TUGURUK YIDNAK WENE 32 - Nanduk Ngget Tul Pidnak Wene

¹ Yosolar-e: ”Mbal wa-e. An wene yimin yu-ge kuli-o. O yu-ge wa-e. An wene yosola-ge, kulurak keyanggo palak wolmin-o. O yu-ge wa-e. An wene yosola-ge, kulurak keyanggo palak wolmin-o.

² An-nen mul ondoso wene-ge talme nggal mbuma-o. An nene-ge lilangen nggal yung ndung mbuma-o. An nene-ge talme nggare nggare tusuangge bem mbuwaso nggal mbosolat, talme nggok yagidnak mende bem mbuwaso nggal mbosolat ma-o.

³ An-e Nagawan Indo unu kek tak pimin-o. Mbal Pem Nagawan kek tak anggu worak woraso obog-e wigarer-o.

⁴ Nagawan Indo yongga kondoso amawi worak, yabu-ge mondok iminep mbarak nak wanosolat, at-nen kwaril mboroso oboksa-ge mot mot nak kwaroso. Mbal Pem Nagawan iri-ge mondok mot mot nak kwaroso, ap enmberam laso buk-nen yusu-o. Ar-e ndemeret mondok konak nak kwaroso.

⁵ Alat nde kir-e lugud tak kwarugwi kenlem-nen yili-o. Kit-nen at elem nap kwat yurak na mondok ndag-e lag-o. Kir-e lugud tak nak kwarugwi min meya kwarugwi min nak kobong tak-nen yili-o.

⁶ Kit wid, kinndi lak yu-ge wa-e. Kit-nen Nagawan Indo-nen konak kwat kinpidnak iri na onggo at konak kwat obogolar-e, iri kwatli irir-a? Nagawan Indo iri-ge kit Kineid ndak wat kunpuruk, ap enlem misik kwarak kinpid nab-e lag-a?

⁷ Nanduk ereba woraiga kinndi yebet ker-o. Ap abok woraiga kinndi yebet ker-o. It-nen yak kunduwakluk, kit-nen kineidtak min ap indi worak min kin wok enper-o.

⁸ Amawi Worak Mondok Kek tak iri na-nen nggweyak tomborosolar-e, ap enlem lombok oboksa-nen it wolmomtak unuwi nggweyak lombok kuri wosa mbal indil lobok yamu-o. It-nen erembel wanurak enmbal pem nagawan amawi worak lombog-et winde rak enpamu-o.

⁹ Alat nde, Yakup-nen wigarak yu-ge Nagawan Indo-nen at ondomok amanggim len enpamu-o.

¹⁰ At-nen it wok onposolar-e, ap lak ma nembaga ereba waring kil nukmu-nen wok enpamu-o. Iri lug-e, at-nen kwara kurak unpuruk, ndegel enpamu-o. At arengge mondok indi kwindik irit yik eneyarok woragij-o.

¹¹ Towe ijamu-nen pubu mbururak amarik mul tosolar-e, isiyamu bem puruk yebaluk mburusu iri nggal

¹² Nagawan Indo ondomok-net at ilirag-e lit unpuruk lobok yij-o. Iri kwasa lobok yosola-ge, mbal pem nagawan nin mbi-nen imin lobok yigit lag-o.

¹³ At nen-e yi ndobo ndi ndobo ereba kalurak amawi wok ondosolat, yagidnak mende nonggolat, kerep arem woraso ngin amburu nonggolat, o nggweyak kerep worak nggwe-nen mbiridnak e saitun amburu ningga-o.

¹⁴ It ensapi min onlomba min enkambing min agamo engen kwarat wanuwa-o. Iri yugwi me, it ensapi min onlomba min enkambing min ereba-ge mondok onggo nggok pugwi-o. Nde, it ennggandum min enanggut engen min-e konak nak yosolat wolma-o.

¹⁵ Iri kwarosola-ge, Nagawan Indo ilirag-e enarengge kwarat worak woragolar-et nde, eyak wurugwi irit woraiga-o. Ir-e nunggwi mende inmbitsa nonggolat enpe-ge nggok yiga-o. Iri yogolar-e, Inmiri Yoso Nap ndak wat inpid Nagawan Indo iri na-ge keya biga-o.

¹⁶ Keya buruk, ir-e kugwiwak erembel wanogola-ge, Nagawan Indo-ge erengen ale yij-o. Nde, it-nen meya kwarogolar-e, at isilepma kwarat tak piga-o.

