WONARIDNAK WENE 22 - Nanduk Ngget Tul Pidnak Wene

Moap nagawan-nen Mbileyam yongga pidnak wene 22:1-21

¹ Nde, Isarael nap yeba na mbirigarig-e, o Moap lidmu Yi Yareren eyak ponok nggwe o Yeriko koroga ereba me o lije wiril lobok yiga-o.

^2-3 Iri yogola, Sipot ambara Mbalak, Moap nagawan iri na-nen Isarael nap-nen Amori nap kwat inpidnak wene min it Isarael nap enpe mondok kwarat iri wene min kulurug-e, at min at-nen tenagidnak wi woragwi nap oboksa inmin-e kwiye-nen ye le mbiga-o.

⁴ Iri yogola-nen Moap nap-nen Mirian nap ennggendumu ap yok nggok ereba na yak ondogolar-e: ”Ap laga mbaga rak unpugwi nab-e sapi-nen tusuangge lera bem naso nggal nit nendam woraso mende yi mende ndi mende yeba-ge mondok lera bem nujwa-o” yak indiga-o. Iri ala, nagawan Mbalak iri-nen-e

⁵ ap erep wirik onposolar-e, Mbeot ambara Mbileyam o Amori wi o Petot yi Eperat koroga o Amau nggweyak pem iri na me worasola, eram wirik inpij-o. Wirik onposolat-nen wene wosa Mbileyam amanggim posolar-e: ”Wene yu-ge Mbalak-nen yusu-o. At-nen yosolar-e: ’Wene yu kwara yebet ki-o. Ap enlem nggok misik Mesira-nen wagolar-e, nit woragwi sa yebet yil mborogolar-e, nit ninmin wim purak lid lud tak pili-o.

⁶ Ir-e mondok enmawi worak me, kar-e mondok lobok yugundik, an yongga norosolat kat-nen inmbiri lamut tak onponog-o. Iri yosola-ge, nit-nen urugwe nggwe rak unpuruk, langgara wirik unpul nde ma-o. Nde, kat-nen inmbiringgat tak inpidnak nab-e, inmbiringgar-et woragolat, nde, kat-nen inmbiri lamut tak inpidnak nab-e inmbiri lamur-et woragolat yugwi iri-ge an-e mondok ndemeret naru-o’ yij-o” luk yak indij-o.

⁷ Iri yosoloma, wene na waruk Moap nap min Mirian nap min ennggendumu-nen enne kulugwi nap ereba na-ge Isarael nap inmbiri lamut tak purak pem onggo min Mbileyam eram wirik inpij-o. Iri yamu, Mbileyam eram wok yogolar-e, Nagawan Mbalak-nen wene wosa pid wene ereba na yak tiga-o.

⁸ Yak togola, Mbileyam-nen yak ondosolar-e: ”Kir-e yu me nene yer-o. Kup-nen Nagawan Indo-nen yak nuruwa wene-ge yak kindimin-o” yosoloma-ge, ap yok nggok mbiriga ereba na-ge Mbileyam woraso sa nene yiga-o.

⁹ Nene yogola, Mbal Pem Nagawan Mbileyam eram lobok yarik-nen Mbileyam yak tosolar-e: ”Kat woraso sa worali nap ereba-ge tarag-o? yak tij-o.

¹⁰ Yosoloma, Mbileyam-nen onggo yosolar-e: ”It iri-ge wene waruk Moap nagawan Mbalak-nen inpil lobok yidnak nab-o.

¹¹ Nde, wene waruk lobok yogolar-e, ap enlem nggok misik Mesira-nen wasolar-e, nin me nan me nggogola karuk, Nagawan Mbalak-nen-e at yongga worosolat an-nen it iri inmbiri lamut tak onposola, inmin wim mbatluk maga wirik unpurak wene waruk lobok yigarig-o” luk yak tij-o.

¹² Yosoloma, Mbal Pem Nagawan-nen Mbileyam yak tosolar-e: ”Isarael nap iri-ge an-nen inmbiringgat tak inpidnak me, kar-e it iri inmin mburugundik, inmbiri lamut tak unpurak pug-o” luk yak tij-o.

