NDAWI ENGGA 69 - Nanduk Ngget Tul Pidnak Wene

Anggun panggun arem woralat tepan yidnak wene Ndawi imid lit kaso nap amanggim Ndaut-nen ngaridnak ndawi.

¹ Mbal Pem Nagawan wa-e. Yi-ge kobongsa luwasolat, nurusuwak kuri yusu me, kat-nen nimiri yi-o.

² An-e nuwok wat tak purak lak me, yi mburu miril arem yubuk yusu-o. An-e yi yubuk tak arem yubuksa nggukmu, yi ebe wasolat amawi-nen wok nuburuk mburusu-o.

³ An-e yongga nururak pem wene mbo keberenak mbot nebabok lak yosolat, nurusu-ge manggo yagij-o. Nembal Pem Nagawan-nen yongga niril lobok yugun-o luk yik keyarok mbot nerengen mep worok yusu-o.

⁴ Erem lakma insili rak nibili nab-e enpe-ge an nanggulsu nggal-e lag-o. Terak minik kwarat-net yili-o. Ap enmawi worak an lak tak nuburak pem ennesiget wene nebem pili-o. Yariya wanigit lag-et nde, enne amawi bem watsa ”Uwi yagi-o” yak norogola, narengge poso-o.

⁵ Mbal Pem Nagawan wa-e. An-nen meya kwaroso-ge kat kerengen pem-e kura mbi worasu bug-o. An-nen lugud tak kwaroso-ge oboksa karu-o.

⁶ Nagawan Indo Mbal Pem Nagawan Mondok Kamawi Worak wa-e. Kat kebem inndi wat tak puruk worali nap ereba na ininggiri rak pimin naru, keya nuburak pug-o. Isarael nap Enmbal Pem Nagawan wa-e. Kat kerembel wanili nap unnu meya rak pimin naru, keya nuburak pug-o.

⁷ Kat kebem-nen ndowaga an-e pesel nobogolat, ninggiri-nen tud tak nak nusu-o.

⁸ Nimi nambara-net nde, ap sal nggal tak nibili-o. Nowe nowot-net nde, nin nap nggal tak nibili-o.

⁹ Kat kuwi iri na undulu-nen an-e pabok pusu-o. Kat pesel kubugwi nap-nen pesel kibili ereba-ge an nebem-et mbusu-o.

¹⁰ An-e nunggwi mende ninggit lak tepan nak yosolat, mondok tebe yusu-o. Iri kwarusu bem it-nen-e eneyak nggal tak nibili-o.

¹¹ An-e nindi puru min woralat, karung sum yutluk worala, ir-e pesel nobogolat nda nitli-o.

¹² Ap ndok worak sa-nen pesel nobogolat enne manggim kwarak nibili-o. Inndi nden kaso yi nunggwi nab-e an nobok nak ndawi bem tak puruk yili-o.

¹³ Alat nde, Nagawan Indo wa-e. An-e kat keram tepan yusu-o. Mbal Pem Nagawan wa-e. Kat-nen kindingen yidnak tarem-e nene erep nggari-o. Kat-nen enabuwa kwarat kasolat, tugup lag-et ap inmiri yoso elem pem yongga niri-o.

¹⁴ Yi mburu arem yubuk makluk, keya nuburak pug-o. Kat-nen-e ap an insili neyagwi nap ininggiyapma-nen nimiri yosolat, yi yubuk tak arem-nen nimiri yosolat kwari-o.

¹⁵ Yi ebe wasolat wok nuburuk mburuwakluk, keya nuburak pug-o. Yi ma yiriwak pem yubuksa mbosolat, mbun arem yapma nobosolat makluk, keya nuburak pug-o.

¹⁶ Nagawan Indo wa-e. Kar-e kindi konak pem irit enabuwa yoso me, an nene erep nggari-o. Kat-nen enabuwa yoso-ge nggok me, nden karuk yik niyudtak kindi min-o.

¹⁷ Ndegel koboso nap an neram-nen kerare nden kudtak pug-o. An-e anggun panggun kasu me, mijalele nene erep nggari-o.

¹⁸ Lobok yugundik, nimiri yi-o. Nuwim nap ininggiyapma-nen mengga keya nibi-o.

¹⁹ Kopkap tobok tak nobogolat, pesel nobogolat, meya rak nobogolat kwatli iri-ge kar-e karu-o. An nuwim nap oboksa-ge kar-e eneyasu-o.

²⁰ Nggweyel nobogola, nindi abi kalok yosolat, nindi kabak yusu-o. An nubud kudtak kore yigi-t nde, an nubud kagit lag-o. An nindi yanggunurak kore yigi-t nde, nindi yek tak pigit lag-o.

²¹ Are, an nere yosoma, an nujwakluk ninggis mende nde mak niriga-o. An yi nere yosoma, yi ngari worak umburugwi undu mak niriga-o.

²² It-nen nggok sakwi iri-ge lak tak unpurak mende nde kwasa labuk mag-o. It-nen nggok sakolat ndok wiridnak ereba na enare burak nde kwasa labuk mag-o.

²³ It enlengen-e ngguru yosolat, onmbolwag-e punusa labuk yosolat mag-o.

²⁴ Kat kisilepma-ge it enpem nggilara mberak pi-o. Kat kisilepma mondok kwarat it enpem mbumag-o.

²⁵ It woragwi sa-ge o ap tu po yuwag-o. It woragwi enma-ge o wa irit wolmag-o.

²⁶ It iri-ge kat-nen angin worak enpem pidnak nap lel mberel onpogolat, kat-nen andi bandi rak inpidnak nap onpok pogolat kwarugwi-o.

²⁷ It-nen lugud tak kwarugwi-ge nambena mbo kwarat mag-o. It iri-ge mot mot kwarugwi rak unpurak pug-o.

²⁸ Unluk woragwi nap unnu mbarak engga bem-nen it unnu-ge korak purag-o. Mot mot kwarugwi nap unnu mbarak engga enggendumu-ge it unnu lak wolmag-o.

²⁹ Alat nde, an-e mangonokma woralat, andi bandi kasu-o. Mbal Pem Nagawan wa-e. Andi bandi arem-nen lesa nimiri yi-o.

³⁰ An-e ndawi bem Mbal Pem Nagawan erembel wanimin-o. At wa yak tugwi ndawi bem at kek tak ibimin-o.

³¹ Sapi min sapi kusi nggok min wosa amanggim kan purak iri-ge nggok-nen yusu-ge lag-o. Are, ndawi bem Nagawan Indo erembel wanurak iri perak indingen kaso-nen yusu-o.

³² Iri kwaroso iri karug-e anggun panggun tak unpugwi nab-e enalen kagolat, Mbal Pem Nagawan kek tak pugwi nab-e enalen-nen inndi yek yogolat ma-o.

³³ Nagawan Indo-ge insilobulo lak nap enne-ge koloso-o. At ilirak o kubu me worali nab-e meme rak onposo bug-o.

³⁴ Mbal min nggweyak min yi koma min, ebem worasu mende oboksa min wa-e. Mbal Pem Nagawan nak erembel wanurag-o.

³⁵ At-nen Yerusalem imiri yosolar-e, Yewura nap unuwi siri iri na-ge tuguruk mendak pil lobok yuwa-o. At ilirag-e o iri na me woragolar-e, nggweyak iri na-ge it onnggweyak ma-o.

³⁶ Nagawan Indo ilirak-nen nderak-nen-e nggweyak iri winde wolma-o. Nagawan Indo ubud kali nap-nen-e iri me-t wolma-o.