NGGOMO WENE 5 - Nanduk Ngget Tul Pidnak Wene

”Mbabi yurak pug-o” luk nggomo wiridnak wene 5:1-23

¹ Nambara wa-e. An nene kwara kuli-o! An nindi nggat nggat worak woraso min an-nen yebet kaso mende min an-nen mul kurusu yeba-ge kwara yebet kasolat wolmin-o.

² Iri kwarosola-ge, kat kabage mot mor-et worasolat, wene-ge kwara kindi-net yebet karuk yosolat woranog-o.

³ Kwe terak waring kaso emnde mbu na mondok konak lombok, iri-nen ene na mondok ap indi lak tak posolat yoso-t nde,

⁴ tena buruk ombol nggwe-ge anggun panggun mende min andi bandi mende min nak kebem mbuma-o.

⁵ Kar-e ap wat luk mbugwi sa lit kuburuk mbosolat, tula-ge wat yugwi sa mburugwi iri na me lit yaga mberak kibil mbosolat ma-o.

⁶ At iri-ge unluk woragwi sa mburugwi tula iri nggwe nak mboroso bug-o. Are, lugud tak nggwe mburusu-ge ar-e aru bug-o.

⁷ Iri bem-e, nilirak wa-e. An-nen nggomo kundusu wene-ge lirin lirin tak purak pug-o. Kwara koler-o.

⁸ Kweyap terak nugwi iri nggal endam wok yurak pug-o. Unuwi mborom tet mondok wok yurak pug-o.

⁹ Kat-nen nde kweyap iri nggal imin kundugun ala-ge, kek tak woragwi elem iri na-ge kat kebem-nen lak yosolat, enabuwa kagwi buk nap-nen kusujwe bem-et kerengenwak lak tak puwa-o.

¹⁰ Iri kwarak kuburug-e, kat kisilobulo oboksa nin nap-nen nuruk lak tak pogolat, kat-nen yabu wanosolat kirigak mbidnag-et nde, ebe-ge nin nap enarengge nde kwat ma-o.

¹¹ Kat kebe na kugwi-nen len kobosolat worala, yane worosolat woragun-o.

¹² Iri kwarosolat-nen kat-nen yosolar-e: ”A! An-e noluk-nen nggomo niridnag-e nisili rak pigi-a? Noluk-nen an nggomo norosolat met nuburag-e nimbit woragi-a?

¹³ An-e mul nurugwi nap enne kolosolat, it-nen yidnak yidnak kwarosolat kwarurag-e mondok nimbit woragi-o.

¹⁴ An-e mimo ap pidsa enlengen pem-et wosa mbigi-o” luk yugun-o.

¹⁵ Iri bem-e, kat kondomok kogwe min nag-et panggarak woralat, kindi-ge kogwe bem nag-et kundik wolmomtag-o.

¹⁶ Kweyap nin inmin-nen kinlirak ndakun ebe lak mende-nen yusu-o.

¹⁷ Kinlirak ndakun iri-ge kat min kogwe min kenarik kinlirak-nen yili-o. Ir-e nin nap inlirag-e lag-o.

¹⁸ Kat kogwe bem-et kalen yosolat wolmomtag-o. Kat-nen kebem yamuk tak purag-e kogwe kimin kenanggul tenagidnak iri na eram-et kore yurag-o.

¹⁹ Nde, kat kogwe konak umbul mbul worak kijang nggal iri-ge at erare konak iri na-nen kar-e kindi lak lak tak posolat woralat, kindi ebem kundugu pugun iri na-nen kindi wawa rak kobosolat wolmag-o.

²⁰ Nambara wa-e. No amanggim-nen kat kindi-ge kwami ndugum erep ereba na enpem kindi abi posolat wolmomtag-o? Noluk-nen kweyap terak waring kagwi inmin kundugun-o?

²¹ Nagawan Indo-nen-e nggweyakma nap-nen kwatli mitli oboksa kasu-o. Nggweyakma nap-nen tu nili oboksa Nagawan Indo-ge yik eneyarok worasu-o.

²² Meya yugwi nap-nen meya kwatli ereba-ge it ondomok enmanggim sabu logo bidnak nggal-nen yusu-o.

²³ Ar-e nggomo wene kwara wanigit lak, keya bidnak pem-net wat ma-o. At-nen mondok yebet kaso buk iri na-nen waruk lak tak uburak sa ibil mburuwa-o.