TUGURUK YIDNAK WENE 8 - Nanduk Ngget Tul Pidnak Wene

It wolmomtak wi o mondok konak urul yak indid wene 8:1-10

¹ Musa-nen yosolar-e: ”Nagawan Indo-nen konborak urul yak indidnak wi iri na me kunluk woragolar-e, kwarat wigak yogolat, o iri na winde yoboklug-e, imiri mbarak pidnak wene oboksa an-nen yawo yak kundusu yeba-ge mondok mot mot nak kwarogolat wolmer-o.

² Nagawan Indo Kenmbal Pem Nagawan-nen lit kunpuruk tu erepma nembaga nggwe kinmin wasolar-e, olengen empat pulu (40) woraigep iri yebet ker-o. Nde, tu erepma nggwe-t lit kunpuruk lobok yid iri-ge, kit kenarem-e ngge kwarak worasu-o? luk, kinndi kasolat, an-nen enpem pimin wene-ge ndak ndag-et kwaruwa, lak? luk-nen kinndi kasolat-nen kenabut mbarij-o.

³ At-nen keyaptak kenpamu nere yogola-ge, mana wok kindij-o. Nde, mana iri-ge konmborak-nen na irit, kit-nen na irit mondok nunggwi bug-et nde, mak kindij-o. Nde, Nagawan Indo-nen iri kwarid iri-ge ab-e nunggwi mende bem nak-nen-e unluk woragwi bug-o. Are, Nagawan Indo-nen yidnak wene bem nak-nen unlug-et woragwi-o luk mirik konposolat-nen kwarij-o.

⁴ Nde, kir-e olengen empat pulu (40) yeba worali-t nde, kunsum na lebena mbigit lak. Kunuwok na limbirigit lag-o.

⁵ Nagawan Indo Kenmbal Pem Nagawan-nen nggomo kondosolar-e, ineidtak-nen inlirak nggomo ondogolat undugwi nggal-et kindid iri yebet ker-o.

⁶ Iri bem-e, Nagawan Indo Kenmbal Pem Nagawan-nen kwarurak kenpem pidnag-et kwarogolat, imiri mbarak pidnak wene bem-et woragolar-e, at kek tak obogolat wolmer-o.

⁷ Nagawan Indo Kenmbal Pem Nagawan-nen wok kunpurug-e, o mondok nggweyak na amburu worak, yi na kwarat, yilusu na nggweyak yamuk tak nggwe ndobo arem-nen nggweyak amburu rak pil lobok yoso. O iri kinmin ngguwa-o.

⁸ Nde, o iri-ge nggandum mbato nin tak nan tak min anggut engen min ara engen min ndelima engen min e saitun elem min tamuk amburu min-e mondok uwi nggweyak-nen yusu-o.

⁹ Nde, iri me-ge ndak nak woragolat, nere na kagup pug-o. Nde, kerep ereba arem-e mbesi worasu-o. Nde, ndobo ereba yalugupndig-e, posid tembaga wanugub-o.

¹⁰ Iri me-nen nunggwi mende kinmbitsa nonggolar-e, Nagawan Indo Nenmbal Pem Nagawan nak erembel wanogolar-e: ’O nggweyak amburu worak wok nindigen pem-e wiwa-o’ luk erembel wanogolat woragub-o” yij-o.

Nagawan Indo meme rak puwa naru, inndi yeberak pidnak wene 8:11-20

¹¹ Musa-nen yosolar-e: ”Nagawan Indo Kenmbal Pem Nagawan meme rak pul naru, mondok kwara yik karok wolmer-o. At-nen idnak imiri mbarak pidnak wene yawo an-nen yak kundusu yeba-ge misiger-o luk mondok nano nano rak purak pug-o.

¹² Kit-nen nunggwi mende na ndag-et nonggolat, kit wolmomtak kunuwi na konag-et wutluk woragolat-nen nde

¹³ kensapi min lomba min kambing min kwarat yosolat, emas min perak min kenarengge mende erep min-et kwarat yosola-ge,

¹⁴ ereba bem kinndi kek tak pogolat, kit anggun panggun tak kunpugwi sa Mesira-nen wisirik kinpid nap Nagawan Indo Kenmbal Pem Nagawan iri na meme rak pugup naru mondok kwara yik karok wolmer-o.

¹⁵ Nagawan Indo-nen lit kunpuruk lobok yosolar-e, nembaga lid kwiye worak ereba me-ge waro eyak worak min kigaru na min yi na lak, nggweyak umbuk nggwe-t nde, at-nen kit kinmbitsa nujwakluk yi kerep arem nggwe-nen pil wasolat kwaril lobok yij-o.

¹⁶ Nembaga ereba-nen-e nunggwi mende konmborak-nen na kagwi bug-et nde, mana iri wok kindid iri-ge abok kit konak kwat kunpurak pem kinndi tebeluk wolma, lak? luk kinndi kayekluk-nen wok kindij-o.

¹⁷ Iri bem-e kit-nen yebet kagolar-e: ’Nit nondomok nenmawi bem-net nenmawi kondogolat yi mende ndi mende ombo yili-o’ luk yebet kudtak pug-o.

¹⁸ Yi mende ndi mende ereba-ge ’Nagawan Indo Nenmbal Pem Nagawan nak-nen wok nundusu-o’ luk yebet ker-o. Ereba wok kundusu iri-ge at-nen konmborak urul yak indid iri na ndak ndag-et kwarosolat yawo na wog-et kondosolat worasu-o.

¹⁹ Kir-e Nagawan Indo Kenmbal Pem Nagawan meme rak puruk, at eram-nen nden karuk mbal pem nagawan nin erembel wanogolat, ndegel uburak pug-o. Mondok kenaru wolmer-o. Kit-nen nde ereba kwarogola-ge, mondok ndemeret Nagawan Indo-nen lak tak kunpuwa-o.

²⁰ Kit-nen nde Nagawan Indo Kenmbal Pem Nagawan-nen yidnak yidnak kwarigit lak yogola-ge, ap enlem erep kit kenlengen pem lak tak inpid iri na nggal lak tak kunpuwa-o” luk yij-o.