TUGURUK YIDNAK WENE 12 - Nanduk Ngget Tul Pidnak Wene

Mbal Pem Nagawan-nen at erembel wanurak ondoro-ge misik me nak lenak pid wene 12:1-28

¹ Musa-nen yosolar-e: ”Konmborak Enmbal Pem Nagawan, Nagawan Indo-nen wok kindid o iri na me woragolat-nen tena woragolat, kwat tenak wolmomtak wene-ge yur-o.

² Kit nde o iri me ngguruk woragolar-e, it-nen unkugwi erembel wanugwi ondoro ndobo mot pem min ndobo teberak pem min e angga miri indipma min ap iri me woragwi nap-nen unkugiwak erembel wanugwi ondoro oboksa ereba-ge mondok ndamera yigisa lak tak per-o.

³ It-nen unkugwiwak amanggim kan pugwi ondoro-ge mijara keya bogolat, it-nen erembel wanugwi kerep sindik ereba-ge ndamera keya bogolat, kugwi Asera ut memera ndak wiridnak ereba-ge kan pogolat, kugwiwak ininggi-nen ndak wiridnak ereba-ge yigisa keya bogolat kwarugupmu, it-nen ereba me erembel wanugwi ereba na-ge mondok tuguruk erembel wanigit lak mag-o.

⁴ Kit-nen Nagawan Indo Kenmbal Pem Nagawan erembel wanogolar-e, it ap ereba-nen unkugiwak erembel wanugwi memera erembel wanurak pug-o.

⁵ Isarael nap oboksa woragwi sa-nen-e Nagawan Indo Mbal Pem Nagawan-nen-e at eram lobok luk, at erembel wanurak sa ondoro-ge misiget me nak lenak puwa-o.

⁶ Iri ala, kit-nen iri me pogolar-e, at amanggim kan purak mende min at amanggim purak mende min karetkwe-nen yidnak enggep lombok min at amanggim pugwi mende erep min ’Pimin-er-o’ luk wat sa yidnak iri na pogolut min kinndi mbek tak pem pugwi min nandug-et ndagidnak sapi min kambing min lomba min wurug-e at-nen ondoro lenak pidnak iri me nak pil lobok yurag-o.

⁷ Kit-nen yabu wanidnag-e Nagawan Indo-net imbiringgat tak posola, ebe yuwa me, kir-e konkwela inmin Nagawan Indo eram iri me-net nunggwi mende nonggolat, kenalin kenalen yurag-o.

⁸ Nde, iri kwarurak tarem wok yosola-ge, yawo kwatli yeba nggal kwarurak pug-o. Yawo-ge kit oboksa-ge kondomok kinndi-n pidnak pem erembel wanili iri-ge,

⁹ o Nagawan Indo-nen wok kunduwa iri na me kit-nen ngguruk, yamuksa kona wolmomtak iri na me-ge awo nggwigit lak-nen kwatli-o.

¹⁰ Nde, kir-e Yi Yareren mbara ndil lagolug-e, Nagawan Indo-nen-e kit yongga kondosolat, o iri na me-t koreyak kunpuwama, iri me worabog-o. Woragolar-e, wim nap oboksa-nen kunduwa naru, nggetlel kunpuruk worala, kir-e kona yamuksa-t woragub-o.

¹¹ Nde, Nagawan Indo Kenmbal Pem Nagawan-nen-e at erembel wanurak ondoro-ge misik me lenak puwama-ge, an-nen kenpem pigi mende, at amanggim kan purak min at amanggim pugwi mende erep min at amanggim pugwi mende oboksa enggep lombok karetkwe-nen yidnak min ’At amanggim iniksa pul-o’ luk owak mbaridnak min ereba at amanggim purak pem warug-e at-nen ondoro misiget me lenak pidnak iri na me nak mondog-et waruk mbururag-o.

¹² Nagawan Indo Kenmbal Pem Nagawan eram kenalin kenalen yogolar-e, kinlirak min ndegel kunpugwi nap min Lewi nap kit kunuwi silmu woragwi nap min oboksa-nen kenalin kenalen ker-o. Nde, Lewi nab-et kit kenma iri me-ge nggweyak wok indigit lak yid iri yeberak wolmer-o.

¹³ Kit-nen an namanggim pogolar-e, kondomok kinndi nak-nen ondoro nin me purak pug-o.

¹⁴ Alat nde, Nagawan Indo-nen kit kenlem misik woragwi sa iri me ondoro lenak puwa sa iri na me nak at amanggim kan pugwi mende pogolat, an-nen erep yak kindigi mende oboksa iri me nak kwarurag-o.

¹⁵ Alat nde, kit kondomok kenma woragolat-nen kondomok usu worak mende wutluk norak iri-ge wene lag-o. Nagawan Indo-nen wok kindidnak mende kwarat norak iri-ge ob-o. Nde, uno ereba-ge kit-nen kijang uno min urusa uno min nili ereba nggal-et konak nap-nen na irit, mbilaro ngin mende kwat yidnak nap-nen na irit, uno-ge terag-et nonggolat wolmomtag-o.

