TUGURUK YIDNAK WENE 1 - Nanduk Ngget Tul Pidnak Wene

Tuguruk Yidnak Wene Nandug-et yidnak wene 1:1-8

¹ Engga yu arem worasu wene-ge Isarael nap Yi Yareren arem ereba woragolat-nen Musa-nen Isarael nap yak indidnak wene ereba na mbarak worasu-o. Nde, it Isarael nap woraiga ereba-ge o Sup siri koroga mo luwaso (timur) ambigit Yareren eyak ponok nggwe-o. Nde, iri-ge o Paran siri wok o Topel min o Laban min o Eserot min o Ndisagap min ereba enggendumu-o.

² (Nde, Sinai ndobo bem-nen ndobo worak Erom nggwe-nen o Kandes-Mbareneya mborogolar-e, tu ndumu-ge sepulu nene yugwi-o.)

³ It Mesira keya buruk mbirigarig-e, waneya sebelas tanggal satu olengen-e empat pulu iri bem-e Nagawan Indo-nen Isarael nap yak unduwakluk ebem pid wene ereba na oboksa Musa-nen-e Isarael nap yak indij-o.

⁴ Nde, iri yak indid iri-ge, Musa-nen Amori nap nagawan Sikon o Esmbon tena woraso iri na min Mbasan nap nagawan Ok o Astarot min o Enderei min tena woraso iri na min urugwe nggwe rak unpuruk-nen yak indidj-o.

⁵ Nde, Yi Yareren eyak ele bem mo luwaso (timur) ambigit nggwe Moap wi iri me-nen-e Musa-nen anggul-et Nagawan Indo-nen idnak imiri mbarak pidnak wene min it-nen kwarurak enpem pidnak wene ereba na min Isarael nap mirik inpij-o. Mirik onposolat-nen yosolar-e:

⁶ ”Nit Sinai ndobo bem woragola, Nagawan Indo nit Nenmbal Pem Nagawan-nen yosolar-e: ’Kir-e Sinai ndobo yu bem-e ndak woraigeb-o.

⁷ Yawo-ge kunuwi lije mijatluk mburugupndik, Amori nap woragwi o ndobo worak nggwe min eralu nggwe Yi Yareren arem nggwe min ndobo worak nggwe min ndobo lak yamuk tak nggwe min abare ena nggwe (selatan) min Yi Koma Nggok eyak nggwe min ereba-ge kit mburugupndik, Kanaan wi mborogolar-e, ndobo worak Libanon kuri-nen yi nggok Eperat kuri irit mberer-o.

⁸ O ereba oboksa-ge Nagawan Indo an-nen konmbo Abarakam min Isak min Yakup min it-nen wigarak min ”Wok kindimin-o” luk urul yak undukmu-o. Iri yidnak me, kir-e mburugupndig-e, o ereba winde yer-o’ yij-o” luk yak indij-o. 1:9–3:29 Pasal 1 erep min Pasal 2 min Pasal 3 min ereya arem-e it Isarael nap Sinai ndobo bem-nen mbirigarik, nembaga ereba me waring kagolat-nen kwaridnak wene nggok nggal ereba na tuguruk Musa-nen ndindera yak indidnak wene mbarak worasu-o.