Езекиел 45 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Зӕххы хӕйтты байуӕрст

¹ Зӕххы хӕйттӕ халӕппӕрстӕй куы уарат, уӕд-иу рахицӕн кӕнут Дунедарӕджы уаз зӕххы хай: йӕ дӕргъ — дыууын фондз ӕлмӕрины, йӕ уӕрх та — ссӕдз мин ӕлмӕрины. Уыцы зӕххы хай уаз уыдзӕнис иууылдӕр.

² Уымӕй-иу рахицӕн кӕнут, йӕ дӕргъ дӕр ӕмӕ йӕ уӕрх дӕр фӕйнӕ фондзсӕдӕ ӕлмӕрины кӕмӕн сты, ахӕм зӕххы хай, уымӕн та ма йӕ алыварс уыдзӕни сӕрибар зӕхх — фӕндзай ӕлмӕрины йас.

³ Уаз зӕххыл рахицӕн кӕнут, йӕ дӕргъ дыууын фондз ӕлмӕрины, йӕ уӕрх та дӕс ӕлмӕрины кӕмӕн уыдзӕн, ахӕм хай. Уым уыдзӕни Рухсмонуат.

⁴ Ацы уаз зӕххы хай лӕвӕрд уыдзӕни Дунедарӕджы Кувӕндоны лӕггадгӕнӕг сауджынтӕн. Ам уыдзысты Кувӕндон ӕмӕ сауджынты хӕдзӕрттӕ.

⁵ Зӕххы хайы иннӕ ӕмбис — уымӕн дӕр йӕ дӕргъ дыууын фондз мин ӕлмӕрины, йӕ уӕрх та дӕс мин ӕлмӕрины — лӕвӕрд уыдзӕни левиттӕн, Кувӕндоны лӕггадгӕнджытӕн. Уый уыдзӕни сӕ зӕххы хай, ӕмӕ дзы ӕрцӕрдзысты.

⁶ Уаз зӕххы хайы ныхмӕ-иу рахицӕн кӕнут ӕндӕр зӕххы хай сахарӕн, йӕ уӕрх — фондз мин ӕлмӕрины, йӕ дӕргъ та — дыууын фондз мин ӕлмӕрины. Уый уыдзӕн ӕппӕт Израилы адӕмы исбон.

⁷ Адӕмы фӕтӕгӕн — Дунедарӕджы зӕххисбоны ӕмӕ сахары зӕххисбоны ӕмных ӕмӕ се ’муӕрх, скӕсӕнӕрдыгӕй дӕр ӕмӕ ныгуылӕнӕрдыгӕй дӕр — ратдзыстут зӕххы хӕйттӕ. Уыдон скӕсӕнӕрдыгӕй аххӕсдзысты скӕсӕйнаг арӕнты онг, ныгуылӕнӕрдыгӕй та — ныгуылӕйнаг арӕнты онг.

⁸ Уый уыдзӕни адӕмы хистӕрты зӕххисбон Израилы, цӕмӕй мын фидӕнмӕ мауал ссӕндой Мӕ адӕмы ӕмӕ Израилы хӕдзарвӕндӕгты адӕмӕн байуарой зӕххытӕ».

Фӕдзӕхст адӕмы хистӕртӕн

⁹ Афтӕ зӕгъы Дунедарӕг Хуыцау: «Ӕгъгъӕд уын уӕд, Израилы адӕмы фӕтӕгтӕ! Мауал тых кӕнут, мауал ссӕндут, раст тӕрхон хӕссут! Мӕ адӕмы Мын мауал сурут сӕ зӕххӕй, — зӕгъы Дунедарӕг Хуыцау. —

¹⁰ Раст барӕнт уӕ тӕраз, уӕ барӕн ефӕ ӕмӕ уӕ барӕн бат.

¹¹ Барӕн ефӕ ӕмӕ барӕн бат ӕмхуызон хъуамӕ уой, сӕ алкӕй дӕр хъуамӕ цӕуа хомеры дӕсӕймаг хай. Хъуамӕ барст цӕуой хомермӕ гӕсгӕ.

¹² Шекелы ис ссӕдз герайы. Ӕхсай шекелы та уыдзысты иу минӕ.

