Нуны фырт Йешуа 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Дыууадӕс дуры зӕрдылдарынӕн

¹ Израилы адӕм Иорданы фаллаг фарсмӕ куы бахызтысты, уӕд Дунедарӕг Йешуайӕн загъта:

² «Адӕмӕй дыууадӕс лӕджы равзарут, алы хӕдзарвӕндагӕй дӕр иу лӕг,

³ ӕмӕ сын бафӕдзӕхсут, цӕмӕй, Иорданы бӕстастӕу сауджынтӕ кӕм лӕууынц, уырдыгӕй сисой дыууадӕс дуры, семӕ сӕ ахӕссой ӕмӕ, ӕхсӕвиуат кӕм кӕндзыстут, уым сӕ ӕрӕвӕрой».

⁴ Йешуа израилӕгтӕй равзӕрста дыууадӕс лӕджы, алы хӕдзарвӕндагӕй дӕр иу лӕг,

⁵ ӕмӕ сын загъта: «Цӕугӕут Дунедарӕджы, уӕ Хуыцауы, Фидыды Чырынмӕ, Иорданы бӕстастӕумӕ, ӕмӕ уӕ алчидӕр, Израилы хӕдзарвӕндӕгты нымӕцмӕ гӕсгӕ, фӕйнӕ дуры сисӕд йе уӕхскмӕ.

⁶ Уыдзысты уын зӕрдылдарӕн. Фидӕны уӕ куы фӕрсой уӕ байзӕддӕгтӕ, ацы дуртӕ уын цы сты, зӕгъгӕ,

⁷ уӕд сын дзуапп дӕтдзыстут: „Дунедарӕджы Фидыды Чырын Иорданыл куы фӕцӕйхызт, уӕд дон йӕ разы уӕлӕрдыгӕй ауӕзтау ӕрлӕууыд. Уыйадыл ацы дуртӕ израилӕгтӕн сты ӕнустӕм зӕрдылдарӕн“».

⁸ Йешуайы фӕдзӕхст сӕххӕст кодтой израилӕгтӕ. Дунедарӕг Йешуайӕн куыд загъта, афтӕ Иорданы бӕстастӕуӕй систой дыууадӕс дуры, Израилы хӕдзарвӕндӕгты нымӕцмӕ гӕсгӕ, рӕсӕнуатмӕ сӕ рахастой ӕмӕ сӕ уым ӕрӕвӕрдтой.

⁹ Йешуа ӕндӕр дыууадӕс дуры ӕрӕвӕрдта Иорданы бӕстастӕу, Фидыды Чырын хӕссӕг сауджынтӕ кӕм лӕууыдысты, уым. Дуртӕ абон дӕр ма уыцы ран лӕууынц.

¹⁰ Чырын хӕссӕг сауджынтӕ Иорданы бӕстастӕу лӕууыдысты, Дунедарӕг Йешуайы дзыхӕй адӕмӕн цытӕ бафӕдзӕхста, уыдӕттӕ иууылдӕр цалынмӕ ӕххӕстгонд ӕрцыдысты, уӕдмӕ. Ахӕм уыди Моисейы фӕдзӕхст дӕр Йешуайӕн. Адӕм тагъд-тагъд ахызтысты доны фаллаг фарсмӕ.

¹¹ Иууылдӕр куы фӕфале сты, уӕд Иорданыл ахызти Дунедарӕджы Фидыды Чырын дӕр, ӕмӕ сауджынтӕ йемӕ ӕрлӕууыдысты адӕмы разӕй.

¹² Моисей сын куыд загъта, афтӕ Рувимы ӕмӕ Гады хӕдзарвӕндӕгтӕ, стӕй Менассиайы хӕдзарвӕндаджы ӕмбис иннӕ израилӕгты разӕй хӕстифтонгӕй ахызтысты фаллаг фарсмӕ.

¹³ Дыууиссӕдз мины бӕрц хӕстоны Дунедарӕджы раз абырстой Йерихоны дӕлвӕзмӕ схӕцынмӕ.

¹⁴ Уыцы бон Дунедарӕг Йешуайы скадджын кодта Израилы адӕмы цӕсты, ӕмӕ, Моисейы куыд нымадтой, афтӕ йӕ нымадтой уӕдӕй фӕстӕмӕ йӕ цард-цӕрӕнбонты.

¹⁵ Дунедарӕг Йешуайӕн загъта:

¹⁶ «Фидыды Чырын хӕссӕг сауджынтӕн зӕгъ, ӕмӕ Иорданӕй рахизой».

¹⁷ Йешуа сауджынтӕн загъта: «Рахизут Иорданӕй».

¹⁸ Дунедарӕджы Фидыды Чырын хӕссӕг сауджынтӕ куыддӕр Иорданӕй рахызтысты ӕмӕ былгӕрон сурыл ӕрлӕууыдысты, афтӕ Иордан йӕ донвӕдыл агуылф ласта ӕмӕ раздӕрау йӕ былтӕй акалди.

¹⁹ Адӕм Иорданы сӕрты ахызтысты фыццаг мӕйы дӕсӕм бон ӕмӕ рӕсӕнуаты ӕрлӕууыдысты Гилгалы, Йерихоны бӕстӕйы скӕсӕйнаг арӕныл.

²⁰ Иорданӕй цы дыууадӕс дуры рахастой, уыдон Йешуа ӕрӕвӕрдта Гилгалы

²¹ ӕмӕ израилӕгтӕн загъта: «Уӕ байзӕддӕгтӕ фидӕны уӕ фыдӕлты куы фӕрсой, ацы дуртӕ цы амонынц, зӕгъгӕ,

²² уӕд-иу сын дзуапп раттут: „Иорданы доныл ацы ран ахызтысты израилӕгтӕ, сур зӕххыл цӕуӕгау“.

²³ Дунедарӕг, уӕ Хуыцау, сымахӕн уӕ развӕндагыл Иорданы дон байсысын кодта, цалынмӕ йыл ахызтыстут, уӕдмӕ. Раст афтӕ бакодта амӕй размӕ Сырх денджызӕн дӕр: цалынмӕ йыл ахызтыстӕм, уӕдмӕ йӕ нӕ развӕндагыл байсысын кодта Дунедарӕг, нӕ Хуыцау.

²⁴ Уадз ӕмӕ зӕххыл ӕппӕт адӕмтӕ дӕр базоной, Дунедарӕджы къух куыд тыхджын у, уый, ӕмӕ уӕхӕдӕг дӕр ӕдзухдӕр куыд кад кӕнат Дунедарӕгӕн, уӕ Хуыцауӕн!»