YEREMIA 6 - Nanduk Ngget Tul Pidnak Wene

It Isarael nap-nen lit unpuruk noso Nagawan Indo iri na keya bidnak wene 6:16-21

¹⁶ Nagawan Indo-nen at ilirak yak ondosolar-e: ”Kir-e tu nandogol kandogolma ereba mendak woragolat, kwara lombot pogolat wolmer-o. Tula nanduk-nen mburugwi ereba na kwara kin wanogolar-e: ’Tula ereba na ennggenggerak-nen tula konag-e ngge-o?’ luk kin wanurag-o. Nde, kit-nen konak yamuksa woraboklug-e, tula irit mborogolat wolmer-o” luk yak indij-et nde, it-nen yogolar-e: ”Nir-e tula iri mbururag-e ninmbir-o!” luk yiga-o.

¹⁷ Iri luk, at ilirak-nen ene pu yugwi mende (terompet) kuluruk, inndi yenggerak puwaklug-e, Nagawan Indo-nen-e tu yik karok wolmomtak nab-e pempa len onposolat woragij-et nde, at ilirak-nen yogolar-e: ”Nir-e mondok kulul pug-o” yiga-o.

¹⁸ Iri yogola karuk, Nagawan Indo-nen yosolar-e: ”Ap enlem oboksa wa-e. Kwara koler-o! An nilirak enpem kwat ma mende-ge kir-e mondok kenaru yurag-o.

¹⁹ O yu-ge wa-e. Kwara kuli-o! An nilirak-nen an-nen mul indidnak wene wanigit lak yogolat, an-nen yidnak yidnak kwatli buk-nen ndowaga it ondomok inndi-n pidnak kwarugwi bem an-nen-e lak tak onposo mende enpem pil lobok yimin-o.

²⁰ No manggim-nen ir-e an namanggim emben konak kemenan-e o Seba-nen waruk lobok yogolat, undu rak pugwi mende-ge o nin sa-nen waruk lobok yogolat kwatli-o? An-e it-nen an namanggim pili mende-ge an-e nisili kasu-o. Iri-nen it-nen namanggim wosa kan pili na nisili rak pusu-o.

²¹ Ap yeba-ge unuwok abis pijaksa mbud tak inpimin-o. Iri kwarosolar-e, ineidtak min inlirak min ennggamirak min it entalu korok korok woragwi nap min it oboksa mondok lak ma-o” luk yij-o.

Abare abam (utara) nggwe-nen enpem mbud yurak wene 6:22-30

²² Nagawan Indo-nen yosolar-e: ”O erepma abare abam (utara) nggwe-nen ap enlem nggok enmawi worak misig-e kit kinmin wim mbaril lobok yekluk lid lud tak pusu-o.

²³ Ir-e san min tege min mondok wanigarik, insilepma min enlengen lamburak lobok yogolat keya kunpuwa bug-o. Nde, it-nen Yerusalem naril lobok yurak pem kura wam ujok ene mbirib-e nggwid ene mbirip nggal lobok yuwa-o” luk yij-o.

²⁴ Wene iri nggal kulurug-e, Yerusalem woragwi nab-e mondok enmawi lak yosolat, kwiye elem enarem nggosolar-e, ”Ngge kwarul-o?” luk, kweyap-nen li ndaguwokluk yane wurugwi nggal yane wiriga-o.

²⁵ Wim nap-nen san kundugu lop lop worak woragola me, Isarael nab-e mbepme na mbirigit lak, yapmu na mbirigit lak, kwiye nggitlik nak woraiga-o.

²⁶ Nagawan Indo-nen at ilirak yak ondosolar-e: ”Kir-e tabun sum yutluk, mabe ma mbiring mbaring kwarer-o. Kit lak tak kunpurak nab-e mimo kenpem kore ma me, kir-e inlirak misiget tagoksa wat yosoma-nen inndi abi kalok yogolat, tabun puruk woragwi nggal-et tabun puruk yip togolat wolmer-o” luk yak indij-o.

²⁷ Iri luk, Nagawan Indo-nen Yeremia yak tosolar-e: ”Kat-nen logam posid abut mbarusu ereba na nggal-et an nilirak enabut kwara mbari-o.

²⁸ It iri oboksa-ge wene kulugwi buk, tembaga min mbesi min amawi nggal inndi amawi, eyak nak wat tenak woragwi-nen yili-o. It iri-ge ap onpok pugwi wene nak waruk waring tenak woragolat, enmben to yili-o.

²⁹ Tembaga min mbesi min kopkap ereba na lena keya burak pem kan-e embem kwiye worag-et kere yusu-t nde, yi nggal kwat yosolat, kik ereba na-ge keya boso bug-o. Iri na nggal an nilirag-e wewesa ebe konak nak lena labuk ma-o luk, pempa inndi kagolat kon enperenak worali-t nde, meya yugwi nab-e wirik inpili bug-o.

³⁰ It iri-ge Nagawan Indo an-nen mbo inpidnak me, ap-nen it unnu yarogolar-e, ’Mbo bidnak perag-o’ luk yuwa-o” luk yak tij-o.