TUGURUK YIDNAK WENE 13 - Nanduk Ngget Tul Pidnak Wene

¹ Kit kennggendumu-nen nde abok-nen kwat yurak wene urul yoso nap ala na, nabi ludtak nak kaso nap ala na-nen nde ’Kagwi buk mende ala na, wi yurak mende ala na kwat ma-o’ luk urul posola-ge,

² iri kwaruwa iri-ge kit-nen kit kenaru buk mbal pem nagawan nin mbi ndegel obogolat, erembel wanogolat yuwakluk-nen kwaruwa-o. Nde, at-nen urul puwa iri na-ge ndemeret kwat ma-t nde,

³ ap iri na kinndi wok turak pug-o. Iri kwaruwa iri-ge, Nagawan Indo Kenmbal Pem Nagawan-nen-e: ’Ndemeret it inndi min-et an nabuwa kali, lak?’ luk kinndi kayekluk ap iri ebem puwama-nen kwaruwa-o.

^4-5 Kit-nen kwarogolat wolmomtak tula Nagawan Indo-nen mirik kinpidnak tula iri na lugud tak kenpeyekluk-nen kwaruwa me, ap iri nggal-e mondok abu wururag-o. Ap iri-ge anggun panggun tak kunpugwi sa-nen wisirik kinpid Nagawan Indo Kenmbal Pem Nagawan iri na imin sirid mbaruwakluk kwat kunpusu iri-ge meya yoso nap-net yusu-o. Iri kwaroso nab-e meya iri nggal kit kennggendumu-nen lak makluk mondok wururag-o. Alat nde, kir-e Nagawan Indo Kenmbal Pem Nagawan imbirik nak mborogolat, at nak kek tak obogolat, at-nen kenpem pidnak nak kwarurag-o. Kir-e pempa mondok at imin nak panggarak wolmomtag-o.

^6-7 Kit konowe konowot-nen ala na, kinlirak kwami-nen ala na, ap-nen ala na, konkwerak kinndi kundik-nen ala na, kennggamirak mondok kundik-nen ala na, it-nen nde ap kit kenndam worali nap min erepma worali nap min enmbal pem nagawan nin mbi kit-nen na irit, konmborak-nen na irit kenaru buk iri na ’Erembel wanuwog-o’ luk kuraga kenmengen mbarogola-ge,

⁸ enne na mondok kulurak puk. Kinndi lunuwakluk larok na yurak puk. Enabuwa na kudtak puk. Mondok inmiri na yurak pug-o.

^9-10 Mondok kerep pem nak abu wururag-o. Kat nanduk-net lel kasola-nen ap ereb-e kimbirik-nen wururag-o. Nit anggun panggun tak ninpiga sa Mesira-nen wisirik ninpid Nagawan Indo Nenmbal Pem Nagawan iri na eram-nen erepma rak nonposolat lugud tak nenpeyekluk yusu iri-ge mondok abu wururag-o.

¹¹ Wurugupmu-ge, wurugup obok iri na nde Isarael nap oboksa-nen kulurug-e, meya iri mende kwarurag-e kwiye luk, meya iri mende-ge kwaruwa bug-o” yij-o. 13:12–18:13 Pasal 13 erep min Pasal 14 kuri Pasal 18:13 kuri pasal ereya arem-e Musa-nen-e Isarael nap wolmomtak pem na, Mbal Pem Nagawan emmbel wanurak pem na ”Iri nggal kwarurag-o” luk tuguruk yak indidnak wene iri mbarak worasu-o.