YEREMIA 19 - Nanduk Ngget Tul Pidnak Wene

Nggweyak yimbe yenggak yidnak wene 19:1-15

¹ Nagawan Indo-nen an yak norosolar-e: ”Kar-e mburugundik, nggweyak yimbe misik onggo purug-e, Isarael nap ennggendumu enne kulugwi nap erep min tepan omborak inndi worak min enmengen mbarosolug-e,

² Pak Tumende Mbeling iri na nggwe Inom Mbirikmu mburugupndik, iri me-nen-e an-nen yak kirimin wene kuluwakluk kene nggoksa yurag-o” luk yak nirij-o.

³ Nagawan Indo-nen yak norosola, an-nen yosolar-e: ”Yewura nap nagawan nagawan min Yerusalem woragwi nap min wa-e. Nagawan Indo Mondok Amawi Worak, Isarael nap Kenmbal Pem Nagawan an-nen yusu wene yu kwara koler-o. Ndemeret an-nen-e mondok lak tak onposo mende kwiye worak irit o yu me pil lobok yumu, iri obok kulurug-e, kwiye-nen wendet ma-o.

⁴ An-nen iri kwarimin iri-ge it enlem yu-nen an keya nibiga iri bem-net kwarimin-o. Nde, it-nen-e it-nen enaru buk, onmborak-nen na enaru buk, Yewura nap nagawan nagawan-nen na enaru buk kugwiwak ereba na amanggim wosa kan pogolar-e, o yu na-ge emben to rak pili-o. Iri-nen it-nen erep kwarogolar-e, meya kwarugwi buk nap eneyabi-nen o yu kobong tak pili-o.

⁵ Nde, it-nen-e kugwiwak Mbaal amanggim it inlirak wosa amanggim kan purak ondoro koniga-o. Nde, iri kwariga iri-ge an-nen-e yak indigit na lak, iri-nen iri nggal kwarurak iri wene-ge an narem-nen na mondok yebet kagit lag-et nde, kwariga-o.

⁶ Iri bem-e yu me unu Topet yogolat, Inom Mbirig-o yili iri na keya buruk, ’Unlusu Mbarugwi Mbirig-o’ yuruk, unu yarurak tarem-e wog-et ma-o.

⁷ Yu me-nen Yewura nap min Yerusalem woragwi nap min-nen wene yimnik puruk woragwi iri na-ge lak tak posolat yugwi rugwi rak pimin-o. It iri-ge an-nen keya unpumu, unuwim nap-nen wim pem unduruk, urugwe nggwe rak unpuwa-o. It ontogwag-e keyap tak pumu, towe min isilepma worak ndakngge min-nen nok unpuwa-o.

⁸ An-nen lak tak onposo mende mondok kwiye worak o yu ebem mberak pil lobok yumu, ap yu nggwe lobok lik mbitlik yogolar-e, karuk, wendet luk, unmunggum lera mbogoluk mborogolat wolma-o.

⁹ Wim nap-nen-e o siri yu leget waburuk, o yu me woragwi nab-e unduwokluk tu kore yuwa-o. O yu lop lop worag-e mondok kwiye worak irit woragola, arem nggwe wolma nab-e nere-nen it nak nok kerak mbogolat, it inlirag-et nde, nonggolat wolma-o” luk yak norosola, yigi-o.

¹⁰ Iri lug-e, Nagawan Indo-nen yak norosolar-e: ”Nggweyak yimbe iri na-ge ap kat kimin nili nap ereba na inmbiri bem-et yenggarak puruk,

¹¹ an-nen yidnak wene yak undugun na-e” luk yak nirij-o. Nagawan Indo Mondok Amawi Worak-nen-e yu nggal yij-o: ”Ap enlem yu min o siri min-e nggweyak yimbe yenggarak pidnak konurak meya iri nggal, an-nen yenggara keya inpimin-o. Iri rak unpumu, ontogwag-e ap-nen Topet yu me yapma unpuwa-o. Nde, iri kwaruwa iri-ge it yapma unpurak ondoro lak-nen ndowaga Topet yapma unpuwa-o.

¹² O siri yu min yu me woragwi nap min-e an-nen-e Topet nggal kwarak inpimin-o.

¹³ Yerusalem iri me o oboksa min Yewura iri me nagawan nagawan ereba na unuwi min-e Topet nggal emben to yaga labuk ma-o. Iri kwat ma iri-ge, it unuwi ngguwa bem-e mbal pem woraso kugwiwak amanggim emben konak mende kan pogolat, iri-nen anggut amburu kugwiwak nin amanggim pogolat kwarugwi iri na-nen ndowaga kwat ma-o” luk yij-o.

¹⁴ Yosoloma-ge, o Topet Nagawan Indo-nen yidnak wene yak unduwakluk wirik nibid sa iri na me-ge keya buruk mbirigirig-e, Nagawan Indo uwi mborom mbirigirik, mendak woragi-o. Woralar-e, an-nen ap oboksa enaru rak posolar-e,

¹⁵ Nagawan Indo Mondok Amawi Worak, Isarael nap Enmbal Pem Nagawan-nen yidnak wene yak indigi-o. At-nen yosolar-e: ”Kir-e kinndi amawi, mondok wene kulugwi buk ala me, an-nen-e: ’O siri yu min o erep inggi inggi worali ereba min kenpem-e lak tak onposo mende mberak pil lobok yimin-o’ luk wat tak pigi ereba na-ge mberak pil-et lobok yimin-o” luk yij-o.