TUGURUK YIDNAK WENE 9 - Nanduk Ngget Tul Pidnak Wene

Isarael nap Nagawan Indo-nen yidnak yidnak kwarigit lak yidnak wene 9:1-29

¹ Musa-nen yosolar-e: ”Nenggamirak Isarael nap wa-e. Kwara koler-o. Yawo-ge yi Yareren mbatluk ndil lugupndik, kir-e kenlem na marik, kenmawi na lag-et nde, ap enlem terak minik nggok-nen enmawi worak unuwi nggweyak iri na me kore yurak pem ndil lagub-o. Nde, it unuwi siri-ge yok nggok nak, nde, o siri yeba pag-e nggasiril abu laidnag-o.

² Nde, ap enpe-ge mondok kwiye worak yok nggok lem, enmawi worak nak me, ’It inmin wim mbarurag-e ap misiger-o luk tet meya-o’ luk yogola, kuligep nar-o.

³ Alat nde, yawo-ge Nagawan Indo Kenmbal Pem Nagawan-e lak tak poso kanduk nggal iri na lit kunpuruk mborosolar-e, at-nen kunuwim nap urugwe nggwe rak unpuwa iri-ge kenlengen-nen kagub-o. Iri rak onposola-ge, kit-nen-e at-nen urul yak kindid iri na ndak ndag-et maga wirik onpogolat ndag-et nde lak tak unpugub-o.

^4-5 Kit kenmanggim Nagawan Indo Kenmbal Pem Nagawan-nen it iri maga wirik onposola-ge, kit nen-e: ’Nir-e konag-et, Nagawan Indo Nenmbal Pem Nagawan Indi-n pidnak ndak ndag-et kwarogola-nen ndag-et nak it unuwi nggweyak iri winde yurak wok nunpuruk ndil wagid iri-ge wok nundurak ndag-et wok nindij-o luk yebet kudtak pug-o. Mondok iri-ge lik lak sa-o. Nagawan Indo-nen kit kenmanggim it maga wirik unpuwa iri-ge, ir-e meya kwarugwi ala-net wirik unpuwa-o. Nde, Nagawan Indo-nen-e it onnggweyak wanobokluk larok nak yuwa iri-ge at-nen kit konmborak Abarakam min Isak min Yakup min urul yak indid iri na ndak ndak tak posolat-nen kwaruwa-o.

⁶ Yu yebet ker-o. Nagawan Indo Kenmbal Pem Nagawan-nen o nggweyak amburu worak iri kininggem puwa iri-ge, kit-nen wanurak ndag-et ala-nen wanugub-e lag-o. Alat nde, kir-e wene kulugwi buk lem-et nde, wok kunduwa-o.

⁷ Nembaga ereba-nen Nagawan Indo isilepma rak pigep ereba na kinndi yebet ker-o. Nanduk kit Mesira keya buruk lobok yigep kuri-nen yawo kuri Nagawan Indo imin wim mbal tenak irit worali-o.

⁸ Sinai ndobo bem-nen na irit, Nagawan Indo isilepma kwarat tak pogola, at nen kit lak tak kunpurak peragid nar-o.

⁹ Nde, an-e Nagawan Indo-nen kit kinmin kondosolat, urul pidnak wene mbarak kerep iri na waneyekluk Sinai ndobo bem lagirik worasolar-e, lengge empat pulu, kubu empat pulu woralar-e, nunggwi mende min yi min ninggit lak woragi-o.

¹⁰ Worasoma, Nagawan Indo inggi-nen mbaridnak kerep mberen ereya wok nirij-o. Nde, wene kerep ereya ebem mbarag-e kit ndobo iri ayo bem ndok worak woragola, kanduk arem nggwe-nen kenmanggim yidnak wene ereya na mbarag-o.

¹¹ Nde, lengge empat pulu, kubu empat pulu worarug-e, Nagawan Indo-nen urul pidnak wene mbarak kerep mberen ereya na wok nirij-o.

¹² Wok norosolug-e, Nagawan Indo-nen an yak norosolar-e: ’Kar-e ndag-et nak mbi-o. Kelem nap Mesira-nen wok unpuruk lobok yigen ereba-ge meya nggok mbi kwarigarig-o. An-nen yidnak wene keya buruk, lugud tak nggwe mborogolat, kugwiwak mbi erembel wanurak ndak wirigarik worali-o’ yij-o.

