TUGURUK YIDNAK WENE 4 - Nanduk Ngget Tul Pidnak Wene

Musa-nen Isarael nap-nen yidnak yidnak kwaruwakluk eneyak maridnak wene 4:1-14

¹ Musa-nen Isarael nap yak ondosolar-e: ”Kit kunlug-et Nagawan Indo konmborak Enmbal Pem Nagawan-nen wok kunduwa o iri me nggugupndik woraboklug-e, an-nen mirik kunpusu yeba oboksa-ge ndak ndag-et kwarogolat wolmer-o.

² An-nen yak kundusu wene yeba-ge mariger-o luk siyak ebem nambena pogolat, are, siyak keya bogolat mondok kwarurak pug-o. Nagawan Indo kit Kenmbal Pem Nagawan-nen kenpem pidnak wene an-nen yak kundusu yeba-ge mondok ndak ndag-et kwarogolat wolmer-o.

³ Nde, Peyot ndobo bem-nen Nagawan Indo-nen kwarid iri-ge kit kenlengen-nen kaigep iri nar-o. Iri me-nen Mbaal kugwi erembel wanidnak pibi-ge mondok lak tak inpij-et nde,

⁴ kit Nagawan Indo Kenmbal Pem Nagawan-nen yidnak yidnak kwatli nab-e yawo na kunlug-et worali yur-o.

⁵ Imiri mbarak pidnak wene iri oboksa Nagawan Indo Nenmbal Pem Nagawan-nen nebem pidnak wene irit kit mul kindigi-o. O kit nggurak iri me nggugupndik woragolar-e, wene yeba-ge mondok kwara kwarogolat wolmomtag-o.

⁶ Mondok mot mot nak pempa kwat tenak wolmer-o. Kit-nen nde iri kwarogola-ge, kit kinndi nggat nggat elem iri-ge ap enlem nin nap nan nap enaru ma-o. Nde, erem nin nap-nen imiri mbarak pidnak wene kit-nen tena worali iri na obok kulurug-e, it-nen yogolar-e: ’It ap enlem nggok iri-ge inndi nggat nggat worak enaru yidnag-e mondok ijar-o!’ luk yuwa-o.

⁷ Ap enlem nggog-e tarak nggal-nen Nagawan Indo nit Nenmbal Pem Nagawan nenndam koroga woralat, nit-nen nggi yogola, yongga nundusu yu nggal it enmbal pem nagawan mbi enndam panggorak worasu-a?

⁸ Ap enlem nggog-e tarak nggal-nen imiri mbarak pidnak wene mot mot an-nen yawo mul kundusu yu nggal mbi it tena worali-a?

⁹ Kit woragolar-e, kenlengen-nen kaigep ereba meme rak pugup naru mondok kwara yebet kagolat yebet yebet tak wolmer-o. Kit-nen na kit kinlirak min konmborak min yak ondogolar-e,

¹⁰ Sinai ndobo bem-nen Nagawan Indo Kenmbal Pem Nagawan eram mendak wirigep tarem iri wene-ge kinlirak yak undurag-o. Iri tarem Nagawan Indo-nen an yak norosolar-e: ’It iri-ge an-nen yidnak yidnak kwarugwi enaru yogolat, it inlirak an-nen yidnak yidnak kwarurak mul ondogolat wolmak-nen an nene kuluwakluk ndok worak inpi-o’ yak nirij-o.

¹¹ Kit-nen kinlirak kenggel ondogolar-e, kit Sinai ndobo ayo bem lobok yigepndik mendak woragola, kule nggan nggan mom kirak nggal-nen ndobo iri muruk tak posolat, kan amare mbal usu nggwarosolat kwarid wene-ge kinlirak yak undurag-o.

¹² Iri-nen kanduk arem-nen Nagawan Indo-nen wene yak kondosola kuligeb-et nde, ebe-ge mondok kagit lak yigep wene min yak undurag-o.