¹³ Yosoloma, kub-e Mbileyam-nen Mbalak-nen wirik inpil lobok yid nap ereba na yak ondosolar-e: ”Kit nak mberer-o. An-e Nagawan Indo-nen-e: ’Inmin mbururak pug-o’ yak neramu-o” yak indij-o.

¹⁴ Yosoloma, it na mbirigarik, Mbalak yak togolar-e: ”Mbileyam-e nit ninmin lobok yurag-e larok yij-o” yiga-o.

¹⁵ Yogolikma, Mbalak-nen-e nanduk wirik inpid nab-e siyak teberak nggal wirik inpij-et nde, imbirik wirik onposolar-e, ap enpe na kwarat, ap kek tak enne kulugwi nab-et tuguruk wirik inpil lobok yij-o.

¹⁶ Mbirigarik, Mbileyam eram wok yogolar-e, Mbalak-nen wene wosa pidnak wene-ge yu yak tiga-o: ”Nab-o. Kar-e mondok larok yurak pug-o. Mondok lobog-et yurag-o.

¹⁷ Onggo kwarat wok kirimin-o. Kat-nen nggi yugun mende-ge wog-et kirimin-o. Kat lobok yugundik, yongga norosolat it yu inmbiri lamut tak inpi-o” luk yid iri na yak tiga-o.

¹⁸ Alat nde, Mbileyam-nen it yak ondosolar-e: ”Nagawan Mbalak-nen at ama woraso emas min perak min oboksa ereba wok nuruwa-t nde, an-nen erembel wanoso Nagawan Indo Mbal Pem Nagawan ene-ge mondok kwid timin pug-o. Ene mariger-o luk na tarimin pug-er-o.

¹⁹ Alat nde, kir-e it nanduk lobok yidnak-nen kwariga nggal-et yu me-t nene yer-o. Nde, an-e Nagawan Indo-nen-e yak nururak wene mbi worasu, lak? Are, lag-a? kulimin-o” luk yak indij-o.

²⁰ Iri na tarem kubu-ge Nagawan Indo lobok yarik, Mbileyam yak tosolat-nen yosolar-e: ”It ap ereba-ge kat kimin mbururak lobok yidnak me, kar-e inmin mbururak lid lud tak pi-o. Alat nde, kat-nen kwarosolar-e, kwarurak yak kiridnak iri nak kwarurag-o” yak tij-o.

²¹ Nene luk kub-e egelerai wam iri na bem kore yugwi ondoro iri na puruk, ebem kore luk Moap nap ennggendumu-nen enne kulugwi nap ereba na inmin mbirij-o.

Mbileyam egelerai-nen kwat ibidnak wene 22:22-35

²² Nde, Mbileyam na mborosola-ge, Mbal Pem Nagawan isilepma kwarat yij-o. At egelerai bem kore luk mborosolar-e, at ndegel ubugwi nab-e mberen inmin mbirij-o. Nde, at na mborosola-ge, Nagawan Indo-nen idnak aid nap misig-e at mburuwa naru tulabiyem pak tij-o.

²³ Mborosoma, kelerai iri na-nen aid na kabo tenaga tulabiyem pak tak iri na karug-e, kelerai iri na-ge nden karuk yapmu nggwe mborosoma Mbileyam-nen-e owam na wosa tuguruk sera tulabiyem puruk mborosoma,

²⁴ anggut yabu nin wok nin wok kerep leget ponok ponok kobokma iri na me aid nap iri na-ge pak tak larok yij-o.

²⁵ Iri ala, kelerai iri na-ge aid nap iri na karuk, mimik luk mborosolar-e, Mbileyam owag-e kerep leget mangonokma tagarij-o. Iri yosola, Mbileyam-nen-e tugurug-et kelerai na-ge wirij-o.

²⁶ Nde, iri me-nen aid nap na-ge mberarik, tula mondok nggorokma kigit nggwe kware nggwe mondok nimik yurak puk sa iri na me pak tij-o.

²⁷ Pak tarik worasoma, kelerai iri na-nen aid nap iri na karug-e, mondok erare nggwe mbiring yosola-ge, Mbileyam-nen-e isilepma-nen kelerai na-ge mondok wangun pem wirij-o.

