YESAYA 63 - Nanduk Ngget Tul Pidnak Wene

Nagawan Indo-nen ap enlem oboksa urugwe nggwe rak inpidnak wene 63:1-6 Yik Karok Woraso Nap

¹ ”Abare sum-e mimi, at yoroso usum-e yaya worak Erom nggweyak pem o Mbosera-nen lobok yusu iri-ge ta-o? At iri-ge tugup lak amawi min kwiye lag-et lobok yusu iri-ge ta-o?” luk yij-o. ”An-e Nagawan Indo inmiri yoso nabam-nen yusu-o. An-e onmbol nggwe rak onposo wene waruk lobok yusu-o” luk yij-o.

Nagawan Indo Yik Karok Woraso Nap

² ”Noluk-nen kat kusum-e anggut amburu mboloso nap usum amburu tobok tak pidnak nggal mimi mep yamok tag-o?” luk yij-o.

Nagawan Indo

³ ”An nelem nap ennggendumu ap misik-nen mbi yongga nirigit lag-o. Narig-et nak anggut engen amburu mbulugwi sa nggwigirik, anggut engen amburu mbologolat yemen kagwi nggal, ap enlem oboksa nisilepma bem nuwok-nen yemen eneyasola, eneyabi-ge yik sik luwasolar-e, nusum-e eneyabi-nen ngin luk keya bamu-o.

⁴ An-nen kemnggo purak tarem-e nanduk-net yemnak pigi iri na-ge an nilirak wisirik unpurak tarem iri na ndak yosola-net kwarukmu-o.

⁵ An-e yongga nururak onkore yigi-t nde, yongga nururag-e lak nde kagi-o. Nde, an yongga nururak lak ala karuk, an-e wendet yigi-o. Iri ala karuk, an nondomok namawi-net yongga norosolat, nondomok nisilepma-nen an yongga nirij-o.

⁶ An nisilepma kwiye worak pem-net ap enlem oboksa nuwok-nen enal lebarosolat, ir-e lak tak inpigi-o. Nde, it eneyabi-nen nggweyak keram worak pigi-o” luk yij-o.

Mbal Pem Nagawan-nen Isarael nap konak kwat inpidnak wene 63:7-14

⁷ Nagawan Indo-nen enabuwa kaso wene-ge wigarimin-o. At-nen kwaroso oboksa bem an-e at erembel wanimin-o. At-nen-e at ilirak enabuwa mondok kwarat kasolat, at-nen enabuwa kaso elem-e mondok lak yoso buk iri bem-e imbiringgar-e kwarat at ilirak enpem mberak poso-o.

⁸ Nagawan Indo-nen yosolar-e: ”Ndemeret it iri-ge an nilirak-net yili-o. Nambararak iri-ge lugud tak mbi kwaruwa bug-o” luk yij-o. Iri ala karuk, ar-e it inmiri yoso nap kwat yosolar-e,

⁹ it-nen anggun panggun kagwi mende-ge at ebem mbij-o. Nde, Nagawan Indo-nen-e it yongga unduwaklug-e, ap ala na, aid nap ala na, mbi wirik inpigit lag-o. Ar-e enabuwa kwarat kasolat me, Nagawan Indo ondomok-net wisirik enpamu-o. Ar-e o nanduk ereba-net mondok ndegel onposolat woraso-t nde,

¹⁰ it-nen-e Nagawan Indo imin wim mbarogolat, indi abi kalak pogolat woraiga-o. Iri yogola-ge, ar-e it inmin sirid nap kwat yosolar-e, it inmin wim mbarosolat woragij-o.

¹¹ Iri yosola, it-nen-e Nagawan Indo ndegel poso nap Musa woragid tarem-nen woraiga ereba na inndi yebet kil mborogolat-nen yogolar-e: ”At ilirak ennggendumu enne kulugwi nab-e yi koma nggwe-t nde, lit unpuruk ndilagaid Nagawan Indo iri na-ge ngge me worasu-o? Amawi it wok indid Nagawan Indo iri na-ge ngge me nde worasu-o?

¹² Nagawan Indo inggi amawi worak Musa imin nosolat, pempa at unu kek tak pogolat wolmakluk, it enlengen pem yi koma mbuguksa pyry rak pid iri na-ge ngge me worasu-o?

¹³ It lit unpuruk, yi pyry rak nggwe-t nde, ndil lasolat, kura wam nembaga nggwe mborosolat nggal, it unuwok pijaksa na mbud yigit lak inmin mbirid Nagawan Indo iri na-ge ngge me worasu-o?” luk yiga-o.

¹⁴ Tusuangge mak turak sapi wam nduguluk mburugwi nggal, Nagawan Indo-nen at ilirag-e it enpabok kwarurak sa ndegel unpuruk mbirij-o. At ilirag-e lit unpuruk mbirid iri-ge at unu kek tak puwakluk kwarij-o.

Enabuwa kasolat, yongga ondosolat yuwakluk tepan yidnak wene 63:15–64:12

¹⁵ Nagawan Indo wa-e. Kat woraso sa marak abinal worak aid arem-nen kerengen-e mbel niniyi-o. Kat kamawi woraso min nenabuwa kaso min-e ngge rak pigenma-o? Nunpud kaso min nenabuwa kwarat kaso min-e ngge rak pigenma-o? Nenabuwa yigit lak keya nunpurak pug-o.

¹⁶ Kar-e nit nineid-net yusu-o. Abarakam min Yakup min-e nir-e enaru bug-et nde, Nagawan Indo wa-e. Kar-e nit nineid, o nanduk ereba-net nit ninmiri yoso-nen yusu-o.

¹⁷ Nagawan Indo wa-e. Noluk-nen keya ninpigenma, nir-e pul yili-o? Noluk-nen kar-e nit ninndi amawi rak posola, nir-e kat kaye kali bug-o? Kat ndegel kubugwi nap min kat kondomok kilirak min ereba na enabuwa-nen nden kuruk lobok yi-o.

¹⁸ Noluk-nen kat kuwim nab-e kat kuwi iri na unuwok liri rak pogolat, kat kondobo marak iri na kopkap tobok tak pogolat kwaruwakluk keya nak inpigen-o?

¹⁹ Kat-nen nit kwat nonposolar-e, kat-nen tena nunpuruk woraso buk nggal tak nonposolat, nit na kat kilirag-e lak nggal nde yik neneyasolat kwarusu-o.