¹³ At-nen kinmin urul pid wene iri na ndak ndak tak pogolar-e, mondok kit-nen kwarurak kenaru rak posolar-e: ’Imiri mbarak pidnak wene sepulu kerep abak mberen ereya bem mbarak iri na-ge kir e mondok ndak ndag-et kwarurag-o’ luk yak kindid nar-o.

¹⁴ Kit-nen o nggugupndik woragup sa iri me woragolat-nen at-nen yidnak yidnak oboksa-ge mondok kwarogolat wolmomtak kit mirik kunpurag-e Nagawan Indo-nen an nebem pamu-o.

Mbal Pem Nagawan nin erembel wanuwa naru inndi yeberak pidnak wene 4:15-40

¹⁵ Kit-nen-e kagit lag-et nde, Sinai ndobo bem-nen kanduk arem-nen Nagawan Indo-nen wene yak kindid iri na-ge mondok kwara kinndi yeberak wolmer-o.

^16-18 Kir-e ap ala na, kwami ala na, towe ala na, keyane ala na, lok lok noso mende ala na, yi mende ndi mende misiger-o luk tet ut memera ndak wutluk, erembel wanogolat, meya kwarugup naru, mondok ndak wururak pug-o.

¹⁹ Kit-nen kagwi mende mbal pem woraso: mo min waneya min wonaru min erembel wanogolat, ndegel obogolar-e, meya yurak pug-o. Nagawan Indo kit nen idnak Mbal Pem Nagawan-nen ap enlem ereb-e ereba-t erembel wanogolat wolmakluk keya inpij-et nde,

²⁰ kir-e mondok andi bandi kaigep sa Mesira-nen kinmiri luk lobok yid iri-ge yawo kir-e at elem nap worali yu nggal worabokluk, kinmin lobok yij-o.

²¹ Kit-nen ndowaga Nagawan Indo kit Kenmbal Pem Nagawan-e an nebem isilepma nobosolat-nen owak mbarosolar-e, an nimin-e o nggweyak amburu worak kit wok kunduwa iri me nggurak pem-e ’Kar-e Yi Yareren iri-ge mondok mbarugun pug-o’ yak nirij-o,

²² Kir-e yanem nggal-et o nggweyak amburu worak iri na me Yi Yareren mbatluk nggurag-e mondok panggorak worasu-o. Alat nde, an-e yu me-t wat yimin me, kinmin nggwimin pug-o.

^23-24 Kir-e Nagawan Indo Kenmbal Pem Nagawan-nen urul yak kindid ereba na-ge memerak pigit lak, mondok kwara tena wolmer-o. Nagawan Indo Kenmbal Pem Nagawan iri-ge mondok lak tak poso kanduk nggal-nen yusu me, at-nen yidnak yidnak kwarogolar-e, mondok yi mende ndi mende mbi ut memera ndak wutluk erembel wanurak pug-o. Nde, Nagawan Indo-ge yi mende ndi mende imin ndak ndak tak uburag-e mondok isili-o.

²⁵ Kit abok o iri na me nggugupndik woragolat, kinlirak ndesa wigarogolat woragolar-e, kit-nen erembel wanurak yi mende ndi mende ut memera ndak wutluk erembel wanogolat meya yurak pug-o. Kit-nen iri kwarugup iri-ge Nagawan Indo erengen pem-e meya kwarogola karuk, ar-e isilepma yusu-o.

²⁶ Yawo mbal min nggweyak min-e aru-o. Kit-nen nde an-nen yidnak yidnak kwarigit lak yogola-ge, o Yi Yareren eyak ele bem kit woragup sa iri na me mondok woragup pug-o. Yanem-et pendega lak tak kunpuwa-o.

²⁷ Nagawan Indo-nen-e kir-e nin nap ennggendumu ndibi ndi rak konposolat, kit kennggendumu-ge ap mariget nak kunluk woragub-o.

²⁸ Iri yuwama ereba woragolar-e, ki nap ininggi-nen e bem ala na, kerep pem ala na ndak wiridnak kugwiwak erengen na kaso buk, eyanggo-nen na koloso buk, naso na buk, emben na kaso buk ininggi-nen ndak wiridnak kugwiwak ereba na nde erembel wanogolat woragub-o.

