YESAYA 58 - Nanduk Ngget Tul Pidnak Wene

Ndemeret ndemeret nunggwi mende ninggit lak, tepan nak yugwi wene 58:1-12

¹ Nagawan Indo-nen yosolar-e: ”Mondok kenne nggoksa wirik purag-o! An nilirak-nen meya yidnag-e ’Meya iri nggal kwarigepma-o’ luk yak undurag-o!

² It iri-ge pempa an nerembel wanogolat, an nindi-n pidnak enaru yogolat worali-t nde, iri nggal kwarogolar-e, an-nen idnak imiri mbarak pidnak wene iri na ndak ndak kwarugwi nggal kwatli-o. Iri nggal kwarogolat-nen it-nen yogolar-e: ’Kat-nen idnak imiri mbarak pidnak wene mot mot iri nak wok nindi-o. Nde, nir-e kat kerembel wanugwi iri-ge nindingen-o’ luk yili-o” luk yij-o.

³ Nde, it ap enlem iri na-nen yogolar-e: ”No manggim-nen Nagawan Indo-ge neneyagit lak worala-t nde, nit nak-nen nunggwi mende ninggit lak, tepan nak yogolat, at-nen-e kwara lombot ninpigit lak yosola-t nde, nit nak-nen at eram tebe yili-o?” luk yogola, Nagawan Indo-nen yosolar-e: ”Kit-nen nunggwi mende keya buruk, tepan nak yogolar-et nde, kit kondomok-nen ukwe pidnak ereba na kore yogolat, onggo wok undurak pem keneyabu wanugwi nap enmberam lali-o.

⁴ Kir-e nunggwi mende keya buruk, an nemengen mbarogolat-net nde, kir-e yuk puk mbogolat, yig nggogolat, kinsilepma bem yi kwatlik ndi kwatlik kwatli-o. Kit kinndi-nen peragolar-e: ’Nit nunggwi mende keya buruk, tepan yili iri-nen ndowaga Nagawan Indo-nen kuluwa-o’ luk perali-a?

⁵ Kit-nen nunggwi mende keya buruk, tepan yogolar-e, kondomok-nen andi bandi rak pogolat, tusuangge-nen kwaroso nggal kenanggul mbara ujo rak pogolat, kunsum abak yemarak puruk, mabe pil yaga keya buruk, ebem mbiring yili-o. Kit-nen nunggwi mende keya buruk, tepan nak yik tenak woragwi-ge iri kwatli irir-a? Kit kinndi-nen-e: ’Nit-nen iri kwatli iri-nen Nagawan Indo-ge indingen nenperasu-o’ luk perali-a?

⁶ Yu nggal kwasa nunggwi mende keya buruk, tepan yurak iri perak an-e nindingen-o: Kamarak anggun panggun tak onposo min ap enpem angin worak pogolat, lugud tak kwat unpugwi min iri oboksa tesa keya burag-o. Ap anggun panggun tak unpugwi nab-e wisirik unpurag-o.

⁷ Kit-nen idnak nunggwi mende-ge ap nere worali nab-e tembesa wok undurag-o. Ap unuwi na lak, enlengen ma na lak nab-e kenma rak onpogolat, ap unsum lak nab-e sum yirik onpogolat, kondomok keneyabi minggirik-nen ’Yongga nundurag-o’ yogola-ge, enne-t kulurag-o.

⁸ Iri kwarogola-ge, o kil posola yaya pusu iri nggal yaya rak konposolat, kit-nen idnak ud ereba na ndag-et nak ambut yosolat, an-e pempa kinmiri yosolat kinmin irit woramin-o. An nggetlel kunpuruk woralar-e, mondok kinminep leget wa kunpuruk woramin-o.

⁹ Kit-nen nde an neram tepan yogola-ge, an-nen-e kenne erep nggarimin-er-o. Nde, kit-nen an neram wene mbo bil luwagola-ge, an-nen-e kenne kulimin-er-o. Kit-nen-e ab-e tuguruk lel mberel unpurak pug-o. Sirid mbarak woragwi min nobokpe kobokpe yugwi min-e mondok keya burag-o.

¹⁰ Kit-nen-e nera woragwi nab-e nunggwi mende mak ondogolat, nde, anggun panggun arem woragwi nab-e yongga ondogolat, iri kwarugup nde ala-ge, ndamuk kit kendam worasu ereba-ge mondok lengge nggal yaya kwat ma-o.

¹¹ An-nen-e pempa lit kunpuruk nosolat, nggweyak le rak pem-et nde, kinmbitsa mak kondosolat woramin-o. Kenmawi min kenpem mbenag-et worabokluk yik keneyarok woramin-o. Kir-e yi worak ma engen amare worak yagidnak yabu nggal woragolat, yi ulusu eberek yoso buk nggal woragolat yugub-o.

¹² Nde, o siri abu tudsa langgona labuk yidnak ereba na-ge kit-nen tuguruk worogolar-e, mabin-e nanduk-nen pidnak iri na bem-net wurugub-o. Ap-nen kunnu yarogolar-e: ’Kerep pak leget tuguruk worogolat, o yigisa ndamera labuk yidnak ereba na ndop noksa ondolma rak pugwi nab-o’ luk yuwa-o” luk yij-o.

We woragwi tarem iri na nggok tak pugwi nap onggo wok undurak yidnak wene 58:13-14

¹³ Nagawan Indo-nen yosolar-e: ”An-nen we woragi tarem iri-ge an namanggim mondok kek tak purag-o. We woragwi tarem-e kit kondomok kenmanggim kwarogolat wolmomtak pug-o. We woragwi tarem iri kek tak pogolar-e, nin me nan me mbirigit lak, yabu na mondok wanigit lak, ebe lak wene na yigit lak nde ala-ge,

¹⁴ kir-e an ndegel nobogolar-e, kenalen kagub-o. An-nen enarem yabu wanosola-ge, yi wi ndi wi oboksa-nen kek tak kunpuwa-o. Kir-e konmbo Yakup mbal tidnak nggweyak pem-nen yagidnak ereba na nok tenak kenalen pem kunluk woragub-o luk Nagawan Indo an-net yigi-o” luk yij-o. 59:1-21 Pasal yu arem-e Mbal Pem Nagawan ene lomboksa yoso nap-nen-e Isarael nap-nen meya kwarugwi ereba na nggomo ondosolat met onposola, it-nen-e it meya yidnak parak pogola, Nagawan Indo-nen-e ”Kinmiri yimin-o” luk lud tak pidnak wene min mbarak worasu-o.