YESAYA 35 - Nanduk Ngget Tul Pidnak Wene

Inmiri yurak sa mburugwi tula wene 35:1-10

¹ Nggweyak karu me amburu lak min-et alen kujwa-o. Karu me engen nggeret isi poso min-et wigak yosolat, emende pera yil lobok yuwa-o.

² O lid karu me nemena nggok yosolar-e, alen-nen kot kasolat ndawi yuwa-o. Abage konag-e ndobo Libanon nggal irit kwat ma-o. Abage-ge Karamel mbirik min Saron min nggal irit ma-o. Nde, ap ondomoktak-nen-e Nagawan Indo amawi min Nenmbal Pem Nagawan abinal min irit kagolat wolma-o.

³ Ininggi ababok lak yidnag-e amawi rak pogolat, ndeyak-nen ndowaga onowak kot kot yugwi-ge tugup lak tak per-o.

⁴ Kit-nen inndi kabak yidnak nap ereba na yak ondogolar-e: ”Kir-e kinndi tugup lag-et wolmer-o. Kwiye yurak pug-o. Kenmbal Pem Nagawan-nen-e kunuwim nab-e angin worak enpem posolat, kit kinmiri yekluk-nen lobok yuwa-o” luk yak undurag-o.

⁵ Iri tarem-e ap enlengen ngguru-ge enlengen kona yik kagolat, ap eneyanggo lak wene kulugwi buk na enne kulugwi kwat yogolat ma-o.

⁶ Ap onowak wat yidnak-nen na onowak mot luk, urusa wam-nen kwaroso nggal kud mbok kud mbok mborogolat, ap enne lak woragwi-nen na enne kuwakluk, enalen-nen enne nggoksa yogolat yuwa-o. Yi lak ma nembaga karu me-t nde, yi ulusu pilana wasolat, karu me-t nde, yi mborosolat ma-o.

⁷ Sisiri le rak embem kwarat ereba na me-t nde, yi ugup kwat yosolat, nde, nggweyak amburu lak ereba na me-t nde, yi ulusu kwat yil lobok yosolat ma-o. Nde, nanduk-nen ndakngge nak woraso ereba na me-ge mboro lem min mbisi lem min yak ma-o.

⁸ Iri me-ge tula nggok na wolmar-o. Nde, tula iri unu-ge ”Inmiri Yurak Sa Mburugwi Tula-o”. Meya yugwi nab-e tula iri nggwe-ge mburuwa bug-o. Ap indi lak-nen na tula iri nggwe mburugwi nab-e kabak tak unpuwa bug-o.

⁹ Nde, iri me-ge singa min isilepma worak erep min-e mondok wolma bug-o. Nde, Nagawan Indo-nen inmiri yuwa nab-e iri me nogolat wolma-o.

¹⁰ Nagawan Indo-nen wisirik unpuwa nab-e tuguruk mburuwarik, Yerusalem nggogolat, enalen-nen ndawi kundugu ngguwa-o. Enalen-nen entare-ge yek mbek tak irit ma-o. Ir-e enalin enalen yogolat, inndi puru yugwi min yani yane wurugwi min ereba na-ge mondok lak ma-o. 36:1–39:8 Empat pasal ya arem-e Asiut nap ennggendumu Nagawan Sanegirip-nen-e Yewura nap indil lobok yosoma, Mbal Pem Nagawan-nen kwiye worak mende kwarosolat, Yerusalem o siri iri na Asiut san omborak ininggem-nen inmiri yidnak wene min Nagawan Iskia na wat momtak kugwi wirij-et nde, ki rak ibidnak wene min mbarak worasu-o.