YOSUA 8 - Nanduk Ngget Tul Pidnak Wene

Ai wi wanogolat, lak tak pidnak wene 8:1-29

¹ Nagawan Indo-nen Yosua yak tosolar-e: ”Kar-e kat-nen idnak kesan ombo oboksa ndok worak unpuruk, Ai wi mberer-o. Kar-e kwiye yosolat, kindi kabak yurak pug-o. Ai nagawan iri-ge an-nen urugwe nggwe rak uburuk, ombol nggwe rak kibimin-o. At-nen tenagidnak wi woragwi nap min uwi siri min at onggweyak min kar-e mengga wanugun-o.

² Nde, Ai nagawan min at-nen tenagidnak wi woragwi nap min-e nanduk kat-nen Yeriko nagawan min at-nen tenagidnak wi woragwi nap min kwat inpigen iri na nggal-et kwat unpugun-o. Alat nde, yawo-ge insilobulo min onowam min-e kat kondomok kenmanggim wanurag-e ob-er-o. Kir-e mimo onmbol nggwe-nen enpem kore yurak lid lud tak per-o” luk yak indij-o.

³ Yosoloma, Yosua na-ge at-nen idnak san ombo oboksa inmin Ai wi mbururak lid lud tak pij-o. Iri yosolar-e, san ombo san wari nak tiga pulu ribu (30.000) lenak unpurug-e, nandug-et kubu wirik inpij-o.

⁴ Wirik onposolar-e, wene yu yak indij-o: ”Kir-e o siri iri ombol nggwe mburugupndik, kud yemndak puruk, undurak lid lud tak puruk wolmer-o.

⁵ Nde, an nowosirak inmin-e nam o siri iri korok korok lobok yul-o. Iri yukmu nde, Ai nap-nen neneyaruk, nenpem kore yogolat langgal nunpuruk lobok yogola-ge, nanduk kwaridnak nggal nenpe-net nde kwiye mburul-o.

⁶ Muk niniyil lobok yogola-ge, nir-e lit unpuruk mburulndik, o siri keya buruk erepma nggal-et wok yogolar-e, nenaye mbitli-o yuwakluk, nenpe-net nde ndibi ndi yul-o.

⁷ Nde, iri yogola-ge, kir-e yemndak woragup sa-nen kuwaluk ngguwagolar-e, o siri iri-ge mondog-et wanurag-o. Nagawan Indo Kenmbal Pem Nagawan-nen-e o siri iri-ge mondok kininggem-et puwa-o.

⁸ Nde, o siri nde abu wanurug-e, Nagawan Indo-nen yak kindidnak ndak ndag-et o siri ereba na-ge kan purag-o. Nde, iri kwarurak iri-ge kit keneyabu-nen yusu-o” yak indij-o.

⁹ Iri yak undurug-e, Yosua-nen it yu na wirik enpamu-ge, mo mboso (barat) ambigit, o Ai amberam nggwe, Ai wok Mbetel wok ereba me kud yimndil mbiriga-o. Mbirigarik, yik eneyarok kud yemndak worakmu-ge, Yosua na-ge Isarael nap woragwi sa-t nene lug-e,

¹⁰ kub-e kuplila Yosua na men yosolar-e: ”San ombo oboksa ndok werer-o” yak unduruk, ndok worogola-ge, Yosua min Isarael nap ennggendumu-nen enne kulugwi nap ereba na inmin-nen-e ap kere ereba na-ge inmin luk Aid wi mbiriga-o.

¹¹ Nde, Yosua-nen lit karuk ap kere erep ereba na inmin-e o Ai siri iri me pak tumende nggok iri na ambigir-et mbirigarig-e, abare abam (utara) nggwe it worali wok Ai wok iri na-ge mbirik misik woragij-o. Nde, iri na me-ge unuwi lije wiril lobok yiga-o.

¹² Nde, o siri iri ombol nggwe mo mboso (barat) nggwe Ai wok Mbetel wok ap erep kud yimndil wirik inpid nab-e enpe wonarag-e lima ribu (5.000) nggal irit wirik inpil mbirij-o.

¹³ Nde, wim nggurak nap enpe timbiril lobok yiga iri-ge yu nggal-o: enpe kwarar-e abare abam (utara) nggwe unpuruk, nde, kere ereb-e abare mo mboso (barat) nggwe unpuruk, nde, Yosua-ge mbirik iri na me nene yij-o.

