WONARIDNAK WENE 9 - Nanduk Ngget Tul Pidnak Wene

Mberen pem tak pogolat O Wot Kaidnak Tarem saiga wene 9:1-14

¹ Isarael nap Mesira keya buruk mbirigarik, olengen misik woraruk, mberen pem tak pogolar-e, waneya anggul-et iri bem-e Sinai lidmu-nen Nagawan Indo-nen Musa yak tosolar-e:

^2-3 ”Waneya yu arem tanggal empat belas pem-e mo wusa mbosola keyama nggwe-ge Isarael nap oboksa-nen-e ’Iri kwarurag-o’ luk yidnak ndak ndag-et O Wot Kaidnak Tarem yebet kagolat sagurag-o” yij-o.

⁴ Yosoloma-ge, Musa-nen-e: ”O Wot Kaidnak Tarem sagurag-o” luk Isarael nap yak indij-o.

⁵ Yak ondosoloma-ge, waneya anggul-et iri bem tanggal empat belas pem keyama nggwe ge Sinai lid iri na me-nen Isarael nab-e it-nen kwarurak Nagawan Indo-nen Musa yak tid ereba na ndak ndag-et kwarogola saiga-o.

⁶ Alat nde, it ennggendumu ap ereb-e ap lugwinik enaboro enpem yidnak me, mbilaro ngin yidnak ala karuk, it sakola ennggendumu nggwigir-e lag-o. Ap ereya na-ge Musa min Arun min endam wok yogolat-nen

⁷ yak ondogolar-e: ”Ndemeret, nir-e ap lugwinik imin nenpem yidnak me, mbilaro ngin-et nde, noluk-nen nit nak nennggamirak inmin Nagawan Indo amanggim pogolat sagurag-e larok tak ninpiga-o?” luk yak indiga-o.

⁸ Yogolikma, Musa-nen yosolar-e: ”Pug-o. Naptag-o. Nagawan Indo-nen yak norosola-nen yak kindimin-o” luk yak indij-o.

^9-10 Yurug-e, kin wanosoloma, Nagawan Indo-nen Musa yak tosolar-e: ”Wene yu Isarael nap yak ondosolar-e: ’Kit kennggendumu-nen ala na, kit-nen wigarak-nen ala na-nen nde ap lugwinik imin enpem yosolat, tu erepma mburukmu-nen O Wot Kaidnak Tarem wok yosolat yuwa-t nde, abok sakolar-e,

¹¹ waneya nandug-et iri na worarug-e, waneya mberen pem tak pogolat tanggal empat belas pem kubu nggwe O Wot Kaidnak Tarem yebet kagolar-e, lomba wam min oroti lomboroso mende pigit lak woraidnak oroti min mbingga ngari worak misik min norag-o.

¹² O Wot Kaidnak Tarem sagidnak nunggwi mende ereba-ge mondok yugu purak pug-o. Wam sakup ereba na-ge owak misiger-o luk mondok tenggerak purak pug-o. Sakolar-e, O Wot Kidnak Tarem-nen sakwi oboksa mondok ndak ndag-et kwarurag-o.

¹³ Alat nde, it ap wat yidnak iri na imin na enpem yigit lak, tu erepma na mbirigit lag-et nde, O Wot Kaidnak Tarem iri sagurak liring liring tak pili nab-e an namanggim pugwi tarem ar-e an namanggim wosa pigit lak yarik me, mondok an nelem nab-e wolma bug-o. At meya yidnak onggo-ge ebem mbumar-o.

¹⁴ Ap sal-nen nde kit O Wot Kaidnak Tarem sakola, kinmin sagurak yosola-ge, ”Iri tarem kwarurag-o” yidnak ereba na oboksa-ge ndak ndag-et kwarosola-nen sagurag-e ob-er-o. Nde, ”Iri nggal kwarurag-o” luk yidnak ereba-ge Isarael nap-nen na irit, erem nin nap-nen na irit, kwat tenak wolmomtag-o’ yak indi-o” luk yak tij-o.

Nggan nggan abinal worak-nen lit unpuruk mbiridnak wene 9:15-23

^15-16 Nagawan Indo uwi iri na abu worak piga tarem iri-ge nggan nggan-nen Nagawan Indo uwi na-ge muruk tak pij-o. Nde, muruk tak pid nggan nggan iri na-ge kubu-nen-e mondok kanduk nggal irit kaiga-o.

¹⁷ Nggan nggan iri na nde posokluk mborosola-ge, Isarael nab-e nin me mbururak pem unuwi lije mijara waruk mburugwi-o. Nde, mburukmu, nggan nggan iri na nde mbuwasola-ge, mbuwasu sa iri na me-t unuwi lije wiril lobok yugwi-o.

¹⁸ Iri kwarogolar-e, Isarael nab-e Nagawan Indo-nen yidnak pem-et unuwi lije mijatluk mborogolat, at-nen yidnak pem-et unuwi lije worogolat kwaril mbiriga-o. Nde, nggan nggan iri na posokluk mbirigit lak iri na me-t worala-ge, nin me mbirigit lak iri na me-t woragolat kwaril mbiriga-o.

¹⁹ Nde, nggan nggan iri na mbirigit lak Nagawan Indo uwi lije anggul pem-et worala-ge, ir-e Nagawan Indo-nen yidnak yidnag-et kwarogolar-e, mondok iri na me-t woragwi-o.

²⁰ Alat nde, erep-nen-e we kenan pem nggal nak nggan nggan na-ge Nagawan Indo uwi lije iri na bem woraso-o. Nde, it mbururag-a? Wolmomtag-a? Iri-ge Nagawan Indo nak-nen: ’Wolmer-o. Mberer-o’ yoso-o.

²¹ Nde, nin tarem-e nggan nggan iri na-ge keyama kuri-nen kuplila kuri nak woraso-o. Woraruk nggan nggan iri na nde kuplila posokluk mborosola-ge, Isarael nab-e mburugwi-o. Nde, lengge ala na, kubu ala na, nggan nggan iri na nde posokluk mborosola-ge, ir-e mburugwi-o.

²² Nggan nggan iri na nde Nagawan Indo uwi lije iri na anggul pem woralat, mberen tarem ala na, waneya misik ala na, olengen misik ala na, are, misik ombol nggwe terak menna ala na, nggan nggan na nde iri me-t worala-ge, ir-e iri na me-t woragwi-o. Alat nde, nggan nggan iri na posokluk mborosola-nen perak ir-e mburugwi-o.

²³ Nagawan Indo-nen Musa yak tidnak iri na ndak ndag-et Isarael nab-e misik me woraruk, iri na me-nen nin me mborogolat kwarugwi-o. 10:1-32 Ayat ereya arem-e it Isarael nap enlem duabelas ereba na-nen Sinai lidmu keya buruk, Nagawan Indo-nen ”Wok kindimin-o” luk urul yak indidnak wi iri na nggwe mbiriga wene mbarak worasu-o.”