TUGURUK YIDNAK WENE 31 - Nanduk Ngget Tul Pidnak Wene

Yosua Musa ondolma men yidnak wene 31:1-8

¹ Tuguruk Musa-nen Isarael nap yak ondosolat-nen

² yosolar-e: ”An yawo-ge olengen-e seratus dua pulu (120) kwat yidnak me, an-e kit lit kunpuruk nurag-e meya-o. Iri-nen Nagawan Indo-nen an yak norosolar-e: ’Kar-e mondok Yi Yareren-e mbarugun pug-o’ yak nirij-o.

³ Nagawan Indo Kenmbal Pem Nagawan ar-et anggul tak kunpuruk mborosolar-e, yi ap ndi ap enlem iri me worali ereba-ge lak tak unpuwama, it onnggweyak iri kit-nen winde yugub-o. Iri yogolar-e, Nagawan Indo-nen yid iri na ndak ndag-et Yosua-ge at-nen anggul tak kunpuruk nurak nap kwat ma-o.

⁴ Nde, Nagawan Indo-nen-e Amori nap nagawan Sikon min Ok min urugwe nggwe rak onposolat unuwi siri min yigisa lak tak pid iri na nggal-et ap enlem ereba-ge Nagawan Indo-nen lak tak unpuwa-o.

⁵ Nde, Nagawan Indo-nen-e it urugwe nggwe rak unpuruk, kir-et ombol nggwe rak kunpuwama, kit-nen it kwat onpogolar-e, an-nen yak kundusu yeba ndak ndag-et kwat unpugub-o.

⁶ Mondok kir-e tugup lak, kwiye lak irit wolmer-o. Nagawan Indo Kenmbal Pem Nagawan-net yongga kunduwa me, kir-e mondok it enaye yurak pug-o. At-nen-e keya konposolat, kinndi kabak tak posolat yuwa bug-o” luk yak indij-o.

⁷ Yak unduruk, Musa-nen-e Isarael nap oboksa enlengen pem-et Yosua wene mbo uburuk-nen yak tosolar-e: ”Yosua wa-e. Kar-e mondok kindi tugup lak, kwiye lak irit wolmomtag-o. Isarael nap yu Nagawan Indo-nen onmborak wok undurak urul yak indid iri na me winde makluk, kat-net lit unpuruk nggugun-o.

⁸ Iri yosola-ge, Nagawan Indo at ondomok-nen yongga korosolat, lit kuburuk mburuwa-o. At-nen-e kindi kabak tak kobosolat, keya kobosolat mondok kwaruwa bug-o. Iri bem-e kar-e kwiye yosolat, kindi kabak yosolat yurak pug-o” yak tij-o.

Nagawan Indo-nen idnak imiri mbarak pidnak wene iri na kuluwakluk olengen tuju woraruk, wonat enderenak wolmomtak yak indidnak wene 31:9-13

⁹ Iri luk Musa-nen-e Nagawan Indo Mbal Pem Nagawan-nen idnak imiri mbarak pidnak wene ereba na-ge engga mbarak purug-e, Lewi nap tepan ombo urul pidnak labu mbarak iri na ambigit yabu wanugwi nap min Isarael nap ennggendumu-nen enne kulugwi nap ereba na min wok indij-o.

¹⁰ Iri yosolat-nen at-nen enpem posolar-e: ”Olengen tuju bem tak pogolat nggoboksa namat uwi yakolat O Lije Engga Kerengga Wi Wutluk Sakwi Tarem iri na yebet kagolar-e,

¹¹ Nagawan Indo Kenmbal Pem Nagawan-nen at erembel wanurak ondoro lenak pidnak sa at erembel wanuwokluk lobok yidnak Isarael nap ereba na kuluwakluk, kit-nen-e imiri mbarak pidnak wene yu wonarogolar-e, kenne nggoksa wonarurag-o.

¹² Nde, ap min kwami min li marik min ap sal kit kennggendumu woragwi nap min oboksa-ge it-nen Nagawan Indo Kenmbal Pem Nagawan kek tak pugwi min at-nen yidnak yidnak tugup lak kwarugwi min enaru makluk, imiri mbarak pidnak wene wonarugup iri na kulurak pem ’Mondok ndok werer-o’ yak undurag-o.

¹³ Iri nggal kwarogola-ge, kit kinlirag-e Yi Yareren eyak ele bem o it ngguwarik wolma sa iri na me woragolar-e, Nagawan Indo Kenmbal Pem Nagawan-nen idnak imiri mbarak pidnak wene kulugwi buk iri na-ge kologolat, it-nen Nagawan Indo-nen yidnak yidnak kwarugwi enaru yogolat kwaruwa-o” yak indij-o.

