WONARIDNAK WENE 13 - Nanduk Ngget Tul Pidnak Wene

Ap duabelas o yen enlengen waruk mbiridnak wene 13:1-2

^1-2 Nde, misik tarem-e Nagawan Indo-nen Musa yak tosolar-e: ”Kat-nen Isarael nap enlem duabelas iri ennggendumu enne kulugwi nap nak ya lit nda lit ap duabelas lini-o. It-nen an-nen Isarael nap wok indimin Kanaan wi iri na limbinil mburuwak-nen lenak inpi-o” yak tij-o. 13:3-24 Ayat ya arem-e Kanaan wi o yen wil mbiriga nap ereba na unnu mbarak min Musa-nen it yak indidnak wene min mbarak worasu-o.

²⁵ It o yen enlengen waruk mbiriga na-ge lombonogolat empat pulu bem woraruk, lobok yogolar-e,

²⁶ wene warug-e Musa min Arun min Isarael nap Paran lidmu Kandes worali ereba na oboksa min-et yak indiga-o. Yak ondogolar-e, it enlengen-nen kaidnak yak ondogolat, it-nen engen waruk lobok yidnak min inmbiri bem nuk kagolat kwariga-o.

²⁷ Iri yogolat, it-nen Musa yak togolar-e: ”Nit o iri limbinigerig-e, nggweyak na amburu worak, yi mende ndi mende na mondok kwarat kaige-o. Nde, iri me-nen waruk lobok yige engen mariger-e yebar-o.

²⁸ Alat nde, iri me woragwi nab-e mondok enmawi worak nag-o. Nde, it unuwi siri-ge mondok nggok nak-nen kerep pak leget kambuk tag-o. Nde, ap na kwiye worak mondok yok nggok elem nag-o.

²⁹ Nde, Amalek nab-e o iri me-nen-e abare ena nggwe (selatan) worali-o. Nde, Et nap min Yebus nap min Amori nap min it iri-ge iri me-net nde, ndobo worak nggwe worali-o. Nde, Kanaan nab-e yi koma inggi nggwe min Yi Yareren urusu umbut linik worali-o” luk yiga-o.

³⁰ Alat nde, it ap kwiye yogolat Musa imin: ”Yu nggal-o, iri nggal-o” luk kirimbi yili nap ereba na inndi uwi yabosolat Kalep-nen yosolar-e: ”It urugwe nggwe rak unpurak nit nenmawi-ge kwarat worasu-o. Yawo-t inmin wim mbatluk unuwi nggweyak mengga wanuwog-o” luk yak indij-o.

³¹ Alat nde, Kalep min lobok yiga nap ereba na-nen yogolar-e: ”Iri me woragwi nab-e mondok enmawi worag-et me, nit-nen inmin wim mbarurag-e mondok meya-o” luk yiga-o.

³² It-nen o yen mbiriga iri na wene enesiget Isarael nap ennggendumu wigarogolar-e: ”O iri-ge iri me woragwi nab-e mondok nok onposo kaige-o. Nde, ap iri me woragwi nap enpe-ge mondok yok nggok elem na eneyaige-o.

³³ Nde, iri me-nen ap mondok kwiye worak yok nggok iri-ge ap Enak-nen wigarak irir-o. Nde, nit-nen it inmin ndak worogolar-e, mondok nir-e sapmari nggal kaige-o. Iri ala-ge, it-nen yik neneyagolat na iri kwarag-et yik neneyaiga-o” luk wigariga-o.