OROMA 16 - Nanduk Ngget Tul Pidnak Wene

Paulus-nen enarik tak wa yak indid wene 16:1-16

¹ Lambuk tak inpidnak nap Kenkerea iri me ndegel onposo nintid kwe Pebe iri-ge kenaru rak peyeg-o.

² Nagawan Indo unu bem kwe iri wok uburag-o. Nde, iri kwasa wok unpugwi iri-ge Mbal Pem Nagawan-nen ”Irit kwaruwag-o” yidnak Mbal Pem Nagawan-nen len inpidnak nap-nen kwarugwi-ge irir-o. Kwe iri-nen-e ap kwarat yongga ondosolat, an na yongga-t noroso me, at-nen kit kenpem ukwe pidnak mende worala-ge, yongga-t wururag-o.

³ An nimin totno Kerisut Yesus eyabu misiget erep wanugwi Periska min Akwila min inmin-e ”Wa yak kindij-o” luk yak undurag-o.

⁴ An nimiri yogolar-e, it enmberek ondomok inndi wisirik pidnak me, an-e ”Wiwa-o” luk yak undusu-o. Nde, an-nen nag-e lag-o. Are, enlem nin nap lambuk tak inpidnak nap oboksa min-et ”Wiwa-o” luk yak indili-o.

⁵ It enma ndok wurugwi lambuk tak inpidnak nap na inmin-e ”Wa yak kindij-o” luk yak undurag-o. O Asia-nen nandug-et Kerisut ebem indi angin tubu yid nap, nanggam nindi kundik Epenetus na imin-e ”Wa yak kirij-o” luk yak turag-o.

⁶ Kit kenmanggim yabu kwarat wanid kwe Maria na imin-e ”Wa yak kirij-o” luk yak turag-o.

⁷ An nelem nap an totno o kubu me ninpil nggwidnak nap Andoronikus min Yunias min inmin-e ”Wa yak kindij-o” luk yak undurag-o. Mberen nap iri-ge wirik inpidnak nap ennggenggerak-nen unnu kek tak pidnak nap-nen yili-o. An-e awo Kerisut ebem nindi angin tubu yigit lak ma-net it nanduk inndi angin tubu yidnag-o.

⁸ Nagawan Indo ebem nanggam yidnak me, nindi kundik Ampliatus na imin-e ”Wa yak kirij-o” luk yak turag-o.

⁹ Nit ninmin totno Kerisut eyabu misiget erep wanugwi Urabanus min nanggam nindi kundik Itakis min inmin-e ”Wa yak kindij-o” luk yak undurag-o.

¹⁰ Kerisut ebem mamak puruk woragaid nap Apeles na min Aritobulus ama woragwi nap min inmin-e ”Wa yak kindij-o” luk yak undurag-o.

¹¹ An nelem nap Erorion min Narikitus ama woragwi Nagawan Indo ene wanidnak nap min inmin-e ”Wa yak kindij-o” luk yak undurag-o.

¹² Enmawi min Nagawan Indo ndegel ubugwi kwami Teripena min Teriposa min inmin-e ”Wa yak kindij-o” luk yak undurag-o. An nindi kundik kwe Peresis-nen-e Nagawan Indo eyabu kwarat wanoso kwe iri na imin-e ”Wa yak kirij-o” luk yak turag-o.

¹³ Nagawan Indo ebem-nen len ibidnak nap erembel wanugwi Urupus iri na min at ija an niya nggal tak pidnak na min inmin-e ”Wa yak kindij-o” luk yak undurag-o.

¹⁴ Asinkiritus min Pelegon min Eremes min Patorobas min Eremas min it inmin worali nonowe nonowot tak inpidnak nap oboksa min inmin-e ”Wa yak kindij-o” luk yak undurag-o.

¹⁵ Pilologus min Yulia min Nereus min at owot la kwe min Olimpas min it inmin worali nap Mbal Pem Nagawan-nen len inpidnak nap oboksa min inmin-e ”Wa yak kindij-o” luk yak undurag-o.

