Нуны фырт Йешуа 13 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Йешуа тынг базӕронд ис. Дунедарӕг ын загъта: «Бынтондӕр базӕронд дӕ, афтӕмӕй уын нырма бацахсинаг зӕххытӕ дзӕвгар баззад.

² Бацахсинаг уын сты филистимаг зӕххытӕ иууылдӕр ӕмӕ Гешуры бӕстӕ.

³ Уыцы зӕххытӕ (нымад цӕуынц Ханааны зӕххыты иу хайыл) Мысыры арӕныл Шихоры цӕугӕдонӕй цӕгатӕрдӕм ӕххӕссынц Екронмӕ. Фондз филистимаг хицауы зӕххытӕм хауынц: Газӕ, Ашдод, Ашкелон, Гат ӕмӕ Екрон, стӕй аввайӕгты зӕхх хуссарӕрдыгӕй.

⁴ Ноджыдӕр бацахсинаг у ханаанӕгты зӕхх амораг арӕныл лӕууӕг сидойнӕгты сахар Арайӕ Афекы сахары онг,

⁵ стӕй Гевалы зӕхх ӕмӕ — скӕсӕнӕрдӕм — Ливан ӕнӕхъӕнӕй, Ермоны хохрӕбын Баал-Гадӕй Ливаны дӕлвӕзмӕ цӕгатӕрдыгӕй Хаматы сахарӕй бахизӕны онг.

⁶ Ливанӕй Мисрефот-Маимы онг хӕхбӕсты цӕрӕг ӕппӕт сидойнӕгты Ӕз Мӕхӕдӕг атӕрдзынӕн израилӕгты разӕй. Ды та зӕхх Израилӕн халӕппӕрстӕй байуар, куыд дын бафӕдзӕхстон, афтӕ.

⁷ Зӕхх иууылдӕр байуар фараст хӕдзарвӕндагыл ӕмӕ Менассиайы хӕдзарвӕндаджы ӕмбисыл».

⁸ Рувимы ӕмӕ Гады хӕдзарвӕндӕгтӕн ӕмӕ Менассиайы хӕдзарвӕндаджы иннӕ ӕмбисӕн та Дунедарӕджы цагъар Моисей сӕ зӕххы хай раздӕр радта — Иорданы скӕсӕнварс:

⁹ Арноны уӕлвӕз Ароерӕй ӕмӕ донвӕды тӕккӕ уӕлбыл сахарӕй райдай ӕмӕ Дивонӕй Медевайы ӕхсӕн тъӕпӕн ӕнӕхъӕнӕй,

¹⁰ амораг паддзах Сигоны сахартӕ иууылдӕр (йӕ сӕйраг сахар уыди Хешбон) аммонӕгты арӕны онг;

¹¹ ноджыдӕр Галаад ӕмӕ Гешуры ӕмӕ Маахайы бӕстӕтӕ, Ермоны хох ӕнӕхъӕнӕй ӕмӕ Башан иууылдӕр Салхайы онг,

¹² ома Башаны паддзах Огы, рефаимты фӕстаг байзӕддаджы, бӕстӕ ӕнӕхъӕнӕй (йӕ сӕйраг сахартӕ уыдысты Аштарот ӕмӕ Едреи). Сигоны ӕмӕ Огы басаста Моисей, сӕ зӕххытӕ сын байста.

¹³ Фӕлӕ израилӕгтӕ Гешуры ӕмӕ Маахайы адӕмы нӕ фӕтардтой, ӕмӕ уыдон абон дӕр цӕрынц израилӕгтимӕ.

¹⁴ Ӕрмӕстдӕр Левийы хӕдзарвӕндагӕн нӕ радта Моисей зӕххы хай: Дунедарӕгӕн, Израилы Хуыцауӕн, цы нывӕндтӕ хӕссынц, уыдон сты сӕ исбон, Дунедарӕг Моисейӕн куыд загъта, афтӕ.