²⁹ Iri me woragolar-e, kir-e Nagawan Indo Kenmbal Pem Nagawan kore yogola-t nde, ndemeret kinndi-net kore yogola-ge, kagub-o.

³⁰ Kit kenpem lak tak onposo mende mbosola-t nde, anggun panggun arem woragolar-e, nden karuk Nagawan Indo Kenmbal Pem Nagawan eram mbutluk, at-nen yidnak yidnak kwarugub-o.

³¹ Nagawan Indo Kenmbal Pem Nagawan iri-ge unpud kaso elem-nen yusu-o. Keya na kunpuwa buk. Lak tak na kunpuwa buk. At ondomok-en konmborak urul yak indid ereba na mondok meme rak na puwa bug-o.

³² Kit ndet yigit lak ma nanduk-nen kwaridnak ereba mbenarogolat, Mbal Pem Nagawan-nen ap nggweyak ma yu me ndak wosa inpid kuri mbenarogolar-e, nggweyak urugwe ombol na mbenarer-o. Wene nggok yu nggal-e mbi kwat yamu kagup, lak? Are, yu nggal-e mbi kwat yamu-o luk ap-nen yugwi, lak?

³³ Kit-nen kanduk arem-nen wene yosola kuligep iri nggal ap enlem mbi kanduk arem-nen it enmbal pem nagawan-nen wene yak ondosola, kuliga-t nde, unlug-et mbi worali, lak?

³⁴ Are, Nagawan Indo Kenmbal Pem Nagawan-nen Mesira-nen kit kwat kinpid iri nggal mbal pem nagawan misik mbi-nen yi nap ndi nap ennggendumu-nen ap elem mbi lesa wok unpuruk at elem nap tak inpidnak mbi worali, lak? Alat nde, Mbal Pem Nagawan amawi bem-nen kwarosolar-e, lak tak onposo mende bem-nen na, wim pem-nen na, kwiye worak nin tak nan tak amawi bem-nen kwarusu-ge kenlengen-nen kali irir-o.

³⁵ Nde, iri kwarusu iri-ge kit-nen yenggerak pogolar-e, Nagawan Indo iri-ge at nggal misik mbi worasu-ge lag-o luk yenggerak pobokluk-nen mirik kunpusu-o.

³⁶ Kit mul kondosolar-e, at ene-ge mbal nggwe-nen yosolat, nde, nggweyak nggwe-nen-e aganduk kwiye worak mirik konposolat, nde, kan mare arem nggwe-nen-e wene yak kindid nar-o.

³⁷ At-nen konmborak unpud kasolar-e, it-nen wigarak kit len kunpuruk, amawi kwarat pem Mesira-nen lesa wok kunpuruk lobok yij-o.

³⁸ O nggweyak yawo kit nen winde yugup iri wok kondosolar-e, it ap enlem nggok mondok enmawi worak ereba na-ge langgara wirik unpuruk, it onnggweyak kit wok kindij-o.

³⁹ Iri bem-e, yawo-ge kwara yebet ker-o. Mondok meme rak purak pug-o. Mbal Pem Nagawan nin mbi worasu-ge mondok lag-o. Nagawan Indo arig-et nak mbal pem-nen nggweyak pem-nen at nak worasu-o luk yebet ker-o.

⁴⁰ Kit min kit-nen wigarak min Nagawan Indo Kenmbal Pem Nagawan-nen pempa winde worabokluk wok kundusu o nggweyak iri na me yamuksa worabok-nen imiri mbarak pidnak wene yawo an yak kundusu yeba-ge oboksa kwarogolat wolmer-o” luk yak indij-o. 4:41–5:33 Pasal 4 erep min Pasal 5 min ya arem-e mo luwaso (timur) ambigit Yareren eyak ponok nggwe ap nde inndi-nen mengesa peragit lak ma undurug-e, ondomok inmiri yurak nggugwi o siri unnu mbarak min imiri mbarak pidnak wene sepulu iri na min mbarak worasu-o. (Wonaridnak Wene 20 iri ker-o.)