TUGURUK YIDNAK WENE 26 - Nanduk Ngget Tul Pidnak Wene

Yagidnak nandug-et mbara Nagawan Indo amanggim purak wene 26:1-15

¹ Musa-nen yosolar-e: ”Kit nde Nagawan Indo Kenmbal Pem Nagawan-nen kunduwa o iri na me nggugupndik woragolar-e,

² kit-nen keneyapmu yakup mende oboksa nandug-et anggul mbara mbarugup ereba na-ge mul sum misik arem yarak puruk, waruk Nagawan Indo-nen ondoro lenak pid iri na me pil mbururag-o.

³ Iri luk, iri tarem tepan ombo iri me yabu wanosolat wolma iri na yak togolar-e: ’An-e yawo Nagawan Indo Nembal Pem Nagawan para yak tusu-o. Nit wok nundurak pem nonmborak urul yak indid iri na me ngguwagi-o’ luk yak turag-o.

⁴ Iri yogola-ge, tepan ombo-nen-e mul sum iri na-ge kinggem-nen waga Nagawan Indo Kembal Pem Nagawan amanggim kan pugwi sa iri na me waga purag-o.

⁵ Iri yosola-ge, kat-nen Nagawan Indo imbiri bem wene-ge yu nggal yurag-o: ’Nagawan Indo wa-e. Nombo-ge Aram nap, we yeba nak waring kaso nab-o. Elirak inmin Mesira mberarik, iri me ap sal nggal irit woragij-o. Mondog-et iri me mborosolar-e, enpe-ge marig-et mbiriga-t nde, ap enlem mondok nggok enmawi worak irit kwat yiga-o.

⁶ Nde, Mesira nap-nen insilepma min nit kwat nonpogolar-e, mumnggup manggi rak ninpiga-o.

⁷ Iri yogola, nit-nen Nagawan Indo nonmborak Enmbal Pem Nagawan kat kemengen mbarogolar-e: ”Yongga nindi-o” yogola-ge, kat-nen-e nit nenne kolosolat, nir-e yane worogolat, anggun panggun kagolat, andi bandi kagolat kwarogola-ge, kar-e neneyaigen-o.

⁸ Neneyarug-e, kat kamawi kumbunu nggok pem-nen Mesira-nen wisirik nonposolar-e, kat-nen kwiye worak mende min kagwi buk mende min nin tak nan tak kwarak posola, wim nab-e kwiye rak inpigen-o.

⁹ Iri rak unpurug-e, Mesira-nen yu me wok nunpuruk lobok lug-e o nggweyak amburu worak yi mende ndi mende kwarat yu wok nindigen-o.

¹⁰ Iri bem-e, Nagawan Indo wa-e. Kat-nen nggweyak wok nirigen iri na bem yaki nandug-et mbara kat wok kurusu-o’ luk yurag-o. Yurug-e, mul sum iri na-ge Nagawan Indo Kembal Pem Nagawan eram puruk, at erembel wanurag-o.

¹¹ Nagawan Indo Kenmbal Pem Nagawan-nen nunggwi mende konkwela kinmin wok kindidnak pem ’Wiwa-o’ yak turag-o. Lewi nap na irit, ap sal kit kennggendumu woragwi ereba na irit yak unduruk, it inmin-et iri kwarogolar-e, kenalin kenalen yurag-o.

¹² Nde, olengen kenan arem nggogolar-e, pempa kit kenarengge karetkwe-nen yidnak kit keneyapmu-nen yakup mende enggep lombok ndok wosa wok ondogolar-e, tepan ombo Lewi nap min ap sal min li mul terak min kweyap togwe min kit kennggendumu woragwi ereba nat inmbitsa nonggolat wolmakluk wok undurag-o. Iri luk,

¹³ kit-nen Nagawan Indo Kenmbal Pem Nagawan yak togolar-e: ’An neyapmu-nen yagidnak nandug-et mondok mbara enggep lombok kat kamanggim purak iri na-ge marig-et mbi-ret an nama pigit lag-o. Are, oboksa Lewi nap min ap sal min li mul terak min kweyap togwe min Nagawan Indo Nembal Pem Nagawan-nen yak nirigen ndak ndag-et kwarosolat wok undukmu-o. Narengge karetkwe enggep lombok kat kamanggim purak nebem pigen ereba na-ge misiget tet kwid tigit lag-o.

¹⁴ Kat kamanggim pigi mende ereba-ge tabun puruk woragolat marig-et tet mbi wanigit lag-o. Mbilaro ngin mende nebe kwat yidnak woralar-e, kat kamanggim pigi mende ereba-ge nama-nen mondok waruk mbirigit lag-o. Ap wat yidnak enmanggim-o luk na mondok pigit lag-o. Nagawan Indo wa-e. An-e kat-nen yidnak yidnag-et kwaroso-o. Kat-nen nebem pidnag-e ndak ndag-et kwaroso-o.

¹⁵ Mondok kondoro marak aid arem iri me-nen mbel neneyasolat, kilirak Isarael nap inmbiringgat tuk inpi-o. Kat-nen nonmborak urul yak indigen iri na ndak ndag-et wok nindigen o amburu worak yi mende ndi mende kwarat yu bem na kimbiringgat mberak posolat wolmin-o’ yak turag-o.

Nagawan Indo-nen len inpidnak nap 26:16-19

¹⁶ Nde, yawo-ge Nagawan Indo-nen kwarurak kenpem pid ereba na oboksa kenpem pusu-o. Kenpem pid ereba na kwarogolar-e, ndemeret kinndi-net mot mor-et kwarogolat wolmer-o.

¹⁷ Yawo-ge kit-nen yogolar-e: ’Nagawan Indo iri-ge nit Nenmbal Pem Nagawan-net yusu-o. Nir-e at-nen yidnak yidnak nak kwarogolat, at-nen imiri mbarak pidnak wene min at-nen nenpem pidnak wene min mondok kwarogolat wulmul-o’ luk mondok watsa yili-o.

¹⁸ Nde, yawo-ge Nagawan Indo-nen-e: ’Nilirak tak kinpimin-o’ luk urul yid iri na ndak ndag-et at ondomok ilirak tak kunpusu-o. At-nen-e at-nen kenpem pidnak wene oboksa kwarobokluk kenpem pusu-o.

¹⁹ Nagawan Indo-nen-e at-nen ndak wat inpid nap oboksa ennggendumu-nen kir-e mondok kek tak kunpuwama, kentembel wanogolat, kit nak kunnu kek tak pogolat yuwa-o. Kir-e at-nen urul yak kindid iri na ndak ndag-et at ilirak kwat yugub-o” luk yak indij-o.