¹³ Nagawan Indo-net tuguruk yak norosolar-e: ’It iri-ge mondok wene kulugwi buk lem iri-ge an-e mondok naru-o.

¹⁴ An tena nubusu-ge meyog-o. It iri-ge an-nen mondok lak tak unpumu, unnu abu lak ma-o. Alat nde, an-nen-e kar-e it iri nggal-e lak, are, ap enlem terak minik nggok enmawi worak misik onmbo rak kibimin-o’ luk yak nirij-o.

¹⁵ Yosoloma, an-e urul pidnak wene mbarak kerep mberen ereya na ninggi mberen-nen wanuruk mbuwasolar-e, ndobo amare lasu iri na nggwe-t mbuwagi-o,

¹⁶ Mbuwasolat-nen yik keneyaginggal-e, kir-e kit-nen erembel wanurak posid logam pem-nen sapi misik ndak wosa pogolar-e, Nagawan Indo Kenmbal Pem Nagawan ene tarogolat, at imin meya nggok kwarogola keneyagi-o.

¹⁷ Iri kwarogola karuk, urul pidnak wene mbarak kerep mberen ereya na-ge kenlengen pem-et an-nen nggweyak pem mbo bil mbiginggal, yigisa labuk yij-o.

¹⁸ Iri luk, tuguruk ndobo bem lagirik, Nagawan Indo eram iri me tud tak worasolar-e, nunggwi mende min yi min ninggit lak lengge empat pulu, kubu empat pulu irit woragi-o. Iri kwarigi iri-ge kit-nen Nagawan Indo erengen pem meya kwarogolar-e, meya-o luk yik kaso iri na kwarogola, at isilepma yosola-nen kwarigi-o.

¹⁹ Iri yosola-ge, Nagawan Indo isilepma mondok kwarat kit kenpem posolat, kit lak tak kenpeyekluk yosola, kwiye kwarat kagi-o. Alat nde, Nagawan Indo-ge an nene koloso me, iri tarem min-et kulij-o.

²⁰ Nagawan Indo isilepma-ge Arun ebem min-et puruk, at wururak yij-et nde, an-nen-e Arun min-et imiri yuwakluk tepan yukmur-o.

²¹ Nde, kit-nen posid logam pem sapi ndak wirigep iri na-ge an-nen kan puruk, ndamera yigisa mabe nggal tak puruk, mabe-ge yi waru ndobo bem-nen mburusu iri na arem mberak pigi-o.

²² Nde, kir-e o Tabera-nen na, Masa-nen na, o Kiborot-tawa-nen na kir-e Nagawan Indo isilepma rak ibigepma-o.

²³ Nagawan Indo-nen: ’Kandes Mbareneya keya buruk mburugupndik, kit wok kindimin o iri na me kore yer-o’ yak kindij-et nde, Kenmbal Pem Nagawan-nen yidnak wene-ge ndemerer-o luk kwarigit lak yogolar-e, tarigeb-o.

²⁴ An-nen kit naru yigi kuri-net kir-e Nagawan Indo imin eyak wat tenak worali-o.

²⁵ Iri kwarogola, Nagawan Indo-nen lak tak kunpurak wat tak pidnak karug-e, Nagawan Indo eram nerare nggwe tud tak worasolat, lengge empat pulu, kubu empat pulu irit woralat-nen tepan yosolar-e:

²⁶ ’Nagawan Indo kek tak wa-e. Kat kamawi kumbunu kwarat pem Mesira-nen wesera wok unpuruk lobok yigen kelem nap yu-ge lak tak unpurak pug-o.

²⁷ Kar-e it-nen wene kulugwi buk, lugud tak nak kwarogolat, meya kwarogolat yugwi iri yebet kudtak pug-o. Are, kat ndegel kubugwi nap Abarakam min Isak min Yakup min nde yebet iniyi-o.

²⁸ Kat-nen nde kelem nap lak tak unpugunmu-ge, Mesira nap-nen yogolar-e: ’Ar-e ndegel unpuruk, o urul yak indid iri na me mbururak amawi lak ala karuk, isili rak unpuruk-nen nembaga ereba-nen lak tak inpij-o’ luk yak kuruwa-o.

²⁹ Nagawan Indo wa-e. Yu yebet ki-o. It ap enlem yu-ge kat-nen len unpuruk, kat kelem nap tak inpigen-o. Iri rak puruk kamawi kumbunu kwarat puruk, Mesira-nen wok unpuruk lobok yigen-o’ luk tepan yigi-o” yij-o.