TUGURUK YIDNAK WENE 6 - Nanduk Ngget Tul Pidnak Wene

Mondok kwarurak wene nggog-e yu-o 6:1-9

¹ Musa-nen yosolar-e: ”O yanem nggugupndik woragup sa iri me woragolat-nen kwat tenak wolmomtak kenpem pidnak wene yeba oboksa Nagawan Indo Kenmbal Pem Nagawan-nen-e kit mirik kunpuwakluk nebem pamu-nen yak kundusu-o.

² Kit min kit-nen wigarak min-e woragolar-e, Nagawan Indo Kenmbal Pem Nagawan nak kek tak pogolat, at-nen kenpem pidnak wene yeba oboksa an-nen yak kundusu ereba na ndak ndag-et kwarogolar-e, o wok kindid iri na me woragolat, kunluk mot pem-et worabokluk mirik kunpusu-o.

³ Iri bem-e, Isarael nap wa-e. Kwara koler-o. Nagawan Indo nonmborak Enmbal Pem Nagawan-nen urul yak indid iri na nggal-et o nggweyak na amburu worak, yi mende ndi mende na kwarat iri na me yamuksa woragolat, ap nenlem nggok irit wolmok-nen at-nen yidnak yeba kwarogolar-e mot mor-et kwarogolat wolmer-o.

⁴ Isarael nap wa-e. Kwara koler-o. Nagawan. Indo-ge nit Nenmbal Pem Nagawan, Nagawan Indo misiget iri nak worasu-o.

⁵ Kit-nen kinndi ebis-et Nagawan Indo Kenmbal Pem Nagawan abuwa kagolar-e, at abuwa kagwi iri nam tak pogolar-e, kit kenpage bem-nen na irit, kit-nen kwarugwi bem-nen na irit nam tak per-o.

⁶ Kit-nen kwarurak watsa kenpem Pidnak yawo yak kundusu yeba-ge mondok meme rak purak pug-o.

⁷ Are, kit-nen kinlirak mul ondogolar-e, mbepme-nen na, o ma-nen na, kenpabok kwarogolat-nen na, yabu wanogolat-nen na mul ondogolat wolmer-o.

⁸ Yenggerak worabok-nen kentabit pem min kinmbiriwak pem min kamarak puruk nurag-o.

⁹ Tumende manda owak pem min pak tumende bem min-e mbarak puruk wolmer-o.

Wene kwid tuwa naru, yeberak inpidnak wene 6:10-25

¹⁰ Nagawan Indo Kenmbal Pem Nagawan-nen konmborak Abarakam min Isak min Yakup min urul yak ondosolar-e: ’O iri me-ge kit kininggi-nen wirigit lak o siri na nggok, o na mondok konak lombok irit wok kindimin-o’ luk urul yak indij-o.

¹¹ Nde, o ereba arem-e silobulo konak nak nin tak nan tak kobong tag-o. Nde, silobulo ereba-ge kit-nen pidnag-e lag-o. Yi kenanggurak sa na yalag-et kagub-er-o. Anggut yabu min saitun yabu min-e abu ya kagub-o. Iri-ge kit-nen yaigeb-e lag-o. Nagawan Indo-nen o iri me kinpil mburuwama-ge, nunggwi mende kit-nen ukwe peragwi mende bem-e kunmud lak woragolar-e,

¹² kir-e anggun panggun tak kunpugwi sa Mesira-nen weserak kinpid nap Kenmbal Pem Nagawan iri na meme rak pul naru mondok kwara wolmomtag-o.

¹³ Nagawan Indo Kenmbal Pem Nagawan kek tak obogolat, at nak erembel wanurag-o. Nde, ’Irit kwarimin-o’ luk tul pogolar-e, at unu bem nak tul purag-o.

¹⁴ Ap enlem nin nap kit ennggendumu worali nap-nen erembel wanugwi enmbal pem nagawan-e mondok erembel wanurak pug-o.

¹⁵ Nde, Nagawan Indo kit kennggendumu worasu iri-ge ar-e nin mende nan mende min ndak ndak tak uburag-e mondok isili me, kit-nen nde mbal pem nagawan nin mbi erembel wanogola-ge, Nagawan Indo-nen isilepma kenpem puruk mondok lak tak kunpuwa-o.

¹⁶ O Masa-nen kwarigep iri na nggal Nagawan Indo indi ngarurak pug-o.

¹⁷ Kit-nen kwarurak Nagawan Indo Kenmbal Pem Nagawan-nen kenpem pid ereba oboksa kwarogolat wolmer-o.

¹⁸ Nagawan Indo indi-n pidnak konak mot mot nak kwarogolat wolmer-o. Iri kwarogola-ge, konak kenalen worag-et woragub-o. Nde, o nggweyak amburu worak Nagawan Indo-nen konmborak urul yak indid iri-ge kir-et winde yogolat,

¹⁹ nde, Nagawan Indo-nen urul yid iri na ndak ndag-et kwarogolat, kit kunuwim nab-e maga wirik unpugub-o.

²⁰ Abok-nen nde kit kinlirak-nen kin wok konpogolat-nen nde: ’Noluk-nen Nagawan Indo Nenmbal Pem Nagawan-e nir-e at-nen idnak imiri mbarak pidnak wene oboksa kwat tenak wolmer-o yak nindij-o?’ yogola-ge,

²¹ kit-nen wene onggo-ge yu nggal yak undurag-o: ’Nanduk nit Mesira nagawan iri ndegel pogolat woragola, Nagawan Indo-nen at amawi ambik pem wisirik nenpamu-o.

²² Nde, kwiye worak wi yurag-e Mesira wi woragwi nap min it nagawan iri na min nagawan ndegel ubugwi nap oboksa min kwiye worak mende kwat onposolat, kwiye-nen enaboro lera mboso mende kwat onposolat kwarosola-ge, nit nenlengen-nen kaige nar-o.

²³ Iri rak onposolar-e, nir-e yu me ninmin lobok yurak pem Mesira-nen wisirik ninpij-o. Nde, nggweyak yu-ge nit nonmborak ”Wok kindimin-o” yak indid iri na ndak ndag-et kwarosolat nit wok nindij-o.

²⁴ Nagawan Indo Nenmbal Pem Nagawan-nen nit nenpem posolar-e, at-nen nenpem pidnak oboksa kwarogolat, at nak kek tak uburag-o. Nit-nen nde iri nggal-et kwarogola-ge, at-nen-e nit nenlem nab-e kwara ndegel onposolat, pem enalen worag-et wolmakluk ndegel unpuwa-o.

²⁵ Nit-nen nde at-nen nenpem pidnak wene oboksa nde pempa kwat tenak woragola-ge, at alen nenpem puwa-o’ yak undurag-o” yij-o.