TUGURUK YIDNAK WENE 7 - Nanduk Ngget Tul Pidnak Wene

Mbal Pem Nagawan-nen len inpidnak nap 7:1-11

¹ Musa-nen yosolar-e: ”Nagawan Indo Kenmbal Pem Nagawan-nen-e o kit pim wolmomtak sa urul yid iri na me kinmin mburuwa-o. Iri yosolar-e, iri me woragwi nap enlem kwarat maga wirik unpuwa-o. Kit kenlengen pem-et ir-e kenpe na marig-et, kenmawi na lag-et nde, ap enlem tuju mondok terak minik nggok, enmawi worak irit maga wirik unpuwa-o. Nde iri-ge Et nap min Nggirigasi nap min Amori nap min Kanaan nap min Peris nap min Ewi nap min Yebus nap min irit sera wirik unpuwa-o.

² Ap enlem ereba nde Nagawan Indo Kenmbal Pem Nagawan-nen waga kininggem posola-ge, kit-nen urugwe nggwe rak unpuruk, oboksa undurag-o. Enabuwa kagolat, inmin are kondogolat mondok kwarurak pug-o.

³ Kit nen-e it kwami na mondok wok unpurak pug-o. Kit kinlirak na ’It mende waner-o’ yak undurak pug-o.

⁴ Iri nde kwarogola-ge, it-nen kinlirak waruk erepma rak unpuwama, Nagawan Indo erembel wanigit lak, it unkugiwak erembel wanogola, Nagawan Indo isilepma kenpem posolar-e, ndag-et lak tak kunpuwa-o.

⁵ Iri bem-e ap enlem ereba-nen enmbal pem nagawan amanggim kan pugwi ondoro ereba-ge mondok ndamera keya ber-o. It-nen erembel wanugwi kerep sindil lobok yidnak ereba-ge mondok yigisa keya ber-o. Kugwi Asera erembel wanugwi e ereba na-ge ndara keya ber-o. Kugwi ut memera ndak wiridnak erembel wanugwi ereba-ge kan per-o.

⁶ Kit-nen ereba oboksa kwarugup iri-ge nggweyak ma yu me worali oboksa ennggendumu-nen Nagawan Indo Kenmbal Pem Nagawan-nen lesa wok kunpuruk at elem nap tak kinpidnak, at ilirak tak kinpidnak ala-n kwarugub-o.

⁷ Nde, Nagawan Indo-nen kenabuwa kwarat karuk len kinpid iri-ge, ap enlem yeba ennggendumu kir-e kenlem nggok ala kwarij-e lag-o. Ndemerer-e nggweyak ma yu me-nen-e kit kenlem-e marik komosar-o.

⁸ Alat nde, Nagawan Indo-nen len kinpid iri-ge, at-nen kenabuwa kasolar-e, konmborak inmin urul yak indid iri na ndak ndak tak posolat-nen kwarij-o. Iri bem-nen at amawi nggok pem kinmiri yosolat, Mesira nagawan-nen anggun panggun tak konposola inggiyapma-nen wisirik kinpij-o.

⁹ Nde, Nagawan Indo kit Kenmbal Pem Nagawan iri-ge Mbal Pem Nagawan misiget nak, ar-e pempa mot mot lud tak nak kwaroso-nen yusu-o luk yebet ker-o. Nagawan Indo-nen at-nen urul pidnak iri na ndak ndak tak posolar-e, at abuwa kagolat, at-nen enpem pidnak wene ereba na kwatli nap enabuwa kasolar-e, ap tap seribu-t (1.000) enabuwa kasolat wolma-o.

¹⁰ Alat nde, ap at insili rak ibili nap lak tak unpurak pem-e indi tusuruk kwaruwa bug-o.

¹¹ Iri ala-ge, kwarurak pem kenpem pid wene an-nen yawo yak kundusu yeba ndak ndag-et kwarogolat wolmer-o.

At-nen yidnak kwarugwi nap inmbiringgat tak unpurak yidnak wene 7:12-26

¹² Kit-nen nde at-nen kenpem pidnak wene ereba nde kwara yebet karuk mot mor-et kwarogola-ge, Nagawan Indo Kenmbal Pem Nagawan nen na at-nen urul yak kindid ereba na ndak ndag-et kwat kunpuwa-o. At-nen kit konmborak urul yak indid iri na ndak ndag-et at-nen kit kenabuwa kaso iri-ge pem irit kenabuwa kasolat wolma-o.