Worok tak posolat Nagawan Indo-nen Musa ebem pidnak wene 31:14-29

¹⁴ Imbirig-e, Nagawan Indo-nen Musa yak tosolar-e: ”Kat kuruk wolmomtag-e poro yusu me, Yosua iri wene mbo uburuk, an nuwi lije ma imin lobok yi-o. An-nen at-nen kwarosolat wolmomtak wene mirik ibimin-o yosoloma-ge, Musa min Yosua min-e Nagawan Indo ama mborogola-ge,

¹⁵ Nagawan Indo-ge nggan nggan arem it inmbiri bem at uwi lije tumende bem nam yosolar-e,

¹⁶ Nagawan Indo-nen Musa yak tosolar-e: ”Yawo kat wat momtag-e mondok panggo yusu-o. Kat nde abu mborosola-ge, Isarael nap-nen an-nen urul yak indigi na keya bogolat, an-nen yidnag-e kwaruwa bug-o. Ir-e o it abok ngguwa sa iri me woragwi nap-nen erembel wanugwi unkugiwak erembel wanogolat, an-e keya nubuwa-o.

¹⁷ It nde iri nggal kwarogola-ge, an nisilepma-ge mondok kwarat enpem posolat, keya onposolat mondok lak tak inpimin-o. Lak tak onposo mende kwarat mondok kwiye worak enpem posola-ge, it-nen peragolar-e: ’Yu-ge Nenmbal Pem Nagawan-net kwat nunpusu kagi-o. Ar-e abu keya nenpamu-o’ luk enaru ma-o.

¹⁸ Iri kwaruwa tarem iri-ge ir-e kugwiwak ereba na erembel wanogolat, meya kwarogola me, an-nen-e mondok yongga indimin pug-o.

¹⁹ Nde, yawo-ge ndawi yu-nen innggiri rak posolat wolmakluk ndawi yu-ge mbarak puruk Isarael nap mul ondosolat wolmin-o.

²⁰ An-nen it onmborak ’Wok kindimin-o’ luk urul yak indigi iri na ndak ndag-et an-nen wok unpuruk, o nggweyak amburu worak, yi mende ndi mende kwarat iri na me inmin mbirimin-o. Iri me-nen-e it-nen ukwe peragwi nunggwi mende oboksa wanogolat, konag-et woragolat kwaruwa-t nde, abok nggwe-ge nden karuk kugwiwak ereba na erembel wanuwa-o. Iri yogolar-e, an keya nobogolar-e, an-nen urul yak indidnak wene na keya-t puwa-o.

²¹ Iri yogola-ge, lak tak unpurak mende kwarat enpem mbuma-o. Alat nde, ndawi yu-ge it innggiri rak puwakluk pempa yogolat wolmomtag-o. An-nen urul yak indigi iri na me nggwigit lak ma-net it inndi-nen yebet kali iri-ge an-e mondok naru-o” luk yak tij-o.

²² Yak tosoloma-ge, iri na tarem-et Musa-nen-e ndawi iri na-ge mbatluk, Isarael nap mul indij-o.

²³ Nde, Nagawan Indo-nen Yosua Nun ambara iri na yak tosolat-nen yosolar-e: ”Kar-e mondok kindi tugup lak, kwiye lak irit wolmin-o. Yosua kar-e Isarael nap iri lit unpuruk o an-nen ’Wok kindimin-o’ luk urul yak indigi iri na me nggugun-o. Iri yosola, an-nen-e yongga-t kirimin-o” luk yak tij-o.

²⁴ Iri luk Musa-nen-e Mbal Pem Nagawan-nen idnak imiri mbarak pidnak wene mbarosolar-e, mondok anggul-nen tel kwiridnak kuri mondok woroksa irit ndindera mbarij-o.

²⁵ Engga iri na abu mbarak puruk yarik, Musa-nen Lewi nap urul pidnak wene labu mbarak iri na ambigit yabu wanurak ininggem pidnak ereba na yak ondosolar-e:

²⁶ ”Mbal Pem Nagawan-nen idnak imiri mbarak pidnak engga yu-ge wanugupndik, kinndi yenggerak posolat wolmakluk, Nagawan Indo Kenmbal Pem Nagawan-nen idnak urul pidnak labu mbarak iri na eralu per-o.

²⁷ Nde, it wene kulugwi buk, eneyanggo lak, eyak nak wat tenak woragwi iri-ge an-e naru-o. An nuruk worala perak Nagawan Indo imin eyak nak wat tenak worali yu-ge an nde wat yumu-ge, mondok abunuk kwat tenak wolma-o.

²⁸ Nde, yawo-ge it-nen enne kulugwi nap min it ennggendumu onowe ereba na min oboksa an-nen wene yeba yak endeyek-nen neram ndok wuruwakluk yak indi-o. Nde, an-nen yak indimin wene iri-ge mbal min nggweyak min-e mondok aru-o.

²⁹ An nde wat yumu-ge, it yu-ge meya kwat yogolat an-nen mul undusu wene yeba-ge mondok keya buwa-o luk an-e naru-o. Nagawan Indo-nen ’Kwarurak pug-o’ yak indidnak iri na kwarogola, Nagawan Indo isilepma yosolar-e, ir-e lak tak unpurak mende enpem mberak puwa-o” luk yij-o.

Musa-nen ndawi yidnak wene 31:30–32:44

³⁰ Nde, Isarael nap oboksa kolak woragola-ge, Musa-nen-e ndawi yu mondok woroksa yij-o.