NDAWI ENGGA 91 - Nanduk Ngget Tul Pidnak Wene

Mbal Pem Nagawan indipma kura woragwi wene

¹ Nagawan Indo Mondok Kek tak iri na indipma kura woragolat, Mondok Amawi Worak iri na isiyamu indipma woragolat kwatli nap-nen

² yu nggal Nagawan Indo yak togolar-e: ”Kar-e an nambigit yosolat, kura nuburuk woraso-nen yusu-o. Nembal Pem Nagawan kebem nak nindi-ge wat tak puruk worasu-o” luk yurak iri-ge ndak-net yusu-o.

³ At-nen-e lak tak onposo elem kura worasu ereba inggem-nen kimiri yosolat, wat momtak kugwi inggiyapma-nen kimiri yosolat ma-o.

⁴ At-nen-e isiyamu-nen yemndak kubuwama, kar-e isiyamu arem kona irit woragun-o. At-nen mot mot tugup lak kwaroso-ge kat kundumno kwat ma-o.

⁵ Iri ala-ge, kar-e lak tak kubuwakluk kubu kebem mbud yosolat, lengge mimo kebem mbud yogolat,

⁶ lak tak onposo kugwi kubu kebem mbosolat, yigisa lak tak onposo mende lenggesilmu kebem mbosolat ma-o luk, kar-e kwiye yurak pug-o.

⁷ Ap seribu-t nde keram-nen ondogolat, ap sepulu ribu-t keralu kigit nggwe ambigit-nen unduwa-t nde, iri nggal-e kat kebem-e mbuwa bug-o.

⁸ Kar-e keralu inggi inggi ereba na yik kagun nggal-e, meya yugwi nab-e it-nen kwaridnak pem onggo ondogola, kagun-o.

⁹ Iri nggal kebem mbigit lak ma iri-ge, kat-nen Nagawan Indo iri na-ge kat kambigit yoso nap tak obosolat, Mondok Amawi Worak iri na-ge kat kura koboso nap tak obosolat kwarigen iri bem-net kwat ma-o.

¹⁰ Nde, kat kebem-e lak tak unpurak mende-ge mbuma bug-o. Kat kuwi bem na lak tak onposo mende-ge mbud ma bug-o.

¹¹ Mbal Pem Nagawan-nen-e kat yik keyarok wolmakluk aid nap yak ondosola, kat mburugun sa oboksa-ge nggetlel kuburuk nuwa-o.

¹² Aid nap-nen-e kar-e kerep pem kuwok abis pija yugun naru, kar-e kudsa ininggi mok pem tak kubuwa-o.

¹³ Kat-nen-e singa ndakngge min waro min-et nde, ebem kuwok puruk, singa ndakngge sujwe min lese min-et nde, kuwok-nen yemen tenak woragun-o.

¹⁴ Mbal Pem Nagawan-nen yosolar-e: ”Ap an nebem inndi kundik worali nab-e an-nen inmiri yimin-o. An nimin-e: ’At iri-ge nit-nen idnak Nagawan Indo-nen yusu-o’ luk yili nab-e nggetlel unpuruk woramin-o.

¹⁵ It-nen nde an neram wene pil luwagola-ge, an-nen enne erep nggarimin-o. Anggun panggun enpem mbidnak tarem na an-net yongga indimin-o. An-nen inmiri yosolat, kek tak onposolat yimin-o.

¹⁶ It ereba-ge an-nen inndi yamuk tak onposolar-e, unluk wolmomtak mot tak puruk, inmiri yimin-o” luk yij-o.