NGGOMO WENE 30 - Nanduk Ngget Tul Pidnak Wene

Agut-nen yidnak wene 30:1-6

¹ Nde, yeba-ge o Masa nap Yake ambara Agut emndam-nen wirik pidnak wene-o: ”Mbal Pem Nagawan kar-e an nimin woragit lak yosolat, an-nen kwarurag-e mondok namawi lak yusu-o!

² An-e mondok wam nggal yebet kaso buk, nindi lak-nen yusu-o.

³ Inndi nggat nggat worak wolmomtak wene iri-ge an-e mondok mbenarusu bug-o. Mbal Pem Nagawan owene-ge mariget tet mondok naru bug-o.

⁴ Nggweyakma nab-e ta nggal-nen aid arem-e laruk mbuwaruk kwaroso-o? O wija-ge ar-e inggi mok pem tenaga wanoso, lak? Usum pem-nen yi-ge nggetla wanoso, lak? Are, o yu-ge ta-nen kuri wosa pil lobok yamu-o? Nde, iri kwaroso nab-e ta-o? Nde, ambara-ge ta-o? Ndemeret kar-e karu irir-o!

⁵ Mbal Pem Nagawan-e ’Irit kwat kinpimin-o’ luk urul pidnak iri-ge oboksa ndak ndag-et kwaroso-o. Kwiye-nen at eram mbitli nap oboksa undumno nggal kwat yusu-o.

⁶ Kat-nen nde at-nen yidnak wene ereba na eralu siyak nambena pugunmu ala-ge, at-nen-e met kuburuk, ’Kat na-ge ndemeret enesiget yoso nap-net yusu-o’ luk yuwa-o” yij-o.

Nggomo wene erep 30:7-33

⁷ Mbal Pem Nagawan wa-e. An wat yigit lak ma-net wok noronokluk wene mberen ya kebem nggi yusu-o.

⁸ An-nen lugud tak kwarosolat, nenesiget yosolat woramin naru, mondok lak tak pi-o. Silobulo lak woralat, silobulo ombo woralat wolmakluk na keya nuburak pug-o. Are, an-nen norak ndak wosa nak wok nururag-o.

⁹ Nde, an nde yi mende ndi mende ombo woralar-e: ”An-e abu mondok ndak worasu yu-t nde, no manggim-nen Mbal Pem Nagawan ukwe yimin-o?” luk nde yimin kwat ma-o. Alat nde, an-nen nde nisilobulo lak weralar-e, an-nen yariya wanosolat, Mbal Pem Nagawan kat kunu-ge emben to rak pimin nde ma-o.

¹⁰ Ndegel oboso nap iri na-ge ndegel ubuwakluk onggo bidnak nap iri na imbiri bem obok purak pug-o. Iri yosola-ge, imbiri lamut tak kubuwama, lugud tak kwaroso nap irit yik kiyujwa-o.

¹¹ Ap erep-nen-e ineidtak imbiri lamut tak onpogolat, iniyarag-e kek tak inpigit lak yili-o.

¹² Ap erep-nen-e ir-e yi meya ndi meya kobong tak-net nde, it ondomog-e mondok marak nap nggal kwatli-o.

¹³ Ap erep-nen-e ”An nak konak-nen yusu-o” luk inndi kek yogolar-e, inmidwak lel kali-o.

¹⁴ Ap erep-nen-e we lesa wanurak pem insilepma bem-nen nunggwi mende kore yogolar-e, insilepma bem ap enarengge lak nap min enmawi lak nap min enarengge ondoro rak inpili-o.

¹⁵ Ket amarig-e mberen woraso-o. Nde, amarik mberen ereya unu-ge ”An wok niri!” Mondok nimbir-e yoso bug-e empat ya nak worasu-o:

¹⁶ ap watluk ndok wiril mbugwi sa min kweyap yibiri min nggweyak mondok le rak talme ebem mburak ukwe woraso min kanduk nil wil mboroso min iri-net yusu-o.

¹⁷ Ta-nen eid ija inndi worak ereba na pesel onposola-ge, erengen-e towe ijamu-nen kela keya bosolat, nde, ebe-ge towe ud-nen mbarosolat makluk, mbo uburak ndag-et mbo ubuwa-o.

¹⁸ Nde, wene empat ya perak an-nen yebet kudtag-e mondok angin worag-e:

¹⁹ towe ud teram nggwe pubu nusu min waro kerep pem keyok keyok mburusu min koma yi koma ombol pem mburusu min kwe ndugum min ap sujwe min inndi misiget yili min ereya perak an-nen yebet kudtag-e meya-o.

²⁰ Kweyap un imin tugup lak woragwi buk kweyap-nen-e nin nap inmin meya kwatlug-e, at-nen nunggwi mende nuruk, aboro matluk-nen yosolar-e: ”An-e meya mbi mondok kwarigit lag-o!” luk yugwi-o.

²¹ Yi wi ndi wi oboksa-nen kwat yoso bug-e wene empat ya worasu-o:

²² ndegel unpugwi nap-nen nagawan men yugwi min ap wid-nen it-nen ukwe bidnak mende-ge ndonggosa nunggwi min

²³ kwe ndugum misig-e ap oboksa-nen at wok uburak insili yogola-t nde, ap misik imin enanggul tenakwi min ndegel unpugwi kweyap-nen-e it-nen ndegel unpugwi kweyap ereba na ondolma nggugwi min ereya perak nde yi wi ndi wi oboksa-nen-e kwarugwi bug-o.

²⁴ Nggweyakma yu me-ge lok lok noso mende urugup worak marik-net nde, mondok indi tenggerag-e empat ya worasu-o:

²⁵ Kurib-e amawi lak, mondok marig-et nde, nunggwi mende ndok worosolar-e, o kibi worala ereya-t ndok woroso-o.

²⁶ Mena timbi-ge amawi lag-et nde, uwi-ge mondok kerep arem nak woroso-o.

²⁷ Nde, sil korel-e at enggendumu-ge nagawan-e lag-et nde, pubu mborosolar-e, kona obonesa-t mboroso-o.

²⁸ Wosanggo iri-ge marik, ininggi-nen tenakwi-t nde, nagawan woragwi sa na woraso-o.

²⁹ At-nen mboroso iri karuk, nit-nen wi yurag-e empat ya-t worasu-o:

³⁰ Singa iri-ge inggi ijok empat worak enggendumu-nen mondok nggok amawi worak, erep ereba na aye yoso buk iri na min

³¹ kambing kusi min towe wam kusi mondok nggwelsa mboroso min nagawan-nen it-nen tenagidnak nap lit unpuruk nanduk lagwi min mboroso iri-ge mondok wi yurak-nen yusu-o.

³² Kat-nen we kindi yebet kagit lag-et nde, kindi kek tak pem meya kwarurak min wene yemnak pugundik ala-ge, mondok kwara wolmin-o!

³³ Kat-nen nde mentega kwarugwi iri na bem sapi wam agamo amburu puruk, kwarat perel tenak worasola-ge, mentega kwat ma-o. Kat-nen nde ap insilep lel kasola-ge, eyabi-t lobok yuwa-o. Kat-nen nde ap insilepma rak posola-ge, insilepma-ge kat kebem min-et mbuwa-o.