¹⁶ Alat nde, eyabi-ge mondok norak pug-o. Eyabi-ge yi kiril kaidnak nggal mondok nggweyak ma kiril kudtag-o.

¹⁷ Mbal Pem Nagawan amanggim pugwi mende nandug-et kenarengge enggep lombok karetkwe pidnak kennggandum min kenanggut engen min kenengen saitun amburu min nandug-et ndagidnak kensapi min konlomba min kenkambing min ’Iniksa pimin-o’ luk owak mbaridnak iri na onggo wosa pugup min kinndi mbek tak pem-et pugup mende min erep pugup min ereba nonggolar-e, kit kondomok kenma-nen-e mondok norak pug-o.

¹⁸ Kit min kinlirak min ndegel kunpugwi nap min Lewi nap kit kunuwi silmu woragwi nap min kit oboksa-nen Nagawan Indo amanggim pugup ereba na nonggolar-e, ondoro at-nen lenak puwa Nagawan Indo eram iri na nak-nen norag-o. Nde, nonggolar-e, kit-nen kwaridnak mende oboksa-ge ebe worak yidnak pem iri me-nen nonggolar-e, mondok kenalin kenalen kudtag-o.

¹⁹ Kit o wok kunduwa iri na me woragolar-e, Lewi nab-e we nggilarak nak keya unpugup naru, mondok kwara yik eneyarok wolmer-o.

²⁰ Nagawan Indo Kenmbal Pem Nagawan-nen urul yid iri na kwarosolat, kit wolmomtak sa terak tak posola-nen perak nde, uno-ge kondomok kinndi-n pidnak norak iri-ge ob-o.

²¹ Nde, Nagawan Indo Kenmbal Pem Nagawan-nen at erembel wanurak lenak pid ondoro iri nde kit kenma-nen mbururak nde erepma ala-ge, Nagawan Indo-nen wok kindidnak sapi misik ala na, lomba ala na, kambing ala na wutluk, an-nen yak kindigi iri na nggal kwasa kit kenma woragolat, kinndi-nen pidnak pidnak norak iri-ge ob-er-o.

²² Konak nap-nen na irit, ap mbilaro ngin kwat yidnak nap-nen na irit, kit-nen urusa ala na, kijang ala na irit uno nili nggal uno-ge kinndi-nen peraruk norak iri-ge ob-er-o.

²³ Alat nde, uno eyabi parugu iri-ge mondok norak pug-o. Ebe uruk tak poso iri na-ge eyabi arem worala me, uruk tak poso iri na-ge uno min norag-e mondok meya-o.

²⁴ Eyabi-ge mondok marig-et tet norak pug-o. Nggweyak ma yi kiril kaidnak nggal kiril kudtag-o.

²⁵ Kit-nen nde wene iri ndak ndag-et kwarogola-ge, Nagawan Indo-nen alen kenpem posolar-e, kit na irit, kit-nen wigarak na irit mondok konak irit woragub-o.

²⁶ Kit-nen-e Nagawan Indo amanggim purak min at we wok tugwi mende min kit-nen purak urul pugup ereba na warug-e Nagawan Indo-nen ondoro lenak pidnak iri na me waruk mbururag-o.

²⁷ Nde, iri me pogolar-e, Nagawan Indo amanggim ebis-et kan pugwi mende pogolat, at amanggim pugwi mende misik uno nonggolat, eyabi kilik pogolar-e, mondok Nagawan Indo amanggim kan pugwi sa iri me nak purag-o.

²⁸ Nde, kit-nen kwarurak an-nen kenpem pusu yeba nde mondok kwara yidnak yidnag-et kwarogola-ge, kit-nen nde Nagawan Indo Kenmbal Pem Nagawan alen tak purak mende konak nak kwarogola-ge, kit na irit, kit-nen wigarak na irit mondok kinmiri mbarak, kenalen worak irit pempa woragub-o” yij-o.

Kugwiwak erembel wanuwa naru nggomo indidnak wene 12:29–13:11

²⁹ Musa-nen yosolar-e: ”Nde, Nagawan Indo Kenmbal Pem Nagawan nen-e o iri me woragwi nab-e mondok lak tak unpuwama, kir-e o iri me kore yil nggugupndik woragub-o.

³⁰ Iri me woragwi nap lak tak unpuwama, woragolar-e, it-nen unkugiwak erembel wanugwi ereba kit-nen-e mumururak pug-o. Iri mende nde kwarogolar-e, lak tak kunpurak kenare pugub-o.

³¹ It enlem nin nap-nen it unkugiwak erembel wanogolar-e, Nagawan Indo isilepma rak pugwi mende kwarogolat-nen wanugwi me, kit-nen Nagawan Indo Kenmbal Pem Nagawan erembel wanogolar-e, it-nen kwarugwi iri mende kwarogolat erembel wanurak pug-o. Mondok it inlirag-et nde, it unkugiwak amanggim wosa kan pugwi sa iri me kan pugwi-o.

³² An-nen yak kindigi wene yeba-ge mariger-o luk siyak keya bogolat, are, siyak nambena pogolat mondok kwarurak pug-o.