YESAYA 42 - Nanduk Ngget Tul Pidnak Wene

Nagawan Indo ndegel oboso nap 42:1-9

¹ Nagawan Indo-nen yosolar-e: ”An ndegel noboso nap an-nen tena buruk woraso, an-nen lenak pigi, an nalen tak poso-ge yu-o. At-nen-e ap enlem oboksa mot mot kwarugwi wene yak indil mburuwakluk, an-nen an nindi at ebem pukmu-o.

² Ar-e ene mba sa yilik, ene nggok sa mbo bilik iri-ge yuwa bug-o. Tula tula ereba me-nen na ene yil nuwa bug-o.

³ Yorowa ta yidnag-e pok tak puwa bug-o. Tal mondok nigi yekluk yusu iri-ge mondok nigirik puwa bug-o. Ar-e tugup lag-et mot mot kwaroso elem iri na bem kwat onposolat wolma-o.

⁴ Ar-e indi kabak yigit lak, tugup lak iri-net at-nen mot mot kwaroso elem iri na-ge nggweyakma yu me nggok tak puwa-o. O erepma nin sa woragwi-nen-e at-nen mul ondoso wene kulurak indingen ma-o” luk yij-o.

⁵ Nagawan Indo Mbal Pem Nagawan-nen-e mbal ndak worak puruk, yemara bij-o. Nggweyak na at-nen kwarak puruk, ebem yak yoso mende min-et kwasa bij-o. At-nen-e nggweyakma nab-e unluk tak poso inndisep min inndi min wok indij-o. At-nen-e at ndegel oboso nap iri na ebem wene posolat-nen yosolar-e:

⁶ ”Mot mot kwarugwi elem na nggok tak ponokluk, Nagawan Indo an-net wene mbo kuburuk, yabu kebem pukmu-o. Kat kebem-nen ap enlem oboksa inmin kwendeyekluk, an-net lit kuburuk nosolat, yik keyarok woramin-o. Kat kebem-nen an-e ap enlem oboksa yaya rak inpimin-o.

⁷ Kar-e enlengen ngguru enlengen kuwara wok ondosolat, o kubu me woragwi nap wisirik onposolat kwarugun-o.

⁸ An nunu-ge Nagawan Indo-net yusu-o. An-nen kek tak woraso-ge mbal pem nagawan misik mbi mondok wok timin pug-o. An nanggu nobok mboroso elem iri na-ge an-nen-e kugwiwak ereba eram kegera keya bimin pug-o.

⁹ Nde, an-nen ’Iri nggal kwat ma-o’ luk urul pigi na-ge yawo-ge nam yij-o. An-nen-e wene ngget erep kenaru rak pusu-o. Iri kwat yigit lak ma-net ’Iri nggal kwat ma-o’ luk watsa yak kundusu-o” luk yij-o.

Erembel wanidnak ndawi 42:10-13

¹⁰ Nagawan Indo ebem ndawi ngget misik ngarer-o. Yi wi ndi wi oboksa wa-e. At nak erembel waner-o! Yi koma min arem woraso mende oboksa min wa-e. At erembel wanogolat kene o nggu nggal lek ker-o! O erepma min iri me woragwi nap min wa-e. At nak erembel waner-o!

¹¹ Nembaga karu me min o siri iri me min-e Nagawan Indo nak erembel wanuwag-o. Nde, Kendat woragwi nab-e at nak erembel wanuwag-o! Nde, o siri Sela woragwi nab-e enalen-nen sa nggwa mbuwag-o. Ndobo anggul pem-nen enne nggoksa kum mbo buwag-o.

¹² It-nen-e Nagawan Indo nak kek tak ubuwag-o. O erepma nin sa nan sa-nen na at unu nak wigaruwag-o.

¹³ Nagawan Indo-ge wim wari nggal wim mbareyekluk mburusu-o. Ap san ombo misik-nen wim nggurak amawi kunduruk mboroso nggal mburusu-o. At-nen-e wim nggurak pem ene-nen mburusu-o. At amawi na-ge at imin wim nap inmbiri bem nam tak pusu-o.

