TUGURUK YIDNAK WENE 10 - Nanduk Ngget Tul Pidnak Wene

Nagawan Indo-nen mberen pem tak posolat imiri mbarak pidnak wene sepulu Musa wok tid wene 10:1-11

¹ Musa-nen yosolar-e: ”Iri luk, Nagawan Indo-nen an yak norosolar-e: ’Musa wa-e. Kar-e kerep abak mberen nanduk ereya na nggal mberen koni-o. Konurug-e, yarak purak ondoro labu misik koni-o. Konurug-e, an neram ndobo bem luwasug-o.

² Waruk luwasola-ge, an-nen kerep ereya bem-e kerep nanduk kat-nen ndamera keya bigen ereya bem mbarigi wene ereya na-t tuguruk mbarak pumu, kerep ereya na-ge ondoro konugun iri na arem yarak purag-o’ yak nirij-o.

³ Yolosoma-ge, e akasia bem labu misik konuruk, kerep mberen nanduk ereya na nggal abak mberen konurug-e, waruk ndobo bem lagi-o.

⁴ Lasola-ge, Nagawan Indo-nen imiri mbarak pidnak wene sepulu nanduk ereya na-t kerep mberen ya na bem mbarak pij-o. Imiri mbarak pidnak wene sepulu ereya-ge kit ndobo ayo bem mendak woragola, kanduk arem-nen yid ereya na-t mbarij-o. Mbarak purug-e, kerep ereya na-ge Nagawan Indo-nen an wok norosola-ge,

⁵ ndobo bem-nen mbuwasolar-e, kerep ya na-ge ondoro konigi iri na arem yarak pigi-o. Yarak pigi iri na-ge, yawo-nen na mondok yarak irit worasu-o” yij-o.

⁶ (Iri lug-e, Isarael nab-e Yakan nap-nen yi kenanggurak ondoro nggweyak emnde mbaril lobok yiga sa ereba na me-nen mbirigarik, Mosera mbiriga-o. Iri me-nen-e Arun na-ge wat yosola, yapma puruk, at ambara Eleasat na-ge at ondolma tepan ombo nggok irit nggwij-o.

⁷ Nde, iri na me-nen-e o Nggutnggot mbirigarik, iri me-nen o yi kwarat worak sa Yotmbata mbiriga-o.

⁸ Nde, ndobo iri bem-nen-e Nagawan Indo-nen-e Lewi nab-e urul pidnak wene labu mbarak iri na konogolat, Nagawan Indo ndegel obogolat, Nagawan Indo unu bem inmbiringgat tak unpugwi wene yogolat, iri kwarurak yabu iri-ge Lewi nap nak enpem pij-o. Nde, Lewi nap nak enpem pid iri na-ge yawo-nen na irit tena worali-o.

⁹ Iri bem-nen it enlem Isarael nap erep iri-nen Kanaan nggweyak wanogola-t nde, it enlem Lewi nab-e wok indigit lag-o. Nde, Nagawan Indo Kenmbal Pem Nagawan-nen yid iri na ndak ndag-et it inmining angge nggal-e Nagawan Indo iri-net yusu-o.)

¹⁰ Musa-nen yosolar-e: ”Nde, an ndobo bem iri me woralar-e, nanduk woragi nggal-et, lengge empat pulu (40) kubu empat pulu (40) irit woragi-o. Iri yosola-ge, Nagawan Indo-ge an nene-t kuluruk, kit lak tak kunpurag-e larok yij-o.

¹¹ Iri lug-e, at-nen-e o kit konmborak wok kindimin-o luk urul yak indid iri na winde yurak pem lit kunpuruk mburuwakluk, ’Mbiri-o’ yak nirij-o” yij-o.

Kwarurak wene Nagawan Indo-nen enpem pidnak wene 10:12-22

¹² Musa-nen yosolar-e: ”Nanggamirak Isarael nap wa-e. Nagawan Indo Kenmbal Pem Nagawan-nen kwarurak wene kenpem pusu yu kwara yebet ker-o. Nagawan Indo Kenmbal Pem Nagawan nak kek tak pogolat, at-nen yidnak yidnak oboksa kwarogolat, ndemeret kinndi-net at nak abuwa karuk, ndegel uburag-o.

¹³ Kit-nen konak wolmomtak pem Nagawan Indo-nen kenpem pidnak wene an-nen yawo yak kundusu yeba oboksa ndak ndag-et kwarurag-o.

¹⁴ Nagawan Indo Kenmbal Pem Nagawan-nen winde yosolar-e, mbal tap amberam kuri min nggweyak min nggweyak ma woraso oboksa min-e at arengge-nen yusu-o.

¹⁵ Alat nde, Nagawan Indo-nen-e kit konmborak enabuwa kwarat karug-e, yi ap ndi ap ennggendumu-nen kir-et len kinpij-o. Iri yid na-ge kir-et at elem nap lenak irit yawo na worali-o.

¹⁶ Iri ala-ge, yawo kuri-nen kinndi amawi yili iri keya buruk, mondok Nagawan Indo-nen yidnak yidnak kwarurag-o.

¹⁷ Nde, Nagawan Indo Kenmbal Pem Nagawan-e kugwiwak oboksa min enmawi worak oboksa min tebek tak puruk, mondok terak minik kek tak-net yusu-o. Nde, ar-e Mbal Pem Nagawan mondok nggok, amawi worak me, at-nen yidnak yidnak nak kwarurag-o. Ar-e ap entare na lombonoso buk, ap onmbol pem lasolat, onggo terak lesa wanoso bug-o.

¹⁸ Ar-e li mul terak min kweyap togwe min mondok mot mor-et kwat onpogolat wolmakluk wene konoso-nen yusu-o. Ap sal nit nenlem nap ennggendumu worali ereba na enabuwa karuk, nunggwi mende min yururak sum min wok ondoso-o.

¹⁹ Nanduk kit na ap sal Mesira iri me woraigep nar-o. Iri bem-e kit-nen na ap sal ereba-ge mondok enabuwa-t yurag-o.

²⁰ Nagawan Indo Kenmbal Pem Nagawan nak kek tak obogolat, at erembel nak wanurag-o. Mondok tugup lak pempa at-nen yidnak nak kwarogolar-e, at unu bem nak owak mbarogolat wolmer-o.

²¹ Ar-e kit Kenmbal Pem Nagawan me, at nak erembel wanurag-o. Nde, kit yongga kondosolar-e, at-nen kwiye worak, wi yurak mende kwarij-e kondomok kenlengen kit-nen kaigep iri nar-o.

²² Nde, mondog-et kit konmborak Mesira mbiriga-ge enpe-ge tuju pulu (70) nak mbiriga-t nde, Nagawan Indo Kenmbal Pem Nagawan-nen-e kenpe kwarat tak konposolar-e, wonaru mbal pem woraso nggal kwarat wonarurak puk tak kinpij-o” yij-o.