¹⁴ Iri yogola, Ai nagawan iri na-nen Yosua owosirak eneyaruk, enpem mbud yosolar-e, ndag-et nak ap oboksa-nen Yareren mbirik nanduk Isarael nap indiga iri na nggwe-t lobok yiga-o. Nde, ar-e yanem ombol nggwe-nen ebem kore yuwa iri na-ge aru buk irit woragij-o.

¹⁵ Yosua owosirak san ombo inmin-e enpe-net nde, kwiye mbitli-o yuwakluk lit iniyuruk iniyuruk ap lak ma karu me mbiriga-o.

¹⁶ Nde, Ai iri me woragwi nap oboksa ”San wanurag-o” yak indidnak me, ap oboksa-nen Yosua min at-nen idnak san ombo ereba na inmin muk iniyil mborogolar-e, it unuwi siri-ge enmberam nggwe yoboksa-t keya biga-o.

¹⁷ Nde, Ai nap oboksa-nen Isarael nap muk iniyil mborogolar-e, o siri iri na-ge mbi-ge yik karok woragit lak, o siri iri na-ge emnde pisirik keya biga-o.

¹⁸ Iri yikma, Nagawan Indo-nen Yosua yak tosolar-e: ”Kat kowangun-e Ai siri ambigit nuk karuk ndimirik wolmin-o. O siri iri-ge an-nen kinggem pimin-o” yosoloma-ge, Yosua na-ge Nagawan Indo-nen ebem pid iri na-t kwarij-o.

¹⁹ Nde, Yosua-nen inggi ndimirik posola, ereya na-net Isarael nap o amberam kud yemndak ereba na ndag-et nak men yogolar-e, o siri iri na bem kore yiga-o. Iri yogolar-e, o iri na wanuruk, o siri ereba na-ge kan piga-o.

^20-22 Iri kwarogola, Ai nap-nen onmbol nggwe yik kaiganggal-e kule ndugunuruk lasolar-e, mbal woragosola yik kaiga-o. Kule iri na Yosua owosirak inmin-nen karuk-nen peragolar-e: ”Nit nap kere erep ereba na-nen o siri iri na-ge abu wanili-o” luk yebet kaiga-o. Peraruk, Yosua-nen lit karuk ap kere ereba na-ge tuguruk eyak marogolar-e, Ai nab-e enpem kore yogolat mondok indiga-o. Nde, Isarael nap onmbol nggwe Ai worali ereba na-nen-e inmbirik nggwe lobok yogola, kwarogolar-e, Ai nab-e ndumu ndumu rak onpogola, mbururak meya irit agaij-o. Iri yogolar-e, Ai nab-e misiget ter-o luk mondok mbirigit lak, ndegera indiga-o.

²³ Ai nap nagawan iri nak uruk tenaguruk, Yosua eram waruk lobok yiga-o.

²⁴ Isarael nap ap kere ereba na-nen wim nap it muk iniyuruk ap lak ma karu me mbiriga ereba na-ge oboksa indiga-o. Iri luk, tuguruk Ai lobok yogolar-e, iri me woraiga yengge wam oboksa indiga-o.

^25-26 Nde, Yosua owangun Ai ambigit ndimirik pid iri na-ge ndimirik irit worasoma, Ai nap oboksa-t ondogola-net lambo rak pij-o. Iri na tarem-et Ai woragwi nab-e kwami-nen ap-nen oboksa duabelas ribu (12.000) irit indiga-o.

²⁷ Iri kwarogolat, o siri iri me-nen wam min silobulo min kugun pem waniga ereba na-ge Nagawan Indo-nen Yosua yak tid iri na ndak ndag-et Isarael nab-e it ondomok enmanggim waniga-o.

²⁸ Nde, o Ai iri me-ge Yosua-nen kan puruk, yud tud pil lobok yid iri na-ge yawo na worasur-o.

²⁹ Nde, o iri me nagawan iri na-ge e bem tiong tak pikma, irit worala o keyama yij-o. Nde, mo wusa nggosola-ge, Yosua-nen-e: ”Ap worak iri na-ge waga o iri pak tumende bem mbo ber-o” yamu iri me mbo burug-e, kerep kwarat wanigarik, ap iri na bem logo logo pil laiga-o. Nde, iri kwaridnak kereb-e yawo-nen na worasur-o. 8:30-35 Ayat ereba arem-e Ebal ndobo bem-nen Nagawan Indo-nen imiri mbarak pidnak wene kuluwakluk, wonaridnak wene mbarak worasu-o.