phẹ ebvu teke ono, ọo-gbalihu gẹ ya nmaghua mgboko l'ophu anmaghu ono.

²⁰ Mbọku ono bẹ nemadzụ a-chịru nshi ono, ẹphe gude mkpọla-ọchaa mẹ mkpọla-ododo mee dobe agwa agwagwa ono chịru phekaaru anụ, bụ molu yẹe ụtsu-nwankụta.

²¹ Ẹphe a-gbaru laa l'ẹka agbara-mkpuma gbaru ụwa; mẹkpoo l'ime ọgba, nọgbaa l'eli úbvú; kẹle ẹphe atsụ Chipfu ebvu; tẹme akpabiri iya nọdu eye phẹ ebvu teke ono, ọo-gbalihu gẹ ya nmaghua mgboko l'ophu anmaghu ono.

²² Hanaa akpọru obu yeru nemadzụ; kẹle mkpakọ iphe, o nweru bụ unme, ọotu l'imi. ?Bụ gụnu ọzo bẹ oo-mefụba ọ́nyá?