¹³ At-nen kenabuwa karuk imbiringgat tak konposolar-e, kinlirak kwarat tak onposolat, wonarogolar-e enpe kwarat irit ma-o. Konnggweyak amburu worak tak posola, keneyapmu yagidnak mende nggandum mbato min anggut engen min saitun amburu min wok kondosolat, iri-nen at nen imbiringgat tak konposolar-e, sapi min lomba minkambing min ereba oboksa-ge Nagawan Indo-nen wok kindid uwi iri na me woragolar-e, nanduk konmborak urul yak indid iri na ndak ndag-et oboksa wanugub-o.

¹⁴ Ap enlem nggweyak ma yu me worali nap yeba ennggendumu-nen ap enlem misiger-o luk mbi kit nen imbiringgat kwarat wanugup ereba nggal mbi wanuwa bug-o. Kit kenpe na irit kit konowam na irit mondok yibiri mbi woragup pug-o.

¹⁵ Yi kugwi ndi kugwi oboksa kenpem mbosolat, Mesira woragola, kenpem mbid lak tak onposo mende kenpem mbosolat ma naru, Nagawan Indo-nen inggi mbara wirik puwa-o. Lak tak onposo mende ereba-ge kit kunuwim nap oboksa enpem mberak puwa-o.

¹⁶ Ap enlem oboksa Nagawan Indo Kenmbal Pem Nagawan-nen waga kininggiyapma rak posola-ge, mondok unduruk lak tak unpurag-o. Enabuwa na yurak puk. It enmbal pem nagawan na mondok erembel wanurak puk. Kit-nen iri kwarogola-ge, iri-nen ndowaga mondok kenare pugub-o.

¹⁷ Kit-nen peragolar-e: ’Ap enlem ereba-ge mondok enpe-ge kwarat me, maga wirik unpurag-e meya-o’ luk nde pururak pug-o.

¹⁸ Alat nde, kir-e it enaye yurak pug-o. Nagawan Indo Kenmbal Pem Nagawan-nen Mesira nagawan min at-nen tenagidnak wi woragwi nap min kwat inpij-e yebet ker-o.

¹⁹ Lak tak onposo mende kit kondomok-nen kwiye worak kaigep ereba na kinndi yeberak wolmer-o. Nagawan Indo Kenmbal Pem Nagawan-nen kit wisirik kenpeyeklug-e, at amawi nggok pem-nen kwarosolar-e, wi yurak mende ereba kwarij-o. Iri nggal-et Nagawan Indo-nen-e kit-nen yawo enaye kali nap ereba na oboksa-ge iri nggal-et kwat unpuwa-o.

²⁰ Nagawan Indo-nen-e kwiye-nen sa nggwa mbugwi mende ennggendumu mberak puwama, ir-e kwiye kurak yil mburuwa-t nde, mondok lak tag-et unpuwa-o.

²¹ Iri ala kir-e ap enlem ereba-ge mondok enaye yurak pug-o. Nagawan Indo Kenmbal Pem Nagawan-nen nggetlel kunpuruk nusu-o. At iri-ge Mbal Pem Nagawan nggok kwiye worak-nen yusu-o.

²² Kir-e ndag-et nak misiget pem-et kunuwim nap ereba wirik unpugupnggal-e, ndakngge eyak wirik eyak worak ereba kwarat yosolat, nok kunpuwa naru, Nagawan Indo-nen marig-et torok, marig-et torok kit kendam-nen wirik unpuwa-o.

²³ Nagawan Indo Kenmbal Pem Nagawan-e kunuwim nab-e iri nggal kwasa kegera kininggem posolat, nari wari rak onposolat lak tak unpuwa-o.

²⁴ At-nen-e kit kunuwim nap nagawan ereba-ge kegera kininggem puwama, kit-nen undugub-o. Undurug-e, unnu min lak ma-o. Ap misiger-o luk tet mondok pak tuwa bug-o. Mondok oboksa lak tak unpugub-o.

²⁵ It-nen erembel wanugwi kugwiwak ininggi-nen ndak wosa pidnak mende ereba-ge mondok kan purag-o. Kugwiwak ereba bem panggarak pidnak emas ala na, perak ala na, kit-nen ukwe luk mondok wanurak pug-o. Kit-nen nde wene iri kwid togola-ge, Nagawan Indo ge kugwiwak erembel wanugwi iri-ge mondok isili me, kir-e mondok wat yugub-o.

²⁶ Kugwiwak ndak worak misiget ter-o luk mondok kenma purak pug-o. Iri mende iri-ge Nagawan Indo-nen imbiri lamut tak pidnak me, imbiri lamut tak ibidnak iri na-nen kit imbiri lamut tak kunpuwa naru, mondok kinsili rak puruk, no mende nggal irit yik kudtag-o” yij-o.