Mbal Pem Nagawan-nen at ilirak inmin-e ”Yongga-t kindimin-o” luk urul pid wene 42:14-17

¹⁴ Mbal Pem Nagawan-nen yosolar-e: ”An-e pi-net mamak puruk, nene lak woralar-e, abu nemnde kamarak woragi-o. Nde, yawo-ge an-nen kwarurak tarem wok yosola, an-e kweyap-nen li yane wurugwi nggal nene nggwa yusu-o.

¹⁵ Ndobo amun min ndobo nggok min-e an-nen usu nggwara keya bosolat, yagidnak mende oboksa an-nen terabet tak pimin-o. Nggweyak mbirik min yi min an-nen nden yaga nembaga karu nde kwarak pimin-o. Nde, yi yinggirik oboksa mondok eberek tak pimin-o.

¹⁶ An nelem nap enlengen ngguru-ge an-nen ininggi waruk mborosolar-e, it enaru buk tula nggwe-t inmin mbirimin-o. Nde, ndamug-e it enambigir-e an-nen-e yaya rak pimin-o. Nde, tula lalik mbilig-e marengen nggal mot tak pimin-o. It ’Iri nggal kwat inpimin-o’ yigi iri-ge mondok ndemeret kwar-et inpimin-o.

¹⁷ Ta-nen nde kugwiwak ereba na bem nde inndi wat tak puruk woragolat, kugwiwak ereba na min-e ’Yu-ge nit nenmbal pem nagawan-er-o’ yugwi nab-e nggweyel onpogolat, innggiri rak puwa-o” luk yij-o.

Isarael nap-nen ”Nggomo nundurag-e lag-o” yidnak wene 42:18-25

¹⁸ Nagawan Indo-nen yosolar-e: ”Keneyanggo lak nap wa-e. Kwara koler-o! Kenlengen ngguru nap wa-e. Yik ker-o!

¹⁹ An ndegel noboso nap Isarael mondok erengen ngguru-t nde, iri nggal erengen ngguru-ge ta-o? An-nen wirik ibil lobok yidnak nab-e mondok eyanggo lag-et nde, iri nggal eyanggo lag-e ta-o?

²⁰ Isarael wa-e. Kar-e kwarat kasu-t nde, kwara-ge lombot pusu bug-o. Kat keyanggo-ge kuwarag-et nde, kar-e kwara kulusu bug-o” luk yij-o.

²¹ Inmiri yurak iri-ge Nagawan Indo-ge alen kwarar-o. At-nen yidnak wene ndak ndak kwarogolat, kek tak purak iri-ge ar-e mondok indingen-o.

²² Alat nde, at ilirak iri na-ge enarengge ondoro rak puruk, enpe-ge ondoro nggweyak arem nenaril lobok yidnak ereba na me unpuruk woragolat, o kubu me kura onpogolat yiga-o. It iri na-ge inmiri lak yariya wok onpogolat, enarengge lak tak pogolat yiga-o.

²³ Kit kennggendumu-ge ta-nen wene yu kologolat, pempa yebet kagolat woragub-o?

²⁴ Isarael iri-ge nden unpuwaklug-e ta-nen iminep wisirik pij-o? Iri-ge Nagawan Indo ondomok-net iminep wisirik pamu-o. Iri kwarid iri-ge nit-nen at erengen pem-e at-nen yidnak yidnak kwarigit lak yogolat, meya nak kwarogolat, at-nen mul nindidnak wene na imbirik mbirigit lak yogola karuk, at-net iminep wisirik pij-o.

²⁵ Nit-nen iri nggal kwarogolat, at isilepma mondok kwiye worak iri na nenpem mbosola, wim kwarat nggogolat andi bandi kali-o. Kanduk-nen pagoso nggal at isilepma kwiye worak iri-nen Isarael wi-ge kan pusu-o. Alat nde, nir-e kwara yebet kagit lak yogolat, nit nenpem mbidnak ereba bem-e kwara nenaru yigit lak yige-o.