TUGURUK YIDNAK WENE 25 - Nanduk Ngget Tul Pidnak Wene

¹ Kit Isarael nap kennggendumu-nen nde ap mberen ennggendumu wene worala, wene mbenarugwi sa mbutlug-e, mbenarukmu nde, misik nap ebem-e wene lak, nde, misik nap ebem nak nde ndemeret lugudtak kwaridnak karug-e,

² onggo mbut wururak ala-ge, wene mbenarugwi nap-nen: ’Tudtak nggwe mbiring min-o’ yak turuk, erengen pem-et at-nen meya kwaridnak iri na ndak wosa mbur-e lel kudtag-o.

³ Alat nde, empat pulu (40) ombol nggwe-ge wururak pug-o. Nde, empat pulu (40) ombol nggwe-t nde worogolar-e, ap kwarat enlengen pem ap iri na-ge nagweyak nggal tak obogolar-o.

⁴ Sapi-nen nde nggandum mbato engen mbilara lel kondosola-ge, nujwa naru sapi iri emnde-ge mondok kamarurak pug-o.

Ap mbi wat yosoma, onowe onowot-nen mondok kwarurak wene 25:5-10

⁵ Ap mbi owe ala na, owot ala na enmberek worakmu nde, misik nde ondolma ambara mbi pigit lag-et wat yuwama-ge, ogwe togwe iri na-ge un owe owot eralu nggwe-ge mondok wanurak pug-o. Are, ap wat yuwa iri ambik owe owot iri na-net wanurag-o.

⁶ Wanuruk, li ap nde ndagurug-e, kit Isarael nap kennggendumu-nen ap wat ma iri na unu lak ma naru, la iri na-ge at wat yidnak iri na-nen ondolma pidnak nggal irit yik kudtag-o.

⁷ Ap iri na nde: ’Kwe iri-ge an wanurag-e nimbir-o’ luk keya obosola-ge, kwe iri na-ge mbutluk, o iri me woragwi nap ap yok nggok ereba na yak ondosolar-e, yu nggal yak undurag-o: ’Norogwe na-ge an wok nuburuk Isarael nap nennggendumu-nen at winde wat yid iri na ondolma purak pem nimin wolmomtak iri na-ge keya nubusu-o’ luk yak undurag-o.

⁸ Iri yak ondosola-ge, o siri iri me woragwi ap enne kulugwi nap yok nggok ereba na-nen ap iri na wene mbo uburuk: ’Kar-e noluk-nen iri kwarusu-o?’ yukmu nde, ’Kwe iri-ge wanimin pug-er-o’ luk mondok wat tag-et posola-ge,

⁹ ap enne kulugwi nap ereba na enlengen pem-et kwe togwe iri na-nen ap iri na eram lasolar-e, ap iri na ujok sum lit yaga wanosolat, wusi erare bem tebarosolat-nen yosolar-e: ’Ap onowe onowot unu ki rak purak pem ondolma pugwi buk nab-e yu nggal-et kwat unpugwi-nen yusu-o’ luk yak turag-o.

¹⁰ Iri kwaridnak ala, Isarael nap ennggendumu-nen ap iri nggal kwaridnak iri na unnu yarogolar-e: ’Unuwok sum lit kaidnak nab-o’ luk yak undurag-o” yij-o. 25:11-19 Ayat ereba arem-e imiri mbarak pidnak wene min it-nen kwarurak enpem pidnak wene ereba na min tuguruk yak indidnak mbarak worasu-o.