¹⁶ Nir-e Kerisut ebem nonowe nonowot tak ninpidnag-o peragoluk, wa yak kerak mbogolat kininggi tenak kerak mber-o. Kerisut ebem lambuk tak inpidnak nap oboksa-nen-e kit kinmin-e ”Wiwa-o” luk yili-o.

Worok tak posolat, ”Iri nggal mer-o” luk nggomo indid wene 16:17-24

¹⁷ Nowe nowosi wa-e. Ap kuri worak onpogolat, inndi angin tubu yidnak lak tak pogolat, mirik kinpidnak wene owak na kuruk togolat kwarugwi nap enabiyem-o luk kir-e kwil kwalsa wolmer-o luk an-e kiri keresa kenmengen mbarusu-o.

¹⁸ Iri nggal kwarugwi nab-e Nenagawan Indo Kerisut na ndegel ibili-ge lag-o. Are, it ondomok ukwe mende na lesa wanuwokluk-nen yili-o. Nde, iri kwarogolar-e, enaru buk woragwi nap na onmbol pem lagolat, enne amburu bem inndi wanili-o.

¹⁹ Kir-e Mbal Pem Nagawan-nen yidnak wene-nen yidnak yidnak nak kwatli wene-ge ap oboksa-nen kuliga-o. Kit-nen iri kwatli iri bem an-e nalen kasu-o. Konak kwarurak pem-e kinndi nggat nggat worak woragolat, nde, meya kwarurak pem-e kenaru buk wid nggal wolmomtak iri-ge nindingen-o.

²⁰ Nde, lambuk tak onposo elem Mbal Pem Nagawan-nen-e ndaget nak kit kunuwok ma Sere iri na yigisa keya buwa-o. Nenagawan Indo Yesus-nen we wok ondoso elem-e kit kinmin wolmag-o.

²¹ At totno yabu misiget erep wanugwi nap Timotius min an nelem nap Lukius min Yason min Sosipatet min-nen ”Wiwa-o” luk yak kindili-o.

²² Engga yu luruk pem mbarigi nap Teretius an-nen-e Nagawan Indo unu bem ”Wiwa-o” luk yak kundusu-o.

²³ An ama worasu nap, lambuk tak inpidnak nap na tepan yuwokluk ama ndok wurugwi nap Nggaius-nen-e ”Wiwa-o” luk yak kundusu-o. O yu me uwang ndok woroso nap Eratus min nonowot Kwaratus min-nen-e ”Wiwa-o” luk yak kindili-o.

²⁴ [Nenagawan Indo Yesus Kerisut-nen we wok ondoso elem-e kit oboksa kinmin wolmag-o. Amen.]

Worok tak posolat-nen Mbal Pem Nagawan erembel wanid wene 16:25-27

²⁵ Mbal Pem Nagawan erembel wanuwog-o! At-nen-e kit kinndi angin tubu yidnak pem tugup lak tak kunpurag-e ndak-nen yusu-o. Iri kwarusu iri-ge, an-nen yak kindidnak aid wene, Yesus Kerisut owene iri-ge, obi-net kura woraidnak wene iri yawo nam tak pusu wene na bem-nen irit kwarusu-o.

²⁶ Nde, yawo-nen-e pem-et woraso Mbal Pem Nagawan-nen-e ”iri nggal mag-o” yidnak pem yi nap ndi nap oboksa-nen enaru luk inndi angin tubu yogolat, at-nen yidnak yidnak nak kwarogolat makluk-ge, Mbal Pem Nagawan ene lomboksa yugwi nap-nen mbaridnak engga bem-nen-e kura yidnak wene iri-ge nam tak pili-o.

²⁷ Ariget nak indi pindong tak woraso Mbal Pem Nagawan iri-ge Yesus Kerisut ebem-nen pempa woragolat nagolat at nak kek tak pogolat wolmog-o! Amen.