TUGURUK YIDNAK WENE 30 - Nanduk Ngget Tul Pidnak Wene

Mbal Pem Nagawan-nen kondok yidnak nap imbiringgat tak unpurak yidnak wene 30:1-20

¹ Musa-nen yosolar-e: ”An-nen yawo yak kindigi ereya na nggal kit-nen nak lombonogolar-e, imbiringgat konak wolmomtak winde yugup, lak? Are, imbiri lamut wolmomtak wanugub-a? Kit nak-nen-o. Kit nde Nagawan Indo Kenmbal Pem Nagawan-nen enlem nin nap ennggendumu ndibi ndi rak kunpuwama woragola, anggun panggun kagolar-e, keneyanggo wat yogolar-e, an-nen kit-nen lumbunurak wene mberen nuk kasu ya kinndi yebet kagub-o.

² Kit min kit-nen wigarak min-nen nde tuguruk Nagawan Indo Kenmbal Pem Nagawan eram lobok yogolar-e, mondok kinndi min-net Nagawan Indo-nen kenpem pidnak an-nen yawo kenpem pusu yeba ndak ndag-et kwarogola-ge,

³ Nagawan Indo Kenmbal Pem Nagawan-nen-e kenabuwa kasolar-e, nggilara ndibi ndi rak ap ennggendumu worali ereba ennggendumu-nen ndok wat kunpuruk, kinmin lobok yuwarig-e, yi mende ndi mende bem-e tuguruk ndak woragwi na nggal tak kunpuwa-o.

⁴ Yi wi ndi wi ndibi ndi rak woragub-et nde, Nagawan Indo Kenmbal Pem Nagawan-nen ndok wat kunpuruk, tuguruk wok kunpuruk lobok yuwa-o.

⁵ Iri yuwama, o nggweyak nanduk konmborak woragwi iri na tuguruk winde yugub-o. Woragola, at-nen-e konmborag-e marig-et woragwi-t nde, kir-e kenpe na kwarat terak minik tak konposolat, yi mende ndi mende bem na mondok terak minik irit wok kunduwa-o.

⁶ Kit min kit-nen wigarak min-e kinndi-ge yidnak yidnak nak kwarugwi inndi wok kunduwama, kir-e Nagawan Indo Kenmbal Pem Nagawan mondok kinndi min-et abuwa kwarat kagolat, o iri me pem-et woragub-o.

⁷ Nde, inmbiri lamut tak poso mende ereba na oboksa-ge kunuwim nap insili rak kunpuruk woragolat, yemndak kunpuruk worali ereba na enpem mberak puwa-o.

⁸ Kir-e tuguruk Nagawan Indo-nen yidnak yidnak nak kwarogolat, an-nen yawo yak kundusu wene yeba oboksa na kwarugub-o.

⁹ Kit-nen kwarugup mende oboksa Nagawan Indo-nen ebe worak tak posolar-e, kinlirak min konowam min-e kwarat ma-o. Kit keneyapmu mende na ebe kwarat ma-o. Nagawan Indo-nen-e alen min-et konmborak yi mende ndi mende kwarat winde rak inpid nggal kit na yi mende ndi mende kwarat winde rak kunpuwa-o.

¹⁰ Alat nde, kir-e Nagawan Indo Kenmbal Pem Nagawan-nen yidnak yidnak nak kwarogolat, at-nen imiri mbarak pidnak wene engga yu arem mbarak worasu yeba ndak ndag-et kwarurag-o. Nde, kir-e ndemeret kinndi min-net tuguruk at eram mbururag-o.

¹¹ An-nen yawo kenpem pusu wene yu-ge angin worak na lak. Iri-nen kit-nen wanurak na ndak-nen yusu-o.

¹² Wene yu-ge mbal pem worala-nen kit-nen yogolar-e: ’Wene iri kuluruk, kulul iri ndak ndak kwaruwok-nen wene iri wil-e ta lujwa-o?’ yurak na lag-o.

¹³ Are, ondoro-ge yi koma eyak ponok nggwe worala-nen kit-nen yogolar-e: ’Wene iri kuluruk iri na ndak ndak kwaruwok-nen wene iri wil-e ta ndil lujwa-o?’ yurak na lag-o.

¹⁴ Kin iri nggal wanurak pug-o. Kenpem pidnak wene iri-ge kit kenndam koroga worasu-o. Wene iri-ge kir-e mondok kenaru, pempa kenemnde bem yil nugwi-o. Iri ala-ge, iri ndak ndak kwarurak iri nak worasu-o.

¹⁵ Yawo-ge kit nak-nen lembener-o. Meya wanugup, lak? Konak wanugub-a? Unluk wolmomtak wanugup, lak? Wat momtak wanugub-a? Kit nak-nen lembena waner-o.

¹⁶ Nde, kir-e yi mende ndi mende kwarat winde yogolat, kenlem nggok yoboklug-e, kit-nen Nagawan Indo Kenmbal Pem Nagawan abuwa kagolat, at-nen yidnak yidnak nak kwarogolat, at-nen imiri mbarak pidnak wene kenpem pid oboksa kwarer-o luk yawo yak kundusu-o. Nde, Nagawan Indo Kenmbal Pem Nagawan-nen-e o yanem kit nggugupndik iri me woragola-ge, imbiringgat tak kunpuwa-o.

¹⁷ Alat nde, kit-nen nde at ene kulurak kinsili rak puruk, at-nen yidnak yidnak kwarigit lak yogolat, kugwiwak ereba na erembel wanurak pem kabak tak konpogola, larok nak yogola-ge,

¹⁸ ndemeret lak tak kunpuwa-o. Nde, o yanem nggugupndik woragup iri me woragolar-e, kunluk mot pem-e woragup pug-o. Wene yawo yak kundusu yu-ge mondok meme rak purak pug-o.

¹⁹ Yawo-ge kit nak-nen lembener-o. Kunluk wolmomtak nde wanugup, lak? Are, wat momtak nde wanugub-a? Imbiringgat lem nde wanugup, lak? Are, imbiri lamut lem nde wanugub-a? Kit nak-nen lembener-o. Kit-nen wene nggaruksa yugup iri-ge mbal min nggweyak min aru-o. Kit-nen-e kunluk wolmomtak irit waner-o.

²⁰ Nagawan Indo Kenmbal Pem Nagawan abuwa kagolat, mot mor-et at-nen yidnak yidnak nak kwarogolat wolmer-o. Iri yogola-ge, kit min kit-nen wigarak min-e Nagawan Indo-nen o konmborak Abarakam min Isak min Yakup min wok kindimin-o luk urul yak indid o iri na me woragolat, kunluk mot pem-et woragub-o” yij-o.