¹⁷ Nde, it-nen-e mbal pem nagawan-e lag-et nde, meya indi ereba na amanggim wam wosa kan pogolat, it-nen na irit, onmborak-nen na irit enaru buk mbal pem nagawan nin ereba na amanggim wam wosa kan pogolat woraiga-o.

¹⁸ Ir-e Amawi Worak Inmiri Yosoiri na-ge nano nano rak pogolat, unluk tak poso Mbal Pem Nagawan na-ge meme rak pogolat kwariga-o.

¹⁹ It-nen iri kwarogola, Nagawan Indo-nen karug-e, isilepma onposolat, ilirak keya inpij-o.

²⁰ Keya unpuruk-nen yosolar-e: ’It enlem iri-ge wene kulugwi buk, an-nen yidnak mot mot mondok kwarugwi buk me, ir-e lak yogola eneyasolar-et nde, mondok yongga indimin pug-o.

²¹ Nde, it-nen-e an-e nerengen ale yoso rak nobogolar-e, ndemeret mbal pem nagawan-e lag-et nde iri na bem nerengen ale yoso rak nobogolat, unkugiwak ininggi-nep ndak wiridnak iri na bem nisilepma poso rak nibili-o. Iri bem-e, an-nen nilirak enlengen ale yugwi rak onposolar-e, ap enlem-e lag-et nde iri na bem enlengen ale yugwi rak onposolat, ap enlem wid iri na bem insilepma pugwi rak inpimin-o.

²² An nisilepma-ge kanduk amare nggal pagosolar-e, ap watluk ndok wiril mbugwi sa min-et lak tak puwa-o. Iri yosolar-e, o yu min-et arem woraso yi mende ndi mende min-et, ndobo oboksa emengen min-et ndindera kan nujwa-o.

²³ An nemare oboksa mbisingsa it indil lobok yosolar-e, lak tak onposo mende-ge pempa kundugu enpem pil lobok yosolat woramin-o.

²⁴ Iri yosola-ge, it wat yogolar-e, enmbem wuloksa kugi unduruk-nen wat yogolat, nere bem-nen na irit, kugi aye worak pem-nen na irit wat ma-o. Keya unpumu, singa ndakngge-nen nok onposolat, waro eyak worak-nen yilik onposolat makluk, wirik pimin-o.

²⁵ Wim-nen ndowaga ab-e tulabiyem yat wat mbogolat, kwiye worak mende-ge ap o ma wolma ereba na enpem mbosolat, ap sujwe min ndugum min li nggisiya min ap indi worak min mondok abu pendaga lak ma-o.

²⁶ An nindi-nen-e it iri-ge unnu mondok lak wolmakluk lak tak unpurak yebet kaleb-et nde,

²⁷ an-nen nilirak kwat unpusu yu na-ge kagit lak-nen Isarael nap unuwim nap-nen inndi kek yogolat-nen yogolar-e: ”Mondok nit-net urugwe nggwe rak inpige-o” yuwa naru, an-e larok yusu-o’ yij-o.

²⁸ It enlem Isarael yu-ge inndi wal kagwi inndi-ge mondok lak me, mondok inndi yebet kagwi-ge it endam-e lag-o.

²⁹ It nde inndi worak nggal-nen-e it lak momtag-e inndi yebet kaleb-o.

³⁰ Ap misiget-nen ap seribu (1.000) nuk iniyudtag-e, ndag-a? Mberen nap nak-nen ap sepulu ribu (10.000) langgara wirik unpurag-e ndag-a? Nagawan Indo Enmbal Pem Nagawan-nen-e ir-e ap enpem onggo wanosolat, Enmbal Pem Nagawan amawi worak iri na-nen keya inpij-o.

³¹ Isarael nap unuwim nap nen peragolar-e: ’Nit ninmiri yoso kugwiwag-e Isarael nap Enmbal Pem Nagawan nggal-e mondok lag-er-o’ luk enaru yili-o.

³² It unuwim nap iri-ge Sorom min Nggomora min-nen kwarugwi meya iri na mende kwarugwi me, ir-e anggut elem engen-e ngari worak, ninggis mende pidnak nggal-nen yili-o.

³³ It-nen idnak anggut engen amburu-ge lese ninggis mende nggal-nen yusu-o.

³⁴ Nde, Nagawan Indo-nen-e at ilirak unuwim nap-nen kwarugwi ereba na yebet kasolar-e, onggopurak tarem-net onggo angin worak enpem puwa-o.

