TUGURUK YIDNAK WENE 24 - Nanduk Ngget Tul Pidnak Wene

Kwe wanidnak iri na keya buruk misik wanogolat-nen kwarurak yak indidnak wene 24:1-4

¹ Musa-nen yosolar-e: ”Ap misik-nen kwe ndugum misik wanuruk worasoma nde, kwe iri na-nen meya ap iri na inggiri rak purak mende mbi kwaridnak ala karuk, isili rak posolar-e, ap iri na-nen-e kwe iri na keya burak pem engga mbal turuk langgara o ma-nen wirik purag-o.

² Nde, abok kwe iri na ap misik-nen wanuwarik-net nde,

³ siyak woraruk-nen nde isili rak puruk, kwe iri na keya burak engga mbal turuk langgara wirik posolat ala na, un abok wanidnak iri na wat yidnak ala na,

⁴ kwe iri na-ge un nandug-et keya ubuwa iri na-nen-e tuguruk mondok wanurak pug-o. At-nen kwe iri yik kasolar-e, emben to rak pidnak kwe irit yik kudtag-o. Alat nde, at-nen tuguruk kwe iri na wanuwa nggal-e, Nagawan Indo Kenmbal Pem Nagawan mbilaro ngin tak ubugup naru, mondok wanurak pug-o. Nagawan Indo-nen wok kunduwa wi iri na woragolar-e, meya iri mende-ge mondok kwarurak pug-o.

It-nen kwarogolat wolmomtak wene 24:5–25:4

⁵ Ap nggeret kwe wanidnak nab-e san ombo (tentara) ngguruk, wim timbiril mborosolat, yabu ereba mende erep min wanuwakluk ebem purak pug-o. Are, it unluk wolmomtak yabu wanosolat, ogwe iri na alen tak posolat wolmakluk, olengen misik wok tosoma, we wolmomtag-o.

⁶ Kit-nen nde yi mende ndi mende luru ap wok undugupndik nde, onggo nde it-nen nggandum mbato aboro wanugwi kerep nde wanuruk tena woragolar-e, ap arengge ombo iri na-ge kerep iri na bem-net at ogwela inmin-e unluk woragwi me, mondok wanurak pug-o.

⁷ Kit Isarael nap-net nde kit kennggendumu ap misik-nen Isarael nap misik kuraguwarik, at ndegel oboso nap tak posolat ala na irit, onggo wanosolat ala na irit kwarosola-ge, ap iri-ge mondok worogolat, meya iri mende-ge kit kennggendumu-nen lak tak purag-o.

⁸ Nde, ndigiril laso mbijap kenpem yidnak ala-ge, tepan ombo Lewi nap-nen yak kunduwa iri na-t kwarurag-o. Nde, kwarurak mende-ge an-nen it yak indigi ereba ndak ndag-et kwarurag-o.

⁹ Mesira nen lobok yukmu, tundumu ud iri mende Nagawan Indo Kenmbal Pem Nagawan-nen Miriam ebem pamu, Miriam kwat yidnak iri na kinndi yebet ker-o.

¹⁰ Kit-nen kenarengge misik kanggamirak luru wok undurug-e, iri na bem abare sum langgwirik nene yoso iri na luru tena wolmomtak pem ama wil nggurak pug-o.

¹¹ Are, kar-e mbepme-t worasoma, at-net wok kiril womag-o.

¹² Ap iri nde arengge lak nap-nen-e usum iri na-ge mondok parugu irit worasoma nene yurak pug-o.

¹³ Alat nde, o nde ndamuk yosola-ge, yutluk nene yik tenak wolmakluk, wok til mbererenak wolmomtag-o. Kat-nen iri kwarosola, wa yak korosola-ge, Nagawan Indo Kembal Pem Nagawan-nen-e alen kebem puwa-o.

¹⁴ Kit kenlem nap-nen na irit, enlem nin nap-nen na irit enarengge lak kit woragwi sa kennggendumu anggun panggunsa woragolat, onggo wok undurak pem keneyabu wanugwi nab-e mondok enmberam ludtak pug-o.

¹⁵ Yabu misik tarem wanidnak pem-e ar-e tol wok turag-et perasu iri-ge at-nen ukwe mende na mondok woratla me, molengen woroksa mbigit lak ma-net onggo-ge wok tosolat wolmomtag-o. Kat-nen nde keyabu wanidnak iri na nde onggo wok tigit lak ala-ge, at-nen-e: ’Nagawan Indo wa-e. At yu-ge yu nggal kwat nubusu-o’ luk ene nggoksa Nagawan Indo emengen mbarosola-ge, kar-e meya yoso nap irit yik kiyujwa-o.

¹⁶ Ambara-nen meya kwaruwa onggo-ge eid wururak pug-o. Nde, eid-nen meya kwaruwa onggo-ge ambara wururak pug-o. Ap enambik tak lombog-et it meya kwaridnak pem-et mondok undurag-o.

¹⁷ Ap sal min li mul terak min enpem wene mbarogolar-e, wene mot mot mbarugwi na-ge lugudtak purak pug-o. Kit kenarengge wok indidnak pem kweyap togwe unsum-e luru tena wolmomtak pug-o.

¹⁸ Kit na Mesira-nen-e ap ndegel unpugwi nab-et woraigepma-o. Iri kwarogola, Nagawan Indo Kenmbal Pem Nagawan-nen wisirik kinpid iri na kinndi yebet ker-o. Iri bem-nen an-e kit-nen kwat tenak wolmomtak wene yu kenpem pusu-o.

¹⁹ Kit-nen nde kit keneyapmu yakup ereba na ebe mbarogolar-e, tuguruk mbutluk keneyapmu nggandum mbato mbarogolat erep minggirik keya bidnak ereba na-ge mondok wil mbururak pug-o. Kit-nen kwarugup mende oboksa bem Nagawan Indo Kenmbal Pem Nagawan-nen imbiringgat tak kunpuwakluk, nggandum mbato minggirik ereba-ge ap sal min li mul terak min kweyap togwe min enmanggim keya burag-o.

^20-21 Kit-nen kenengen saitun engen min anggut engen min nandug-et mbatlug-e, tuguruk mbutluk minggirik ereba na-ge mondok wil mbururak pug-o. Ereba-ge ap sal min li mul terak min kweyap togwe min enmanggim keya burag-o.

²² Kit nanduk Mesira-nen ap ndegel unpugwi nap woraigep iri na kinndi yebet ker-o. Iri ala karuk-nen kit-nen kwat tenak wolmomtak wene yu-ge an-nen kenpem pusu-o.