YEREMIA 15 - Nanduk Ngget Tul Pidnak Wene

Angin worak Yewura nap enpem mberak pidnak wene 15:1-9

¹ Nagawan Indo-nen an yak norosolar-e: ”Musa min Semuel min-nen an neram yu me mendak woragolat, it ap enlem yu an-nen enabuwa yuwakluk nemengen mbaruwa-t nde, an-e ap enlem yu-ge mondok enabuwa yimin pug-er-o. Ap enlem yu-ge an-nen yik iniyudtag-e mondok nimbir-o! ’Ndak mberer-o’ yak indi-o!

² It-nen yak korogola-t nde: ’Nir-e ngge me mburul-o?’ luk yogola-ge, onggo-ge yu nggal yak indi-o: Nagawan Indo-nen yosolar-e: ’Kugwi-nen ndowaga wat mag-o yidnak ala-ge, kugwi-nen ndowaga wat mag-o. Nde, wim pem-nen nde wat mag-o yidnak ala-ge, wim pem-et wat mag-o. Nde, nere-nen wat mag-o yidnak ala-ge, nere-net wat mag-o! Nde, kamat unpuruk mburuwag-o yidnak ala-ge, kamat unpuruk mburuwag-o!’ luk yij-o.

³ Nagawan Indo an-nen-e it enpem mburak angin worak mende empat irit it enpem mbuwag-o luk, lud tak pidnak worasu-o. Iri-ge: ir-e wim pem unduwama, ontogwag-e yengge-nen lit unpuruk mborosolat, towe-nen-e nok onposolat, ndakngge isilepma worak-nen nuruk, lak tak unpuwa-o.

⁴ An-nen-e nggweyakma yu me ap enlem oboksa-nen it eneyarug-e, kwiye-nen unmunggum pil kagwi rak inpimin-o. An-nen iri kwarak inpimin iri-ge Nagawan Manase Isikia ambara iri na-nen Yerusalem iri me Yewura nap ennggendumu nagawan worasolat-nen kwaridnak pem-et kwat inpimin-o” luk yij-o.

⁵ Nagawan Indo-nen yosolar-e: ”Yerusalem woragwi nap wa-e. Ta-nen kir-e kenabuwa kujwa-o? Ta-nen kit kenabuwa-nen-e inndi puru yuwa-o? Ta-nen kit kendam wok luk woralat, kit-nen woragwi kin wok kunpuwa-o?

⁶ Kir-e an-e abu mbo nuburuk, keya nibigepma-o. Iri bem-e an-e nisilepma mamak puruk woralat, nisili yarik me, kit yigisa lak tak kenpeyekluk ninggi wisirigi-o.

⁷ O yu me-nen o siri lombok oboksa kir-e magere engen nggal mbo konposolat ndibi ndi rak kinpimin-o. Kir-e an nilirag-et nde, kit-nen woragwi kenpage nden yaga nin tak pili buk iri bem-nen an-nen-e kit min kinlirak inmin-e lak tak kinpimin-o.

⁸ Kit kenma-ge kweyap togwe nak kwarat, yi sisiri nggal mondok ligik lujwa-o. Ap oboksa unsujwe bem-et undumu, iniyarag-e yane worogolat wolma-o. Lengge irit an-nen-e lak tak onposo nap misik pil lobok yumu, ir-e kwiye-nen yane worogolat wolma-o.

⁹ Kwe misik ilirak tuju lak yidnak kwe-ge indisep yobok yosolat, igiris paga wat yusu-o. At uruk woraso-ge ndamuksa labuk yij-o. Ar-e unu lak yaga ombol pem nggosa labuk yij-o. Nde, kit kunuwim nab-e kit kennggendumu erep worali ereba unduwakluk, inpil lobok yimin-o. Mondok Nagawan Indo an-net yigi-o” luk yij-o.

Yeremia-nen ”Noluk ndesa mbigi-o?” luk yane worosolat Nagawan Indo yak tidnak wene 15:10-21

¹⁰ An-e mondok ndemeret nimbiri lamut-nen yusu-o! Noluk-nen an niya-nen-e nderak nibij-o? O yu me woragwi nap oboksa inmin-e an-e mondok ngguno nak nggogolat, yuk puk nak mbogolat worasu-o. An-e abok-nen uwi yagurag-o luk na narengge wok ondoso buk, iri-nen it enarengge na uwi yagimin-o luk na wanoso bug-et nde, ap oboksa-nen imbiri lamut tak nibili-o.