²⁸ Worosola-ge, Nagawan Indo-nen kelerai iri na ene worak tak pamu, kelerai iri na-nen Mbileyam yak tosolar-e: ”Nombo. An-nen-e kar-e no kwat kubukmu-nen kar-e kenan pem-et nirigen-o?” luk yak tij-o.

²⁹ Yosoloma, Mbileyam-nen erep nggarosolar-e: ”Kar-e an-e kerengenma nggal tak nuburuk yu nggal kwat nubusu yu-nen kirigi-o. An nde yalawi ninggem nggal-nen-e mondok ndemeret ketleb-o” luk yak tij-o.

³⁰ Yosoloma, kelerai iri na-nen yosolar-e: ”An-e nombo kat-nen pempa nebem koreluk noso kegelerai nar-o. Nde, an-e yu nggal mbi kwat koboso-a?” yosoloma, Mbileyam-nen yosolar-e: ”Iri nggal-e kwat noboso bug-er-o” luk yij-o.

³¹ Iri lug-e, Nagawan Indo-nen Mbileyam erengen kuwarak pamu-ge, aid nap kabo inggi tenaga mendak iri na karug-e, ereya na-net Mbileyam na-ge erare nggwe tud luk erembel wanij-o.

³² Aid nap iri na-nen Mbileyam kin wok obosolar-e: ”Kar-e noluk-nen kegelerai-ge kenan pem-et wirigen-o? An-nen yebet kasolar-e, kat mburusu iri-ge meya-t ala karuk, an-e kerarem pak til tal mburusu-o.

³³ Nde, kelerai iri-nen an neyarug-e, kenan pem-et nin nggwe mbirij-o. Nde, nin nggwe nde mbirigit lak nggal-nen-e an-nen-e mondok korosolat kegelerai nak keya beleb-o” luk yak tij-o.

³⁴ Yosoloma, Mbileyam-nen yosolar-e: ”Nab-o. An meya kwarigi-o. Kar-e an nabuwok menda pak tak woraigen-e an-e kabak woragi-o. Alat nde, kat-nen an mburusu yu-ge meya-t neberasu ala-ge, an-e tuguruk nama mbirimin-o” luk yij-o.

³⁵ Iri yij-et nde, aid nap iri na-nen yak tosolar-e: ”Ap ereba inmin nak mbiri-o. Alat nde, we an-nen yurak yak kirimin iri nak yurag-o” yosoloma, Mbileyam na-ge Mbalak-nen inpil lobok yidnak nap ereba na inmin mbirij-o.

Mbalak-nen Mbileyam wok ibidnak wene 22:36-40

³⁶ Mbalak-nen kulidnggal, ”Mbileyam lobok yusu-o” yogola kulurug-e, imin lambuk yurak pem mbirij-o. O at mbirid iri-ge Moap nggweyak arem, Moap nggweyak maksa Yi Aronon eyak pem iri mbirij-o.

³⁷ Mberarik, Mbalak-nen Mbileyam yak tosolar-e: ”Nandug-et yonggo kibigi-t nde, noluk-nen lobok yigit lak yigen-o? Kat kindi-nen yebet kasolar-e: ’At yu nggal-e onggo-ge wok nuruwa bug-o” luk-nen kwarigen, lak?” luk yak tij-o.

³⁸ Yosoloma, Mbileyam-nen onggo yosolar-e: ”Yawo an-e lobok yigi-t nde, an-nen nak wene-ge yilik ndilik yimin pug-o. Are, Mbal Pem Nagawan-nen an-nen yurak yak nuruwa iri nak yimin-o” luk yak tij-o.

³⁹ Iri luk, Mbileyam na-ge Mbalak imin luk o Usot mbirigarig-e,

⁴⁰ iri me-nen-e Mbalak-nen sapi min lomba min siyak worarik, mbara Mbileyam min at imin lobok yidnak nap yok nggok ereba na min mbal indij-o.

Mbileyam-nen mondog-et tel korosolat abok-nen kwat momtak urul yidnak wene 22:41–23:12

⁴¹ Nene luk kub-e Mbalak-nen-e Mbileyam imin luk, ndobo Mbamot Mbal pem laiga-o. Laigarig-e, iri me-nen-e Mbileyam-nen Isarael nap erep yik iniyil mbirij-o.