TUGURUK YIDNAK WENE 34 - Nanduk Ngget Tul Pidnak Wene

Musa wat yidnak wene 34:1-12

¹ Musa na-ge o Yeriko pindik (timur) nggwe Moap mbirikmu-nen ndobo Piska anggul pem mborosolar-e, ndobo Nebo bem lagij-o. Nde, iri me-nen Nagawan Indo-nen Kanaan nggweyak iri na mirik obosolar-e, Nggileat nggweyak kuri-nen nok mberarik abare abam (utara) nggwe Ndan unuwi siri kuri mirik obosolat,

² Naptali nap onnggweyak oboksa min it enlem Eperaim min Manase min onnggweyak min Yewura nap onnggweyag-e abare mo mboso (barat) nggwe-nen mberarik, Yi Koma Nggok iri na kuri lingsa irit mirik obosolat,

³ Yewura nap onnggweyak abare ena (selatan) nggwe ambigit mbirik nggwe engen nunggwi kuruma ari kwarat worak o Yeriko kuri-nen Soat kuri lingsa irit mirik ibij-o.

⁴ Mirik uburuk, Nagawan Indo-nen Musa yak tosolar-e: ”An-nen Abarakam min Isak min Yakup min it-nen wigarak wok undurak urul yak indigi nggweyak na-ge irir-o. Musa kar-e kanokluk mirik kibigi-t nde, kar-e iri me-ge mondok mbururag-e lag-o” yak tij-o.

⁵ Iri lug-e, Nagawan Indo-nen awo ma-nen yid iri na ndak ndag-et Nagawan Indo ndegel oboso nap Musa na-ge Moap iri me-t wat yij-o.

⁶ Wat yamu Nagawan Indo-nen o Moap iri me mbirik mbi me o siri Mbet peyot ndik pindik ereba me Nagawan Indo-nen yapma ibij-o. Nde, at yapma ibidnak sa-ge yawo-nen na ap misiger-o luk tet kabak irit worali-o.

⁷ Nde, Musa-ge olengen seratus dua pulu (120) woraruk wat yij-o. Amawi na kundugu, erengen na kubulu yigit lak irit wat yij-o.

⁸ Iri yamu Moap mbirikmu iri me Isarael nab-e Musa ubud tabun puruk yip togolat woragolar-e, dua pulu sembilan (29) nene yiga-o.

⁹ Nde, Nun ambara Yosua iri na-ge Musa-nen-e at ondolma-t lenak ibidnak me, Nagawan Indo-nen-e indi nggat nggat elem kwarat wok tij-o. Iri yosola-ge, Isarael nab-e Yosua-nen yidnak yidnak kwarogolat, Nagawan Indo-nen imiri mbarak pidnak wene Musa ebem pamu, Musa-nen mul indid wene ereba na kwarogolat woraiga-o.

¹⁰ Nde, Isarael nap ennggendumu-ge Mbal Pem Nagawan ene lomboksa yoso nap mbi Musa-nen Nagawan Indo imin nimbiri kimbiri wene mbaroso nggal mbi-ge mondok lag-o.

¹¹ Nagawan Indo-nen yidnak yidnak ndak ndag-et Musa-nen kwiye worak mende min wi yurak mende min Mesira wi bem min iri me nagawan min at ndegel ubugwi nap min kwat inpid iri na nggal kwarugwi mbi woragit lak yiga-o.

¹² Musa-nen kwaroso nggal it ennggendumu-nen ap mbi-nen-e mondok ija mende min kwiye worak mende min Musa-nen Isarael nap oboksa enlengen pem kwarid ereba na nggal-e mondok kwarigit lag-o.