Рувимы хӕдзарвӕндаджы зӕххытӕ

¹⁵ Рувимы хӕдзарвӕндаджы мыггӕгтӕн Моисей радта мӕнӕ ацы зӕххытӕ:

¹⁶ Арноны дӕлвӕзы чи ис, уыцы Ароеры сахар, стӕй дӕлвӕзӕн йӕ тӕккӕ астӕу цы сахар ис, уый дӕр; Медевайы онг уӕлвӕз ӕнӕхъӕнӕй,

¹⁷ Хешбон ӕмӕ уӕлвӕзы сахартӕ иууылдӕр: Дивон, Бамот-Баал, Бет-Баал-Меон,

¹⁸ Йахац, Кедемот, Мефаат,

¹⁹ Кирйатаим, Сивма, Церет-Шахар Иорданы скӕсӕнбыл хӕхбӕсты,

²⁰ Бет-Пеор, Фасгайы хохы фӕхстӕ, Бет-Йешимот

²¹ ӕмӕ дӕлвӕзы иннӕ сахартӕ иууылдӕр, амораг паддзах Сигоны бӕстӕ ӕнӕхъӕнӕй (йӕ сӕйраг сахар уыди Хешбон). Сигоны ӕмӕ йӕ зӕххыл цӕрӕг йӕ дӕлбар мидианаг ӕлдӕртты — Еви, Рекем, Цур, Хур ӕмӕ Ревайы — басаста Моисей.

²² Израилӕгты карды амӕттаг баци Беоры фырт дӕсныфӕрсӕг Балаам дӕр.

²³ Рувимы хӕдзарвӕндаджы зӕххыты арӕн ныгуылӕнӕрдыгӕй уыдис Иорданы дон ӕмӕ донӕн йе скӕсӕйнаг былгӕрон. Ам уыдысты, мыггаггай, Рувимы байзӕддӕгтӕн фыдӕй-фыртмӕйы исбонӕн цы зӕххытӕ лӕвӕрд ӕрцыди, уыдон: сахартӕ сӕ алыварс хъӕутимӕ.

Гады хӕдзарвӕндаджы зӕххытӕ

²⁴ Гады хӕдзарвӕндаджы мыггӕгтӕн Моисей радта мӕнӕ ацы зӕххытӕ:

²⁵ Йазер ӕмӕ Галаады ӕппӕт сахартӕ, Раввайӕ скӕсӕнӕрдӕм Ароеры онг аммонӕгты бӕстӕйы ӕмбис,

²⁶ стӕй Хешбонӕй Рамат-Мицпейы ӕмӕ Бетонимы онг, Маханаимӕй та Ло-Девары онг зӕххытӕ,

²⁷ Иорданы тӕрфы та: Бет-Харам, Бет-Нимра, Суккот ӕмӕ Цафон — Рувимы хайӕ фӕстӕмӕ хешбонаг паддзах Сигоны зӕхх, Иорданы дон ӕмӕ донӕн йе скӕсӕйнаг былгӕрон Киннереты денджызы онг.

²⁸ Ам уыдысты, мыггаггай, Гады байзӕддӕгты фыдӕй-фыртмӕйы исбойнаг зӕххытӕ: сахартӕ сӕ алыварс хъӕутимӕ.

Менассиайы хӕдзарвӕндаджы зӕххытӕ

²⁹ Менассиайы хӕдзарвӕндаджы мыггӕгтӕн Моисей радта мӕнӕ ацы зӕххытӕ:

³⁰ Маханаимӕй райдай ӕмӕ Башан иууылдӕр, башанаг паддзах Огы бӕстӕ ӕнӕхъӕнӕй Иаиры цатырхъӕутимӕ (ӕртиссӕдз хъӕуы);

³¹ Галаады ӕмбис ӕмӕ Башаны паддзах Огы сӕйраг сахартӕ Аштарот ӕмӕ Едреи. Уыцы зӕххытӕ лӕвӕрд ӕрцыдысты Менассиайы фырт Махиры байзӕддӕгты ӕмбисӕн мыггаггай.

³² Адон сты, Моисей Рувимы хӕдзарвӕндагӕн, Гады хӕдзарвӕндагӕн ӕмӕ Менассиайы хӕдзарвӕндаджы ӕмбисӕн фыдӕй-фыртмӕйы исбонӕн Иорданы фале, Йерихонӕй скӕсӕнӕрдӕм, Моавы дӕлвӕзты кӕй радта, уыцы зӕххытӕ.

³³ Фӕлӕ Левийы хӕдзарвӕндагӕн исбон нӕ радта: Дунедарӕг, Израилы Хуыцау, уыди сӕ исбон, Йӕхӕдӕг сын куыд загъта, афтӕ.