¹¹ Nagawan Indo wa-e. An-nen nde neyabu iri na kwara wanigit lak yosolat, an nuwim nap nde lak tak onposo mende enpem mbosolat, anggun panggun mende enpem mbosola karuk, an-nen nde it enmanggim kat kemengen mbarigit lak nde ala-ge, it ap ereba-nen imbiri lamut tak nibili ereba-ge ebe-ge nebem mbuwag-o.

¹² (Ap misiger-o luk mbi-nen mbesi tenggerak purag-e meya-o. Nde, mbesi abare abam (utara) nggwe-nen tembaga min nat karuk konidnak mbesi-ge mondok tenggerak puwa bug-o.)

¹³ Nde, Nagawan Indo-nen an yak norosolar-e: ”O an nilirak woragwi sa-nen an nilirak-nen meya kwatli onggo posolar-e, an-nen-e wim nap endam inpil lobok yumu, it-nen-e an nilirak enaringgi enarengge min insilobulo min oboksa pijanuruk mburuwa-o.

¹⁴ Nde, an nisilepma-ge kan mare nggal yirip wirip mbosolat, nisilepma lak tak purag-e meya yusu me, it an nilirak iri-ge o it enaru buk ereba me it unuwim nap ndegel unpugwi nap kwarak inpimin-o” luk yij-o.

¹⁵ Yosoloma, an-nen yosolar-e: ”Nagawan Indo wa-e. Kar-e karu-o. Kindi yebet neyaruk, yongga niri-o. It an ininggiyapma rak nobogolat, muk neyagolat kwatli ereba-ge kat-nen kemnggo inpi-o. Kar-e it inmin-e kindi-nen tusuruk kwarosolat worala, it-nen an nururak iri-ge meya-o. Kat kebem-nen ndowaga an pesel nibili yu kindi yebet ki-o.

¹⁶ Kat-nen an nimin wene yosola-ge, kat-nen yusu wene oboksa-ge an-e kuligi-o. Nagawan Indo, Mbal Pem Nagawan Mondok Kamawi Worak wa-e. An-e kat karengge-nen yusu-o. Iri bem-e, kat-nen yidnak wene-nen nalen tak posolat, nindi yek tak posolat kwarij-o.

¹⁷ An-e enalen pem ndok wutluk woragolat, wene ngen ndakwi nap inmin-e ndok wutluk, it-nen kwarugwi kwaroso bug-o. Alat nde, an-e kat-nen yidnak yidnak nak kwarosolat me, narik ereba-t nisilepma min woraso-o.

¹⁸ Noluk-nen an-e andi bandi nak kerenak worasu-o? Noluk-nen an ud yu-ge ambut yigit lak, emesiyak nak worasu-o? Kar-e iri kwat nubusu iri-ge o kibi bem-nen yi eberek yusu iri na nggal an nindi sik ndiyak yosolat, nindi kabak makluk-nen kwarusu-a?” luk yigi-o.

¹⁹ Iri yosola, Nagawan Indo-nen onggo yak norosolar-e: ”Kat-nen nde tuguruk lobok yosola-ge, an-nen-e wog-et kibimin-o. Wok kuburug-e, tuguruk an ndegel noboso nap tak kibimin-o. Kat-nen nde ebe lak kenesiget wene keya buruk, ndemeret ebe worak wene-t yak ondosola-ge, kar-e tuguruk an nene lomboksa yoso nap tak kibimin-o. Iri yosola-ge, ap-nen-e kat keram nde lobok yogolat wolma-t nde, kat-nen-e it endam-e mburugun pug-o.

²⁰ An-nen kat kwat kobosolar-e, it-nen kat kimin-e tembaga posid pak leget nggal mbit mbat tak irit yik kiyujwa-o. It-nen kat kimin wim mbaruwa-t nde, it-nen-e kar-e urugwe nggwe rak kubuwa bug-o. Kat nggetlel kobosolat, kimiri yosolat, kimin-et woramin-o.

²¹ An-nen-e enlengen lamburak nak meya yugwi nap iri na ininggem-nen wisirik kibimin-o. Nagawan Indo an-net yigi-o” luk yij-o. 16:1–17:27 Pasal mberen ya arem-e Yewura nap enpem angin worak mende mbuma wene min Yeremia-nen Nagawan Indo-nen yongga wuruwakluk emengen mbaridnak wene min Mbal Pem Nagawan-nen Isarael nap yak ondosolar-e: ”We woragwi tarem-e yu nggal kwarogolat wolmomtag-o” luk yak indidnak wene min mbarak worasu-o.