WONARIDNAK WENE 27 - Nanduk Ngget Tul Pidnak Wene

Musa ondolma Yosua lenak pidnak wene 27:12-23

¹² Nagawan Indo-nen Musa yak tosolar-e: ”Kar-e ndobo Abarim pem lagundik, an-nen Isarael nap wok indimin o iri na yik ki-o.

¹³ Yik kasolug-e, kat kowe Arun wat yid nggal-et wat yugun iri-ge,

¹⁴ kit mberen-e Sin karu me-nen an nene tarigep pem wat yugun-o. Meriba-nen it pidsa-nen an nebem ujwa mbarogola-ge, yi wok undurak pem an namawi na-ge it inmbiri bem nam tak purag-e larok yigepma-o” luk yak tij-o. (Nde, iri kwariga iri-ge, Sin karu me yi lusu Meriba o Kandes iri me-nen kwariga-o.)

^15-16 Yosoloma, Musa-nen tepan yosolar-e: ”Nagawan Indo Mbal Pem Nagawan ap oboksa unluk woragwi elem wok ondoso wa-e. Kat-nen ap yeba lit unpuruk mbururak nap mbi lenak pi-o.

¹⁷ Kat kelem nap yu-ge lomba ombo lak nggal nggilarak keya unpurag-e meya-o. It wim nggogola, anggul tak purak nap wim wari misik lenak pi-o” luk yij-o.

¹⁸ Yosoloma, Nagawan Indo-nen Musa yak tosolar-e: ”Nun ambara Yosua iri wene mbo bi-o. At iri-ge abam mondok ndak-nen yusu-o. At irit anggul tena bi-o.

¹⁹ At iri-ge tepan ombo Eleasat min Isarael nap oboksa min inmbiri bem men mag-o. Men yosola-ge, kat-nen oboksa yak ondosolar-e: ’An nondolma-ge at yur-o’ luk yak indi-o.

²⁰ Yak ondosolug-e, it Isarael nap-nen at-nen yidnak yidnag-et kwaruwak-nen kat-nen tena woraso yabu ereb-e at ebem pi-o.

²¹ Nde, Yosua-nen-e at-nen kwarurak iri-ge tepan ombo Eleasat kin wok uburag-o. Iri yosola-ge, Eleasat-nen an nindi-n pidnag-e Urum min Tumim min pem nen-e aru ma-o. Iri nggal kwarosolar-e, Eleasat-nen-e Yosua min Isarael nap oboksa min-nen kwarogolat wolmomtag-e mirik unpuwa-o” yak tij-o.

²² Iri yosoloma-ge, Musa-nen-e Nagawan Indo-nen yak tid iri na ndak ndag-et kwarosolar-e, Yosua na-ge tepan ombo Eleasat min Isarael nap oboksa min inmbiri bem mendak puruk,

²³ inggi Yosua anggul tena buruk-nen Nagawan Indo-nen yak tid iri na ndak ndag-et yosolar-e: ”Yosua yu-ge an nondolmar-o” luk yak indij-o.