Адӕмы хистӕрты хӕстӕ

¹³ Мӕнӕ, адӕмы цы хуынтӕ хӕссын хъӕуы, уыдон: мӕнӕуы хомерӕй — ефӕйы ӕхсӕзӕм хай, хъӕбӕрхоры хомерӕй дӕр — ефӕйы ӕхсӕзӕм хай,

¹⁴ оливӕйы сойы корӕй — баты дӕсӕймаг хай (хомеры ис дӕс баты),

¹⁵ Израилы лыстӕг фосы дзугтӕй дыууӕсӕдӕ фысӕй — иу фыс. Ӕппӕт уыдон хъӕуынц хойраджы хуынӕн, иууылсудзинагӕн ӕмӕ фидыды нывондӕн, адӕмы ссыгъдӕг кӕныны охыл, — зӕгъы Дунедарӕг Хуыцау. —

¹⁶ Ахӕм хуынтӕ адӕм хъуамӕ хӕссой Израилы фӕтӕгӕн.

¹⁷ Уымӕн та йӕ хӕс у адӕмы ифтонг кӕнын иууылсудзинӕгтӕй, хойраджы хуынтӕй ӕмӕ сӕнӕй — сабӕттӕ, мӕйногтӕ ӕмӕ иннӕ бӕрӕгбӕтты заман, Израилы адӕмы ӕппӕт бӕрӕгбӕтты заман, цӕмӕй-иу Израилы адӕм сӕхи ссыгъдӕг кӕныны тыххӕй хӕссой тӕригъӕды нывӕндтӕ, хойраджы хуынтӕ, иууылсудзинӕгтӕ ӕмӕ фидыды нывӕндтӕ».

¹⁸ Афтӕ зӕгъы Дунедарӕг Хуыцау: «Фыццаг мӕйы фыццаг бон галты рӕгъауӕй райс иу ӕнӕсахъат гал ӕмӕ Кувӕндон ссыгъдӕг кӕн.

¹⁹ Сауджын-иу уыцы тӕригъӕды нывонды тугӕй райсӕд ӕмӕ дзы бапырх кӕнӕд Кувӕндоны дуары тарвӕзтӕ, стӕй, нывондхӕссӕн цы къӕпхӕныл лӕууы, уымӕн йӕ цыппар фисыны, ноджы ма — мидӕггаг кӕрты кулдуары цӕджындзтӕ.

²⁰ Афтӕ бакӕнын хъӕудзӕни мӕйы ӕвдӕм бон дӕр, ӕнӕбары кӕнӕ ӕнӕзонгӕйӕ чи фӕтӕригъӕдджын ис, уыдоны тыххӕй. Афтӕ-иу ссыгъдӕг кӕнут Кувӕндон.

²¹ Фыццаг мӕйы цыппӕрдӕсӕм бонӕй фӕстӕмӕ авд боны дӕргъы бӕрӕг кӕнут Куадзӕн. Бӕрӕгбоны рӕстӕг-иу хӕрут донгонд дзултӕ.

²² Фыццаг бон-иу адӕмы фӕтӕг йӕхи ӕмӕ бӕстӕйы ӕппӕт адӕмы тыххӕй тӕригъӕды нывондӕн ӕрхӕссӕд гал.

²³ Уыцы авд боны дӕргъы алы бон дӕр Дунедарӕгӕн иууылсудзинагӕн хӕссӕд ӕнӕсахъат авд галы ӕмӕ ӕнӕсахъат авд фыры, тӕригъӕды нывондӕн та сӕгъты дзугӕй — иу цӕу.

²⁴ Хойраджы хуынӕн-иу гал-нывондимӕ дӕр ӕмӕ фыр-нывондимӕ дӕр ӕрхӕссӕд ссады фӕйнӕ ефӕйы, ссады иу ефӕимӕ та — оливӕйы сойы иу гин.

²⁵ Ӕвдӕм мӕйы фынддӕсӕм бонӕй фӕстӕмӕ дӕр, бӕрӕгбоны заман, авд боны дӕргъы хӕссӕд уыдӕттӕ: ахӕм тӕригъӕды нывонд, стӕй ахӕм иууылсудзинаг, уый бӕрц хойраджы хуын ӕмӕ уый бӕрц оливӕйы сой».