NGGOMO WENE 20 - Nanduk Ngget Tul Pidnak Wene

¹ Inndi nden kaso yi iri na-nen ndowaga ap iri na kasa kasa kwarogolat, nari wari yugwi-o. Nde, iri mende yi no no indi lak yusu nab-e wid-net kwarusu-o.

² Nagawan isilepma-ge singa urum ene ngolo nggal yusu-o. Nde, ap-nen nde nagawan iri na isilepma rak pogolat nde ala-ge, it enambikpebe lak tak unpurak enare bili-o.

³ Ap indi lak-nen-e yuk puk mburak indi nak yoso-o. Enpage mondok wi yurak ija lombog-e yuk puk mbugwi buk woragwi irir-o.

⁴ Perari worak nap-nen-e yabu wanugwi tarem eyabu na-ge wanigit lak worarug-e, ebe mbarugwi tarem-e mbaroso bug-o.

⁵ Ap indi arem-nen yebet kagwi mende-ge yi emnde mbaridnak mondok yubuk tak arem iri nggal-nen yusu-o. Alat nde, yebet kaso aru nap-nen-e kenanggurag-e ndak-nen yusu-o.

⁶ Ap kwarat-nen enemnde nggwe-nen para yogolar-e: ”Nir-e kit kennggamirak mondok konak-nen yili-o” luk yili-t nde, mondok ndemeret inndi mot mot woragwi nab-e iniyudtag-e meya-o.

⁷ Li marik nde ineidtak-nen nde konak mot mor-et woragola-ge, it inlirag-e enalen worak irit wolma-o.

⁸ Nagawan nde ap enpem wene mbenarugwi sa kore yugwi iri na bem enpem wene mbenareyekluk kore yosolar-e, meya kwarugwi mende oboksa nam-et nak erengen-nen kujwa-o.

⁹ Ap erep-nen yogolar-e: ”An-e meya kwaroso buk me, mondok nindi-ge marak-nen yusu-o” luk yurag-e ndag-er-a?

¹⁰ Angin ndak wurugwi mende min irit wurugwi mende min ereya na bem-nen lugudsa ap enmberam lali nab-e Nagawan Indo-nen-e isili rak onposo-o.

¹¹ Enpage konak mot mot iri-ge li marik pem-nen kwarugwi iri bem-net enaru yugwi-o.

¹² Neneyanggo iri-ge kulurak amanggim-o. Nde, nenlengen iri-ge kudtak amanggim-o. Mberensa-t Nagawan Indo-nen nak ndak worak pamu-o.

¹³ Ap nene yurak nak nggok tak pugwi iri-ge inpinil angge lak woragwi-o. Alat nde, yabu kwarat wanugwi nap iri-ge nunggwi mende kwarat winde woragwi-o.

¹⁴ Onggo pugwi nap-nen-e onggo kek tak ereba na karuk-nen yogolar-e: ”Onggo-ge mondok meya-o” yurug-et nde, onggo burug-e onggo tebek tak puruk wanidnak pem inndi kek yugwi-o.

¹⁵ Enaru yidnak pem wene yugwi iri-ge emas min abinal worak kerep min onggo-ge nggog-et nde, mondok kek tak-net yusu-o.

¹⁶ Ta-nen nde nin nap namat iri ”An-nen uwi yagimin-o” yosola-ge, arengge ombo iri na-nen-e uwi yagimin-o yid nap iri na arengge uwi yagosola-nen wok turak arengge tena wolmomtag-e ndak-net yusu-o.

¹⁷ Ap enmberam laruk wanidnak silobulo iri nggeret nonggolar-e, undu konag-et nde, abok nggwe-ge enemndam-e kerep tenggel nggal iring ling kegeyo yoso-o.

¹⁸ Inndi-net kwara wal karuk-nen kwarogola-ge, kwarurak yemnak pidnak iri na-ge kwat yoso-o. Iri bem-e, ”Iri nggal-et kwaruwog-o” luk, inndi-nen wal kagit lak-nen-e kenmawi kundurak pug-o.

¹⁹ Ap onpok nak poso indingen-nen-e kura wene-ret yundugwi bug-o. Wene kwarat yugwi nap inmin-e mondok kundurak pug-o.

²⁰ Ta-nen nde eid ija imbiri lamut tak onposola-ge, mondok at uruk wolmomtag-e o mum pem tal nigi yoso nggal lak ma-o.

²¹ Enarengge nandug-et ndag-et lomboksa wanidnag-et nde, abok nggwe-ge imbiringgat yugwi bug-o.

²² Meya kwat konpogola-ge, onggo onggo kwarurak pug-o. Nagawan Indo ebem kinndi wat tak puruk wolmer-o. At-nen-e yongga-t kunduwa-o.

²³ Angin ndak wurugwi min angin ndak wurugwi kerep min ereba na bem-nen enmberam lagwi nab-e Nagawan Indo-nen-e isili eneyaso-o.

²⁴ Nagawan Indo-nen-e nggweyakma nap-nen nogolat wolmomtak iri-ge kuri wosa bamu-o. Iri bem-nen nggweyakma nab-e it-nen wolmomtak tula-ge yebet kali bug-o.

²⁵ ”Nagawan Indo amanggim iri nggal pimin-o” luk urul pigit lak ma-net kwara yebet kudtag-o. Erep-nen-e abog-e ”Niri nera-nen-o” luk nde yurak kwat ma-o.

²⁶ Nagawan indi worak iri-ge meya yugwi nab-e nam-et eneyarug-e, meya yugwi nab-e mondok enabuwa lag-et angin worak anpem puwa-o.

²⁷ Ap inndi penggek tak poso marik iri-ge inndingen arem lombonoso me, Nagawan Indo eral nggal-nen yusu-o.

²⁸ Nagawan-nen nde tena unpuruk worasolat-nen enabuwa yosolat, lud tak nak mot mot kwarosolat worala-ge, at iri-ge pem irit nagawan it enanggul pem wolma-o.

²⁹ Ap sujwe-ge enmawi iri bem-nen wi yak undugwi-o. Nde, ap inndi worag-e enkeren iri bem-nen kek tak unpugwi-o.

³⁰ Erep-nen-e angin worak enpem mboso iri na-nen-e meya kwarugwi ereba na-ge lak tak posolat, inndingen arem min marosolat kwaroso-o.