NGGOMO WENE 7 - Nanduk Ngget Tul Pidnak Wene

¹ Nambara wa-e. An-nen yak kurusu wene-ge yeberag-et wolmomtag-o. Kat-nen kwarurak kebem pusu yeba-ge meme rak purak pug-o.

² Kat kalen min-et kuruk worayeklug-e, an-nen nggomo kurusu yeba ndak ndag-et kwarurag-o. Kat-nen kerengen iri tigi rak puwa naru kwaluk kwarusu nggal-et an-nen mul kurusu yeba ndak ndag-et kwarurag-o.

³ An-nen mul kurusu wene-ge pempa yebet yebet tak woralat, kindingen arem tak puruk woralat kwarurag-o.

⁴ Kat-nen-e kindi nggat nggat elem iri-ge kowe kowot keyabi minggirik nggal tak puruk, nde, kat-nen karu yidnak iri-ge kanggam mondok kindi kundik nggal tak puruk wolmin-o.

⁵ Inndi nggat nggat elem iri-nen-e kar-e kweyap terak waring kagwi ininggiyapma-nen wisirik kubuwa-o. Kweyap enne amburu kebem puwa-t nde, wisirig-et kubuwa-o.

Terak waring kagwi kweyap 7:6-27

⁶ Nde, misik tarem-e an-e nama-nen nuwi papalo tu nggwe yik kaginggal-e,

⁷ ap sujwe kwarat-nen kwarugwi mende kwarugwi buk awo nak eneyagi-o. Alat nde, it ennggendumu at misik indi wid worak iri na nak lombot posolat worasoma-ge,

^8-9 keyama nggwe lumugumu ereya na-ge ap sujwe iri na-ge tula unggut nimiksa pidnak sa kwe terak noso uwi iri nggwe mborosola kagi-o.

^10-12 Nde, kwe iri-ge yebosa mamak puruk woraso buk kwe-o. Yanem-et nak tulabiyem mborosolat, silmu mborosolat, yanem-et nak tula nandogol kandogoltak ma mborosolat, abage-ge inggiri tet kaso buk, kwiye lak-nen yusu-o. Nde, an yik kaginggal-e, kwe iri na-ge sum-e kweyap terak nogolat-nen yurugwi sum yutluk, kwe na mborosolar-e, ap sujwe iri na min lambuk luk, at iri na mberak purak indi yemnak puruk lobok yosola kagi-o.

¹³ Kwe iri-nen ap sujwe iri na paluk tarik, erare porok kasoluk, inggiri lag-et yosolar-e:

¹⁴ ”An-e yawo-ge an-nen ’Irit kwarimin-o’ yigi iri na ndak ndak tak posolar-e, an-e wam wosa pigi-o.

¹⁵ Iri kwarigirik me, an-e yawo-ge nunggwi mende an nama-nen nenmberek totno norak kogore lobok yigirig-o.

¹⁶ Nde, an nene yoso nondoro iri na bem-e yemarugwi mende konak, Mesira-nen konidnak sum konak umuruk erare nin tak nan tak irit yemarak pigi-o.

¹⁷ Nene yoso nondoro iri na-ge onggo nggok pugwi emben konak mut min sendana min e undu konak aboro min ububu mben konak tak posolat yugurukmu-o.

¹⁸ Nde, yawo-ge nenpem yamuk tak pogolat, yek ngek tenak irit worakmu, o nenpem-nen nda mag-o.

¹⁹ Nde, an nun-e o erepma nggwe-t mborosolat me, oma-ge narik nak worasu-o.

²⁰ Nun-e tol kwarat waruk mbiridnak me, waneya ambap tak posola-net lobok yuwa-o” luk yij-o.

²¹ Iri nggal yosolar-e, ap sujwe iri na-ge ene amburu ebem posolat, indi waga keya buruk amberam lagaij-o.

²² Ap iri na-ge sapi wam urusu mbarurak sa waruk mburugwi nggal, ap wid yeba unduwokluk enne lak wok unpuruk mburugwi nggal, we yebet kagit lak ereba-t kwe iri na imin mbirij-o.

²³ Yanem mare indingen lang worak puwa-ge aru buk woralat, nggwija yeba-nen at are logo bidnak sa mboroso nggal, ap sujwe iri-ge ”An-e nerengenwak lak yimin-e” yebet kagit lak-nen kwarij-o.

²⁴ Iri nggal me, nilirak wa-e. An nene-t kwara koler-o. An-nen nggomo kundusu wene-ge kwara-t yebet kudtak na-e.

²⁵ Kwe iri nggal-e kinndi wanuwa-o luk kwiye mbururag-o. Iri-nen kit-nen na ogore yil mbururak pug-o.

²⁶ Kwe iri ebem-nen ap wosa mbidnag-e kwarat-nen yusu-o. Nde, at ebem-nen lak tak inpidnak nap na mondok wonarurak puk-net yusu-o.

²⁷ At ama mborogolar-e, mondok wat momtak tula poro irit kore yogolar-o.