³⁵ Nagawan Indo-nen onggo posolar-e, mondok angin worak mende enpem puwa-o. It wosa mburak tarem panggo yosolar-e, it yigisa keya unpurak tarem yanem-et wok ma-o.

³⁶ Nagawan Indo-nen-e at ilirak nde yik eneyasolar-e, ndeyak yogola, enmawi lak ala karug-e, at ndegel ubugwi nap enabuwa kasolar-e, at ilirag-e inmiri yuwa-o.

³⁷ Nagawan Indo-nen at ilirak kin wok onposolar-e: ’Mbal pem nagawan nin amawi worak kit-nen kinndi ebem wat tak puruk worali-ge ngge me worasu-o?

³⁸ Kit-nen it enmanggim wam wosa kan pogola, ningga-o. Nde, anggut engen amburu enmanggim pogola, ningga me, ”Yongga nindil lobok yer-o” yak ender-o. Ir-e nggetlel kunpugwi kwat mag-o.

³⁹ Kwara yebet ker-o. Mbal pem nagawan nin mbi-ge mondok lak. Mbal Pem Nagawan-e an narig-et nak-nen yusu-o. An-e lak tak onposo min unluk tak poso min-nen yusu-o. An-e mep tak onposo min ambut tak onposo min-nen yusu-o. An-nen kwarosola-ge, ap misiger-o luk tet nebem kore yugwi buk-nen yusu-o.

⁴⁰ Mbal Pem Nagawan an-e nuruk nak woraso nondomok nunu bem ninggi ligik puruk, owak mbarosolar-e:

⁴¹ an neyalawi anggat wirip wiripsa marimin-o. Matlug-e, ap enpem wene mot mot mbarimin-o. Nde, an nimin wim mbatli nap oboksa onggo posolar-e, an nimin sirid mbarak worali nab-e mondok indimin-o.

⁴² An nemare-ge it eneyabi-nen merara labuk ma-o. An nimin eyak wurugwi nap oboksa-ge neyalawi bem indimin-o. An nimin wim mbatli nab-e misiger-o luk mondok keya inpimin pug-o. Kugun pem wok inpidnak nap na irit, mare worak na irit mondok oboksa wat ma-o’ yij-o.

⁴³ Ap enlem oboksa wa-e. At ilirak indili nab-e oboksa undusu me, Nagawan Indo ilirak entembel waner-o. At uwim nap-nen kwat ibidnag-e onggo posolat, nde, at ilirak-nen meya yidnag-e amberam tak pusu-o” luk yij-o.

⁴⁴ Musa min Nin ambara Yosua min-nen-e ndawi yu yogola, Isarael nap oboksa-nen-e kuliga-o.

Musa-nen worok tak posolat it-nen kwarurak mul indidnak wene 32:45-52

⁴⁵ Nagawan Indo-nen mul indid wene ereba na ndegera Isarael nap yak unduruk,

⁴⁶ Musa-nen yosolar-e: ”Kit-nen kwarurak kenpem pidnak an-nen yawo yak kindigi ereba-ge kwara yebet karug-e kinlirak-nen pempa mot mor-et Nagawan Indo-nen enpem pidnak wene oboksa ereba na kwarogolat wolmakluk, kinlirak mul undurag-o.

⁴⁷ Mul kindigi wene ereba-ge we ebe lak wene-ge lag-o. Are, kunluk wolmomtak wener-o. O Yi Yareren eyak ele bem yanem kit nggugupndik woragup iri me kunluk mot pem-et worabokluk, kwarurak kenpem pidnak yeba-ge kwara kwarogolat wolmer-o” luk yak indij-o.

⁴⁸ Iri tarem-et Nagawan Indo-nen Musa yak tosolar-e:

⁴⁹ ”Kar-e o Yeriko ndik pindik Moap nggweyak pem ndobo worak Abarim nggwe mbiri-o. Mburugundig-e, Nebo ndobo bem lagundik, o yanem Isarael nap wok indimin Kanaan wi iri na yik kil mbiri-o.

⁵⁰ Yik karug-e, kar-e kowe Arun Ot ndobo bem wat yid iri na nggal ndobo iri bem-et wat yugun-o.

⁵¹ Kit o Kandes koroga Sin karu me iri me woragolar-e, yi Meriba iri me-nen kit mberen-e an kek tak nobogolat, Isarael nap inmbiri bem-e an-nen yidnak yidnak kwarigit lak yigepma-o.

⁵² Iri bem-e, an-nen Isarael nap wok indimin o iri me-ge kar-e mondok nggugun pug-o. Kerengen nak erepma-nen yik kagun-o” luk yak tij-o.