Нуны фырт Йешуа 16 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Йосефы байзӕддаджы зӕххытӕ

¹ Йосефы байзӕддӕгтӕм халӕппӕрстӕй цы зӕххытӕ ӕрхауди, уыдоны хуссайраг арӕн скӕсӕны райдыдта Йерихоны акомкоммӕ Иорданӕй, Йерихоны суадӕттӕй. Йерихоны рӕбынты ныгуылӕнӕрдӕм ӕдзӕрӕг быдырыл схызти Вефилы хӕхбӕстӕм,

² Вефилӕй йӕхи айтыгъта Лузы онг, стӕй бахӕццӕ Атаротмӕ, аркӕгтӕ кӕм цӕрынц, уырдӕм

³ ӕмӕ дарддӕр ныгуылӕнӕрдӕм ӕрхызти йафлетӕгты ӕмӕ Дӕллаг Бет-Хороны зӕххытӕм, стӕй Гезермӕ, аххӕссыди суанг Зӕххастӕуы денджызы онг.

⁴ Ахӕм уыди Йосефы фырттӕ Менассиа ӕмӕ Ефремы хӕдзарвӕндӕгты фыдӕй-фыртмӕйы исбон.

Ефремы хӕдзарвӕндаджы хай

⁵ Ефремы байзӕддаджы мыггӕгтӕ цы зӕххытӕ райстой, уыдоны хуссайраг арӕн скӕсӕнӕрдыгӕй райдыдта Атрот-Аддарӕй ӕмӕ ныгуылӕнӕрдӕм йӕхи айтыгъта Уӕллаг Бет-Хороны онг.

⁶ Дарддӕр арӕн ӕрӕнцади Зӕххастӕуы денджызыл. Цӕгатӕрдыгӕй ахӕццӕ ис Михметатмӕ, уым скӕсӕнӕрдӕм фӕзылди Таанат-Шиломӕ, стӕй уый чъылдымты хуссарӕрдӕм рахызти Йаноахмӕ.

⁷ Уырдыгӕй ӕрцыди Атаротмӕ ӕмӕ Наарамӕ, бахӕццӕ ис Йерихонмӕ ӕмӕ афтӕмӕй Иорданыл ӕрлӕууыд.

⁸ Таппуахӕй арӕн йӕхи айтыгъта ныгуылӕнӕрдӕм, Канайы тӕрфы уылты, ӕмӕ йӕ кӕрон ӕрлӕууыди Зӕххастӕуы денджызыл. Ахӕм уыдис Ефремы байзӕддаджы фыдӕй-фыртмӕйы исбон мыггаггай.

⁹ Ноджы ма сын Менассиайы байзӕддаджы зӕххыл дихгонд ӕрцыдысты сахартӕ сӕ алыварс хъӕутимӕ.

¹⁰ Фӕлӕ Ефремы байзӕддӕгтӕ ханаанӕгты Гезерӕй нӕ фӕсырдтой, ӕмӕ абон дӕр се ’хсӕн цӕрынц, ӕрмӕст цагъайрӕгтӕ систы.